କମାଲ କରିବ ତମାଲ । ଭାରତୀୟ ନୌସେନା ପାଇଁ ଐତିହାସିକ ଦିନ । ଆଜି ନୌସେନାରେ ସାମିଲ ହୋଇଛି ଶତ୍ରୁ ପାଇଁ କାଳ ଆଇଏସଏସ ତମାଲ । ତମାଲରେ ନିୟୋଜିତ ହୋଇଛନ୍ତି ୨୫୦ରୁ ଅଧିକ ଯବାନ । ଋଷର କାନିନିନଗ୍ରାଦରେ ଆୟୋଜିତ ଭବ୍ୟ ସମାରୋହରେ ଅତ୍ୟାଧୁନିକ ଷ୍ଟିଲ୍ଥ ଗ୍ରାଇଡେଡ ମିସାଇଲ ଫ୍ରିଗେଟ ଆଇଏନଏସ ତମାଲକୁ ଭାରତୀୟ ନୌସେନାରେ ଔପଚାରିକ ଭାବେ ସାମିଲ କରାଯାଇଛି ।

କାର୍ଯ୍ୟକ୍ରମରେ ନୌସେନାର ୱେଷ୍ଟର୍ଣ୍ଣ କମାଣ୍ଡ ଫ୍ଲାଇଂ ଅଫିସର କମାଣ୍ଡିଂ ଇନ ଚିଫ୍ ଭାଇସ ଆଡମିରାଲ ସଂଜୟ ଜେ. ସିଂହ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ତମାଲ ଲଞ୍ଚିଂ କାର୍ଯ୍ୟକ୍ରମରେ ଭାରତ ଓ ଋଷର ପ୍ରତିରକ୍ଷା ମନ୍ତ୍ରଣାଳୟ ଅଧିକାରୀ ମଧ୍ୟ ସାମିଲ ଥିଲେ । ଆଇଏନଏସ ତମାଲର ନାଁ ଭାରତୀୟ ପୌରାଣିକ କଥାରୁ ନିଆଯାଇଛି । ଦେବତାଙ୍କ ରାଜା ଇନ୍ଦ୍ରଙ୍କ ପ୍ରମୁଖ ଅସ୍ତ୍ରର ନାଁ ତମାଲ । ଯାହା ଭାରତୀୟ ନୌସେନାର ନୂଆ ସୋପାନରେ ପହଞ୍ଚାଇଛି । ୧୨୫ ମିଟର ଲମ୍ବ ଓ ୩ ହଜାର ୯ ଶହ ଟନ ଓଜନର ଏହି ଫ୍ରିଗେଟ ପଶ୍ଚିମ ନୌସେନା ଅଧିନ ଆରବ ଓ ପଶ୍ଚିମ ଭାରତ ମହାସାଗରରେ ମୁତୟନ କରାଯିବ ।

ଏକ ଧାରୁଆ ଅସ୍ତ୍ର ଭଳି ତମାଲକୁ ପ୍ରସ୍ତୁତ କରାଯାଇଛି । ସଠିକ୍ ଆକ୍ରାମଣ କ୍ଷମତା ଓ ତୀବ୍ର ଗତି ଏହି ଯୁଦ୍ଧପୋତକୁ ଅନ୍ୟ ଯୁଦ୍ଧପୋତଠାରୁ ଭିନ୍ନ ପରିଚୟ ଦେଇଛି । ତମାଲ ଘଣ୍ଟାପ୍ରତି ୫୫କି.ମି ବେଗରେ ଗତି କରିପାରିବ । ଗୋଟିଏ ସମୟରେ କୌଣସି ମିସନରେ ବାହାରି ଏହା ୩ହଜାର କିଲୋମିଟର ପର୍ଯ୍ୟନ୍ତ ଯାତ୍ରା କରିପାରିବ । ଶତ୍ରୁର ପିଛା କରି କରି ବିନାଶ କରିପାରିବ ଏହି ଯୁଦ୍ଧ ପୋତ । ସବୁଠୁ ବଡ କଥା ହେଉଛି ସୁପର ସୋନିକ୍ ବ୍ରହ୍ମୋସ ମିଜାଇଲ ନିକ୍ଷେପ କରାଯିବାର କ୍ଷମତା ଏହି ଯୁଦ୍ଧପୋତ ପାଖରେ ରହିଛି ।

ପାଣି ତଳେ ବିପଦର ମୁକାବିଲା ପାଇଁ ତମାଲରେ ଅତ୍ୟାଧୁନିକ ଆଣ୍ଟି-ସବମରିନ୍ ରକେଟ୍ ଓ ଟରପେଡୋ ସିଷ୍ଟମ ରହିଛି । ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି, ଶତ୍ରୁ ରାଡାରରୁ ବଞ୍ଚିବା ପାଇଁ ଏଥିରେ ଉନ୍ନତମାନର ଟେକନୋଲୋଜିକୁ ବ୍ୟବହାର କରାଯାଇଛି । ଶତ୍ରୁ ରାଡାରରେ ନଆସି ଶତ୍ରୁ ଉପରେ ଭରପୁର ଆକ୍ରମଣ କରିପାରିବ ଏହି ଯୁଦ୍ଧପୋତ । ଏହି ଯୁଦ୍ଧପୋତରେ ସ୍ଥିତି ନିରୀକ୍ଷଣ ଓ ଯୁଦ୍ଧ ମିଶନ ପାଇଁ ଲଢୁଆ ହେଲିକପ୍ଟର ମୁତୟନ ହୋଇ ରହିବ । ସ୍ଥିତିକୁ ନିରିକ୍ଷଣ କରିବା ସହ ଆବଶ୍ୟକ ପଡିଲେ ଶତ୍ରୁ ଉପରେ ଆକ୍ରମଣ ବି କରିପାରିବ ଏହି ହେଲିକପ୍ଟର । ତାମାଲ ଶୀଘ୍ର ନୌସେନାରେ ସାମିଲ ହେଲେ ଭାରତୀୟ ନୌସେନାର କ୍ଷମତା ଏବଂ ପ୍ରଶାନ୍ତ ମହାସାଗରୀୟ କ୍ଷେତ୍ରରେ ନୌସେନାର ରଣନୀତି ବୃଦ୍ଧି ପାଇବ ।