Indian Aviation News / ପର୍ବାଣ ପୂର୍ବରୁ ବିମାନ ଯାତ୍ରୀଙ୍କୁ ବଡ଼ ଝଟକା ! ଇଣ୍ଡିଗୋ, ଏୟାର ଇଣ୍ଡିଆ ସମେତ ୪ଟି ଏୟାରଲାଇନ୍ସ ବଢ଼ାଇଲା ଚାର୍ଜ

ଦୀପାବଳି ଓ ଛଟ୍ ପୂଜା ଭଳି ବଡ଼ ପର୍ବପର୍ବାଣୀରେ ଘରକୁ ଫେରିବାକୁ ଯୋଜନା କରୁଥିବା ଯାତ୍ରୀଙ୍କ ପାଇଁ ଆସିଛି ଏକ ବଡ଼ ଝଟକା । ଏହି ପାର୍ବଣ ଋତୁରେ ବିମାନରେ ଯାତ୍ରା କରିବା ଏବେ ଆହୁରି ମହଙ୍ଗା ହେବ । ଦେଶର ପ୍ରମୁଖ ବିମାନ କମ୍ପାନୀ ଇଣ୍ଡିଗୋ (IndiGo), ଏୟାର ଇଣ୍ଡିଆ (Air India), ଏୟାର ଇଣ୍ଡିଆ ଏକ୍ସପ୍ରେସ୍ (Air India Express) ଏବଂ ଆକାସା ଏୟାର (Akasa Air) ଫ୍ୟୁଏଲ୍ ସରଚାର୍ଜ ବୃଦ୍ଧି କରିଛନ୍ତି । ନୂଆ ଦର ୯ ଅକ୍ଟୋବର ୨୦୨୬ରୁ ଲାଗୁ ହୋଇଛି ।

କାହିଁକି ବଢ଼ିଲା ବିମାନ ଭଡ଼ା ?
ଆନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ବୃଦ୍ଧି ଏବଂ ଭୂରାଜନୈତିକ ଯୁଦ୍ଧ ଯୋଗୁଁ ବିମାନ ଇନ୍ଧନ ବା ଏଭିଏସନ୍ ଟର୍ବାଇନ୍ ଫ୍ୟୁଏଲ୍ (ATF) ଦର ବଢ଼ିଛି । ବିମାନ ଚଳାଚଳରେ ଇନ୍ଧନ ଖର୍ଚ୍ଚ ଏକ ବଡ଼ ଅଂଶ ହୋଇଥିବାରୁ ବଢ଼ିଥିବା ଖର୍ଚ୍ଚର ଭରଣା ପାଇଁ ବିମାନ କମ୍ପାନୀଗୁଡ଼ିକ ଫ୍ୟୁଏଲ୍ ସରଚାର୍ଜ ବଢ଼ାଇବାକୁ ନିଷ୍ପତ୍ତି ନେଇଛନ୍ତି ।

କେଉଁ ଏୟାରଲାଇନ୍ସରେ କେତେ ବଢ଼ିଲା ଚାର୍ଜ ?

• ୧. ଏୟାର ଇଣ୍ଡିଆ ଓ ଏୟାର ଇଣ୍ଡିଆ ଏକ୍ସପ୍ରେସ୍

ଏୟାର ଇଣ୍ଡିଆରେ ୯ ଅକ୍ଟୋବର ସକାଳ ୧୧ଟାରୁ ଏବଂ ଏୟାର ଇଣ୍ଡିଆ ଏକ୍ସପ୍ରେସ୍‌ରେ ମଧ୍ୟରାତ୍ରି ୧୨ଟାରୁ ନୂଆ ବୁକିଂ ପାଇଁ ବର୍ଦ୍ଧିତ ଦର ଲାଗୁ ହେବ ।
- ଘରୋଇ ଉଡ଼ାଣ: ଯାତ୍ରା ଦୂରତା ଅନୁସାରେ ଏକପାଖିଆ ଯାତ୍ରା ପାଇଁ ୪୦୦ରୁ ୧,୨୦୦ ଟଙ୍କା ଅତିରିକ୍ତ ଫ୍ୟୁଏଲ୍ ସରଚାର୍ଜ ।
- ଆନ୍ତର୍ଜାତୀୟ ଉଡ଼ାଣ: ରୁଟ୍ ଅନୁସାରେ ୫୫ରୁ ୨୧୫ ଡଲାର ପର୍ଯ୍ୟନ୍ତ ଅତିରିକ୍ତ ଚାର୍ଜ ।

• ୨. ଆକାସା ଏୟାର

ଆକାସା ଏୟାରରେ ୯ ଅକ୍ଟୋବର ରାତି ୧୨ଟା ୧ ମିନିଟ୍‌ରୁ ନୂଆ ବୁକିଂ ପାଇଁ ବର୍ଦ୍ଧିତ ଫ୍ୟୁଏଲ୍ ସରଚାର୍ଜ ଲାଗୁ ହେବ ।
- ଘରୋଇ ଉଡ଼ାଣ: ଦୂରତା ଅନୁସାରେ ୩୭୫ରୁ ୧,୧୫୦ ଟଙ୍କା ଅତିରିକ୍ତ ଚାର୍ଜ ।
- ଆନ୍ତର୍ଜାତୀୟ ଉଡ଼ାଣ: ୬ଟି ପ୍ରମୁଖ ଗନ୍ତବ୍ୟସ୍ଥଳ ପାଇଁ ୨,୫୦୦ ଟଙ୍କାର ଫ୍ଲାଟ୍ ଫ୍ୟୁଏଲ୍ ସରଚାର୍ଜ ।

ଏଥି ସହ ପଢନ୍ତୁ: ପାକିସ୍ତାନୀ ପାଇଲଟ୍ ଉଡ଼ାଇପାରିବେ କି ଭାରତୀୟ ବିମାନ ? ନିୟମ ଜାଣିଲେ ହେବେ ଆଶ୍ଚର୍ଯ୍ୟ

• ୩. ଇଣ୍ଡିଗୋ ଏୟାର

ଇଣ୍ଡିଗୋ ୬ ଅକ୍ଟୋବର ୨୦୨୬ରୁ ହିଁ ନୂଆ ଫ୍ୟୁଏଲ୍ ସରଚାର୍ଜ ଲାଗୁ କରିଛି ।
- ଘରୋଇ ଉଡ଼ାଣ: ଦୂରତା ଅନୁସାରେ ୩୭୫ରୁ ୧,୩୦୦ ଟଙ୍କା ପର୍ଯ୍ୟନ୍ତ ଅତିରିକ୍ତ ଚାର୍ଜ ।
- ଆନ୍ତର୍ଜାତୀୟ ଉଡ଼ାଣ: ରୁଟ୍ ଅନୁସାରେ ୧,୦୦୦ରୁ ୧୦,୦୦୦ ଟଙ୍କା ପର୍ଯ୍ୟନ୍ତ ଅତିରିକ୍ତ ଚାର୍ଜ ।
- ୟୁରୋପ ଯାତ୍ରା: ଏହି ରୁଟ୍‌ରେ ସର୍ବାଧିକ ୧୦,୦୦୦ ଟଙ୍କାର ଅତିରିକ୍ତ ଚାର୍ଜ ଲାଗିବ ।

ଦୀପାବଳି ଓ ଛଟ୍ ପୂଜାରେ ଯାତ୍ରୀଙ୍କ ପକେଟ୍‌କୁ ଅଧିକ ଚାପ
ପାର୍ବଣ ସମୟରେ ଘରକୁ ଫେରୁଥିବା ଲୋକଙ୍କ ପାଇଁ ବିମାନ ଟିକେଟ୍ ମୂଲ୍ୟ ବୃଦ୍ଧି ଚିନ୍ତାର କାରଣ ହୋଇପାରେ । ଫ୍ୟୁଏଲ୍ ସରଚାର୍ଜ ବୃଦ୍ଧି ସହିତ ଯାତ୍ରୀଙ୍କ ଚାହିଦା ବଢ଼ିଲେ ଡାଇନାମିକ୍ ଫେୟାର୍ ବ୍ୟବସ୍ଥା ଯୋଗୁଁ ଟିକେଟ୍ ଦାମ ଆହୁରି ବଢ଼ିପାରେ । ତେଣୁ ଯେଉଁମାନଙ୍କ ଯାତ୍ରା ଯୋଜନା ନିଶ୍ଚିତ ହୋଇଛି, ସେମାନେ ଟିକେଟ୍ ବୁକିଂ ପୂର୍ବରୁ ନିଜ ରୁଟ୍‌ର ନୂଆ ଦର ଓ ଅତିରିକ୍ତ ଚାର୍ଜ ଯାଞ୍ଚ କରିନେବା ଉଚିତ । ଏହାଦ୍ୱାରା ଶେଷ ମୁହୂର୍ତ୍ତରେ ଅଧିକ ଖର୍ଚ୍ଚରୁ କିଛି ମାତ୍ରାରେ ରକ୍ଷା ମିଳିପାରିବ ।