ଇସ୍ରୋର ପରବର୍ତ୍ତୀ ମୁଖ୍ୟଭାବେ ଦାୟିତ୍ବ ନେବେ ବୈଜ୍ଞାନିକ ଭି. ନାରାୟଣନ
ଅର୍ଗସ ବ୍ୟୁରୋ : ଇସ୍ରୋର ପରବର୍ତ୍ତୀ ମୁଖ୍ୟଭାବେ ଦାୟିତ୍ବ ନେବେ ବୈଜ୍ଞାନିକ ଭି. ନାରାୟଣନ । ସେ ଜାନୁଆରୀ ୧୪ରୁ ଦାୟିତ୍ବ ନେବେ । ବୈଜ୍ଞାନିକ ଭି. ନାରାୟଣନ ଇସ୍ରୋର ଲିକୁଇଡ୍ ପ୍ରୋପଲସନ୍ ସିଷ୍ଟମସ ସେଣ୍ଟରର ଏବେ ନିର୍ଦ୍ଦେଶକ ରହିଛନ୍ତି । ନିଯୁକ୍ତି ସଂକ୍ରାନ୍ତୀୟ କ୍ୟାବିନେଟ୍ କମିଟି ତାଙ୍କ ନାମକୁ ଘୋଷଣା କରିଛି । ତାଙ୍କର କାର୍ଯ୍ୟକାଳ ଦୁଇବର୍ଷ ରହିବ । ଇସ୍ରୋ ମୁଖ୍ୟ ଏସ. ସୋମନାଥଙ୍କ ଅବସର ପରେ ସେ ଦାୟିତ୍ବ ନେବେ । ଏଥିସହ ସେ ଭାରତୀୟ ସ୍ପେସ୍ କମିଶନ ର ମଧ୍ୟ ଅଧ୍ୟକ୍ଷ ରହିବେ । ଭି. ନାରାୟଣନଙ୍କ ମହାକାଶ ବିଜ୍ଞାନ କ୍ଷେତ୍ରରେ ଦୀର୍ଘଦିନର ଅଭିଜ୍ଞତା ରହିଛି ।
ସ୍କୁଲ ଶିକ୍ଷା ଶେଷ ପରେ ସେ କ୍ରାଇୟୋଜେନିକ ଇଂଜିନିୟରିଂରେ ଏମ ଟେକ୍ କରିଥିଲେ । ଏହାପରେ ଆଇଆଇଟି ଖଡପୁରରୁ ଏରୋସ୍ପେସ୍ ଇଂଜିନିୟରିଂରେ ପିଏଚଡି ଡିଗ୍ରୀ ହାସଲ କରିଥିଲେ । ୨୦୨୨ ଜାନୁଆରୀ ୨୨ରେ ଏସ. ସୋମନାଥ ଇସ୍ରୋର ମୁଖ୍ୟଭାବେ ଦାୟିତ୍ବ ନେଇଥିଲେ। ତାଙ୍କରି ନେତୃତ୍ବରେ ଭାରତ ବିଶ୍ବର ପ୍ରଥମ ଦେଶ ଭାବେ ଚନ୍ଦ୍ରର ଦକ୍ଷିଣ ମେରୁରେ ରୋଭର ଓହ୍ଲାଇଥିଲା । ଆମେରିକା, ରୁଷିଆ, ଚୀନ ପରେ ଚତୁର୍ଥ ରାଷ୍ଟ୍ରଭାବେ ଚନ୍ଦ୍ରପୃଷ୍ଠରେ ସଫ୍ଟ ଲ୍ୟାଣ୍ଡିଂ କରି ମହାକାଶ ବିଜ୍ଞାନ କ୍ଷେତ୍ରରେ ମାଇଲଖୁଣ୍ଟ ରଚିଥିଲା ।
