ଯୁଦ୍ଧଗ୍ରସ୍ତ ଇରାନରୁ ସ୍ବଦେଶ ମୁହାଁ ଭାରତୀୟ । ବର୍ତ୍ତମାନ ସୁଦ୍ଧା ମୋଟ ୧୧୧୭ ଭାରତୀୟ ନାଗରିକ ସ୍ବଦେଶ ଫେରିଛନ୍ତି । ଅପରେସନ ସିନ୍ଧୁ ଜରିଆରେ ଇରାନରୁ ଆଜି ଫେରିଛନ୍ତି ଆଉ ୨୯୦ ଭାରତୀୟ ନାଗରିକ । ଭାରତ ପାଇଁ ଇରାନ ସରକାର ଆକାଶ ମାର୍ଗ ଖୋଲିବା ପରେ ବିମାନରେ ସିଧାସଳଖ ଇରାନରୁ ସ୍ବଦେଶ ଫେରୁଛନ୍ତି ଭାରତୀୟ ।

୨ ଦିନ ପୂର୍ବରୁ ପ୍ରଥମ ପର୍ଯ୍ୟାୟରେ ନୂଆଦିଲ୍ଲୀରେ ପହଞ୍ଚିଥିଲେ ୧୧୦ ଜଣ ଭାରତୀୟ ଛାତ୍ରଛାତ୍ରୀ । ପ୍ରଥମ ପର୍ଯ୍ୟାୟରେ ଇରାନରୁ ଭାରତୀୟ ସିଧାସଳଖ ଆସିପାରିନଥିଲେ । ଇରାନରେ ଭାରତୀୟ ଦୂତାବାସର ସହଯୋଗରେ ଆର୍ମେନିଆ ଓ ଦୋହା ଦେଇ ଫେରିଥିଲେ ଭାରତୀୟ ।

ଇରାନରେ ଫସିଥିବା ଭାରତୀୟଙ୍କ ସମେତ ନେପାଳ ଓ ଶ୍ରୀଲଙ୍କା ନାଗରିକଙ୍କୁ ମଧ୍ୟ ସୁରକ୍ଷିତ ଉଦ୍ଧାର କରିବାକୁ ଘୋଷଣା କରିଛି ଭାରତ ବୈଦେଶିକ ମନ୍ତ୍ରଣାଳୟ । ଦୁଇ ପଡ଼ୋଶୀ ଦେଶର ଔପଚାରିକ ଅନୁରୋଧ ପରେ ଇରାନରେ ନିଜର ସ୍ଥାନାନ୍ତର ପ୍ରୟାସକୁ ବିସ୍ତାର କରି ନେପାଳ ଓ ଶ୍ରୀଲଙ୍କାର ନାଗରିକଙ୍କୁ ମଧ୍ୟ ଏଥିରେ ସାମିଲ କରିବାକୁ ଭାରତର ସରକାର ନିଷ୍ପତ୍ତି ନେଇଛନ୍ତି ।

ଅନ୍ୟପଟେ ଏବେ ଇସ୍ରାଏଲ-ଇରାନ ଯୁଦ୍ଧରେ ଏଣ୍ଟ୍ରି ମାରିଛି ଆମେରିକା । ଇରାନ ଉପରେ B-2 ବୋମାବର୍ଷୀ ଷ୍ଟେଲ୍ଥ ଯୁଦ୍ଧ ବିମାନରୁ ବୋମା ବର୍ଷା କରିଛି ଆମେରିକା । ୩ଟି ପରମାଣୁ ଘାଟି ଧ୍ୱଂସ କରିଛି । ଜବାବରେ ଇସ୍ରାଏଲ ଉପରେ ଇରାନ୍‌ ବାଲିଷ୍ଟିକ୍ ମିସାଇଲ୍ ମାଡ଼ କରିଛି । ଆମେରିକାକୁ ପାଲଟା ଆକ୍ରମଣ ଭୟ ରହିଛି । ତେଣୁ ନ୍ୟୁୟର୍କରେ ବଢିଛି ସୁରକ୍ଷା ବ୍ୟବସ୍ଥା । ସେପଟେ ଏୟାରସ୍ପେସ୍ ବନ୍ଦ କରିଛି ଇସ୍ରାଏଲ । ଟ୍ରମ୍ପ୍‌ଙ୍କ ନିଷ୍ପତ୍ତିକୁ ଦୁଃସାହସିକ କହିଲେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ।

ତେବେ ମଧ୍ୟପ୍ରାଚ୍ୟରେ ଉତ୍ତେଜନା ବଢୁଥିବା ବେଳେ ଇରାନ୍ ରାଷ୍ଟ୍ରପତିଙ୍କ ସହ କଥା ହୋଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ବର୍ତ୍ତମାନର ସ୍ଥିତି ସମ୍ପର୍କରେ ଦୁଇ ଦେଶର ରାଷ୍ଟ୍ରମୁଖ୍ୟ ଆଲୋଚନା କରିଥିଲେ। ଉତ୍ତେଜନା ବଢୁଥିବାରୁ ପ୍ରଧାନମନ୍ତ୍ରୀ ଚିନ୍ତାବ୍ୟକ୍ତ କରିଥିଲେ। ଶାନ୍ତି, ସୁରକ୍ଷା ଓ ସ୍ଥିରତା ପାଇଁ କୂଟନୈତିକ ଆଲୋଚନା ଓ କଥାବାର୍ତ୍ତା ମାଧ୍ୟମରେ ଉତ୍ତେଜନା ହ୍ରାସ ପାଇଁ ପ୍ରଧାନମନ୍ତ୍ରୀ ନିଜର ମତ ରଖିଥିଲେ।

Argus News | argus news | Odisha Latest News, Breaking News, Trending News, Live TV