ଭାଗ୍ୟ ଭଲ କିଛି ହେଲାନି । ବଞ୍ଚିଗଲା ଶତାଧିକ ଜୀବନ । ନଚେତ୍‌ ସାରା ବିଶ୍ୱ ଦେଖିଥାନ୍ତା ଅହମ୍ମଦାବାଦ ଘଟଣାର ରିପିଟ୍ । ଆଜ୍ଞା ହଁ.. ଏକଥା ଆପଣଙ୍କୁ ଟିକେ ଅଡ଼ୁଆ ଲାଗୁଥିଲେ ବି ସତ । ଅହମ୍ମଦାବାଦ ବିମାନ ଦୁର୍ଘଟଣାର ଭୟ ଏଯାଏଁ ଲୋକଙ୍କ ମନରୁ ଲିଭିନଥିବା ବେଳେ ପୁଣି ଏକ ବଡ଼ ଦୁର୍ଘଟଣାର ସାମ୍ନା କରିଥାନ୍ତା ଆଉ ଏକ ଘରୋଇ ବିମାନ । କାରଣ ମଝି ଆକାଶରେ ବିମାନର ସରିଗଲା ଇନ୍ଧନ । ତେଣୁ ବାଧ୍ୟ ହୋଇ ଗତିପଥ ବଦଳାଇଲା ବିମାନ ।

ଅହମଦାବାଦ ବିମାନ ଦୁର୍ଘଟଣା ପରେ ବିମାନକୁ ନେଇ ଅଘଟଣ ପରେ ଅଘଟଣ ଖବର ସାମ୍ନାକୁ ଆସୁଥିବା ବେଳେ ଏବେ ପୁଣି ଆସିଛି ଇଣ୍ଡିଗୋ ବିମାନର ଇନ୍ଧନ ସରିଯିବା ଖବର । ତେବେ ଆକାଶପଥ ଦେଇ ଚେନ୍ନାଇ ଯାଉଥିବା ଏକ ବିମାନରେ ଇନ୍ଧନ ଅଭାବରୁ ଗନ୍ତବ୍ୟସ୍ଥଳରେ ପହଞ୍ଚିପାରିନି ବିମାନ । ବିମାନର ଇନ୍ଧନ ଅଭାବ ଥିବା ଜାଣି ହଠାତ୍ ପାଇଲଟ୍ 'ଇନ୍ଧନ ମେଡେ' ଘୋଷଣା କରିଥିଲେ ।

ପରେ ଚେନ୍ନାଇ ଯାଉଥିବା ଇଣ୍ଡିଗୋ ବିମାନର ଗତିପଥ ବେଙ୍ଗାଲୁରୁକୁ ସ୍ଥାନାନ୍ତର କରାଯାଇଥିଲା । ଗତ ଗୁରୁବାର ଦିନ ବିମାନବନ୍ଦରରେ ଭିଡ଼ ଯୋଗୁଁ ପାଇଲଟଙ୍କୁ ଚେନ୍ନାଇରେ ଅବତରଣ ପାଇଁ ଅନୁମତି ନମିଳିବାରୁ ଏହି ଘଟଣା ଘଟିଥିଲା ବୋଲି ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି ।

ଇଣ୍ଡିଗୋ ହେଉ କି ଏୟାର ଇଣ୍ଡିଆ- ଗୋଟେ ପ୍ରକାର କହିବାକୁ ଗଲେ ବିମାନ ସେବାର ବେଳା ଖରାପ ଚାଲିଛି । କାରଣ କେତେବେଳେ ଦୁର୍ଘଟଣା ତ କେତେବେଳେ ବୋମା ଧମକ ତ ଆଉ କେତେବେଳେ ଯାନ୍ତ୍ରିକ ତ୍ରୁଟି ପାଇଁ ବିମାନର ଜରୁରୀ ଅବତରଣ ହେଉଛି ।

ଗତ ମଙ୍ଗଳବାର ଦିନ ମଧ୍ୟ ନାଗପୁରରେ ଇଣ୍ଡିଗୋର ବିମାନ ଜରୁରୀ ଅବତରଣ କରିଥିଲା । ବିମାନକୁ ବୋମା ଧମକ ମିଳିବା ପରେ ଇଣ୍ଡିଗୋ ବିମାନ ଜରୁରୀ ଅବତରଣ କରିଥିଲା । କୋଚିରୁ ଦିଲ୍ଲୀ ଯାଉଥିବା ବେଳେ ଇଣ୍ଡିଗୋ ଏୟାରଲାଇନ୍ସର ଏକ ବିମାନକୁ ବୋମା ଧମକ ମିଳିଥିଲା ।