ପ୍ରଧାନମନ୍ତ୍ରୀ ମୋଦିଙ୍କୁ ଗୁହାରି କରିଛନ୍ତି ଇରାନୀ ମହିଳା । ସୁରକ୍ଷିତ ଭାବେ କିପରି ନିଜ ଘରେ ପହଞ୍ଚିବେ ସେଥିପାଇଁ ସାହାଯ୍ୟ ମାଗିଛନ୍ତି ମହିଳା । ପହଲଗାମ୍‌ରେ ଆତଙ୍କବାଦୀ ଆକ୍ରମଣ ଯୋଗୁ ଭାରତ-ପାକ୍ ସୀମା ବନ୍ଦ କରାଯାଇଛି । ଯେଉଁ କାରଣରୁ ଭ୍ୟାନ୍ ରେ ଯାତ୍ରା କରୁଥିବା ଏହି ଇରାନୀ ମହିଳା ଜଣକ ଅଟାରୀରେ ଫସି ଯାଇଛନ୍ତି । ଏଥିପାଇଁ ତାଙ୍କୁ ଅନେକ ସମସ୍ୟାର ସାମ୍ନା କରିବାକୁ ପଡୁଛି । ଏହାକୁ ନେଇ ସେ ସୁରକ୍ଷିତ ଭାବେ କିପରି ନିଜ ଦେଶରେ ପହଞ୍ଚିବାକୁ ଭାରତ ସରକାରଙ୍କୁ ସାହାଯ୍ୟ କରିବାକୁ ଗୁହାରି କରିଛନ୍ତି ।

ମହିଳା ଜଣକ କହିଛନ୍ତି, ଫେବୃଆରୀରେ ସେ ଏକ ପର୍ଯ୍ୟଟକ ଭାବେ ନିଜ ଭ୍ୟାନ୍‌ରେ ପାକିସ୍ତାନର ରାସ୍ତା ଦେଇ ଭାରତ ଆସିଥିଲେ । ଏବେ ସେ ଇରାନ୍ ଯିବାକୁ ଚାହୁଁଛନ୍ତି । କିନ୍ତୁ ସୀମା ବନ୍ଦ ଥିବାରୁ ସେମାନେ ଯିବାକୁ ଦେଉ ନାହାନ୍ତି । ଯେଉଁଥିପାଇଁ ତାଙ୍କୁ ଭ୍ୟାନ୍‌ର ଡବାରେ ଶୋଇବାକୁ ପଡୁଛି, ଏବଂ ସେଇଠି ଖାଇବା ତିଆରି କରିବାକୁ ପଡୁଛି ବୋଲି ସେ କହିଛନ୍ତି ।

ଆହୁରି ମଧ୍ୟ ସେ କହିଛନ୍ତି, ତାଙ୍କୁ ଭାରତ ଖୁବ ପସନ୍ଦ । ସେ ଭାରତରେ ରହି ପାଠ ପଢୁଥିଲେ । ପହଲଗାମ୍‌ର ଏପରି ଆତଙ୍କୀ ଆକ୍ରମଣକୁ ନେଇ ସେ ଖୁବ ଦୁଃଖି ଅଛନ୍ତି । ଆଉ ମାତ୍ର କିଛି ଦିନରେ ତାଙ୍କ ରୋଡ୍‌ ଭିସା ସରିଯିବ । ଇରାନ୍ ଯିବାପାଇଁ ତାଙ୍କ ପାଖରେ ଅନ୍ୟ କିଛି ବିକଳ୍ପ ନାହିଁ । ସେ ଯେତେବେଳେ ଅଟାରୀ ବର୍ଡର ପାଖକୁ ଯାଇଥିଲେ, ସେଠାରେ ସୀମାରେ ଥିବା ଅଧିକାରୀ କହିଥିଲେ, କେବଳ ପାକିସ୍ତାନୀ ପାସପୋର୍ଟ ଧାରକ ହିଁ ବର୍ଡର ଅତିକ୍ରମ କରିପାରିବେ । କିନ୍ତୁ ଇରାନ୍‌କୁ ଯିବାପାଇଁ ସଡକ ରାସ୍ତା ପାକିସ୍ତାନ ଦେଇ ହିଁ ଯାଇଛି । ତେଣୁ ଭାରତ ସରକାରଙ୍କ ଅନୁମତିରେ ହିଁ ସେ ଇରାନ୍‌ରେ ପହଞ୍ଚି ପାରିବେ , ସେଥିପାଇଁ ଭାରତ ସରକାରଙ୍କ ସାହାଯ୍ୟ ମାଗିଛନ୍ତି ଇରାନୀ ମହିଳା । ମହିଳା ଜଣକ ଭାରତକୁ ନିଜର ଦ୍ଵିତୀୟ ଘର ମାନୁଥିବା ମଧ୍ୟ କହିଛନ୍ତି ।