ପ୍ରାୟ ଦେଢ଼ ବର୍ଷ ହେବ ଇସ୍ରାଏଲ୍-ହମାସ୍ ଯୁଦ୍ଧ ଲାଗି ରହିଥିବା ବେଳେ ସାମ୍ନାକୁ ଆସିଛି ପାଲେଷ୍ଟାଇନ୍‌ର ଆଉ ଏକ ବଡ଼ କାରନାମା । ଭାରତୀୟଙ୍କୁ କାମର ପ୍ରଲୋଭନ ଦେଖାଇ ପାଲେଷ୍ଟାଇନ୍‌ ରଚିଥିବା ଷଡ଼ଯନ୍ତ୍ରର ପର୍ଦ୍ଦାଫାସ୍ ହୋଇଛି । ୱେଷ୍ଟବ୍ୟାଙ୍କରେ ବନ୍ଧକ ଥିବା ୧୦ ଜଣ ଭାରତୀୟ ଶ୍ରମିକଙ୍କୁ ଉଦ୍ଧାର କରିଛି ଇସ୍ରାଏଲ୍ ଡିଫେନ୍ସ ଫୋର୍ସ । ଆଇଡିଏଫ୍ ସହାୟତାରେ ବନ୍ଧକ ଭାରତୀୟ ମୁକୁଳିବା ପରେ ଧରା ପଡ଼ିଛି ପାଲେଷ୍ଟାଇନ୍‌ର ଚାଲ୍ ଓ ଚାଲାକି ।

୨୦୨୩ ଅକ୍ଟୋବର ୭ରେ ଇସ୍ରାଏଲ୍‌ରେ ପଶି ଆକ୍ରମଣ କରେ ହମାସ୍ । ଆଉ ତୁରନ୍ତ ପାଲେଷ୍ଟାଇନ୍ ଉପରେ ପାଲଟା ଆକ୍ରମଣ ଓ ଯୁଦ୍ଧଦେହିଂ ଡାକରା ଦିଅନ୍ତି ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ । ଇସ୍ରାଏଲ୍-ହମାସ୍ ମଧ୍ୟରେ ଯୁଦ୍ଧ ଆରମ୍ଭ ହୁଏ, ବିଦେଶୀ ନାଗରିକ ଇସ୍ରାଏଲ୍ ଓ ପାଲେଷ୍ଟାଇନ୍ ଛାଡ଼ି ସ୍ଵଦେଶ ଫେରନ୍ତି । ସେପଟେ ଯୁଦ୍ଧ ଯୋଗୁଁ ପାଲେଷ୍ଟାଇନ୍ ନାଗରିକଙ୍କ ୱାର୍କ ପରମିଟ୍ ରଦ୍ଦ କରେ ଇସ୍ରାଏଲ୍ । ଫଳରେ ଇସ୍ରାଏଲ୍‌ରେ ଶ୍ରମିକ ଅଭାବ ଆହୁରି ବଢ଼ିଯାଏ । ଆଉ ଏହାରି ସୁଯୋଗ ନିଏ ପାଲେଷ୍ଟାଇନ୍...

ନିର୍ମାଣ କାମ ସହ ଅଧିକ ଟଙ୍କାର ଲୋଭ ଦେଖାଏ । ଆଉ ଯେଉଁଥିରେ ଫସି ଯାଆନ୍ତି ଏକାଧିକ ଭାରତୀୟ । କାମ ଆଶାରେ ୱେଷ୍ଟବ୍ୟାଙ୍କ ଯାଆନ୍ତି । ଆଉ ସେଠାରେ ସେମାନଙ୍କୁ ବନ୍ଧକ ରଖି ପାସପୋର୍ଟ ଛଡ଼ାଇ ନିଏ ପାଲେଷ୍ଟାଇନ୍ । ଏଭଳି ଭାବେ ପାଲେଷ୍ଟାଇନ୍‌ରେ ଅପହରଣର ଶିକାର ୧୦ ଭାରତୀୟ ଶ୍ରମିକଙ୍କୁ ଇସ୍ରାଏଲ୍ ସେନା ଉଦ୍ଧାର କରିଛି । ମାର୍ଚ୍ଚ ୬ ତାରିଖ ରାତି ସାରା ଆଇଡିଏଫ୍ ଅପରେସନ୍ ଚଳାଇବା ପରେ ମୁକୁଳିଛନ୍ତି ୧୦ ଭାରତୀୟ ।

ମିଳିଥିବା ସୂଚନା ଅନୁସାରେ, ୧୦ ଭାରତୀୟଙ୍କୁ ଏକ ଗାଁରେ ବନ୍ଧକ ରଖିଥିଲା ପାଲେଷ୍ଟାଇନ୍ । ବନ୍ଧକ ଭାରତୀୟଙ୍କ ପାସପୋର୍ଟ ନେଇ ପାଲେଷ୍ଟାଇନ୍ ନାଗରିକ ଇସ୍ରାଏଲ୍‌ରେ ପ୍ରବେଶ ପ୍ରୟାସ ମଧ୍ୟ କରିଥିଲେ । ଇସ୍ରାଏଲ୍ କେତେକ ଚେକ୍ ପଏଣ୍ଟ ପାର୍ କରିବା ପରେ ଆଇଡିଏଫ୍‌କୁ ସନ୍ଦେହ ହୋଇଥିଲା । ଆଉ ଯାଞ୍ଚ ପରେ ଜଣାପଡ଼ିଥିଲା ପାଲେଷ୍ଟାଇନ୍‌ର ଚକ୍ରାନ୍ତ । ଏହାପରେ ଆଇଡିଏଫ୍ ବନ୍ଧକ ଭାରତୀୟଙ୍କୁ ମୁକୁଳାଇଛି ।

ଏନେଇ ଇସ୍ରାଏଲ୍, ଭାରତୀୟ ଦୂତାବାସକୁ ସୂଚନା ଦେଇଛନ୍ତି । ଏବେ ମାମଲାର ତଦନ୍ତ ଚାଲିଛି । ଭାରତୀୟ ଦୂତାବାସ ମଧ୍ୟ ଇସ୍ରାଏଲ୍ ସମ୍ପର୍କରେ ରହିଛି । ଇସ୍ରାଏଲ୍ ଅନୁସାରେ, ୨୦୨୩ ମେରେ ଦୁଇ ଦେଶ ମଧ୍ୟରେ ଏକ ଶ୍ରମ ଚୁକ୍ତି ହୋଇଥିଲା । ଗତ ବର୍ଷକରେ ପ୍ରାୟ ୧୬ ହଜାର ଭାରତୀୟ ନିର୍ମାଣ କାର୍ଯ୍ୟ ଲାଗି ଇସ୍ରାଏଲ୍ ଯାଇଛନ୍ତି । ତେବେ ୱେଷ୍ଟବ୍ୟାଙ୍କରେ ମୋଟ କେତେଜଣ ଭାରତୀୟ ଏଭଳି ଭାବେ ପାଲେଷ୍ଟାଇନ୍‌ର ଚକ୍ରବ୍ୟୁହରେ ଫସିଛନ୍ତି ତାହା ସ୍ପଷ୍ଟ ହୋଇ ନାହିଁ ।