Shocking Murder / ଛାତିଥରା ହତ୍ୟାକାଣ୍ଡ! ୩ ଝିଅଙ୍କ ସହ ପତ୍ନୀଙ୍କୁ ହତ୍ୟା କରି ଫେରାର ହୋଇଗଲେ ରାହୁଲ

ବୀଭତ୍ସ ହତ୍ୟାକାଣ୍ଡ। ଶୁଣିଲେ ଆପଣଙ୍କ ରୁମମୂଳ ଟାଙ୍କୁରି ଉଠିବ। ପିତା ନା ପିଶାଚ ଏକା ସାଙ୍ଗରେ ୪ଜଣଙ୍କୁ ହତ୍ୟା କରି ଫେରାର ହୋଇଯାଇଛି। ଗୋଟିଏ ପରିବାରର ୪ ଜଣଙ୍କ ମୃତଦେହ ଉଦ୍ଧାର । ତଳ ମହଲାରେ ତିନି ନାବାଳିକା ଝିଅ ଏବଂ ଉପର ମହଲାରୁ ମାଆଙ୍କ ମୃତଦେହ ଉଦ୍ଧାର ହୋଇଛି। ରାଜସ୍ଥାନର ରାଜଧାନୀ ଜୟପୁରର ସାମ୍ନାକୁ ଆସିଛି ଏଭଳି ଛାତିଥରା ଘଟଣା । ପରିବାରର ୪ ଜଣଙ୍କ ମୃତ୍ୟୁ ହୋଇଥିବାବେଳେ ପରିବାରର ମୁଖ୍ୟ ରାହୁଲ ଝା ଫେରାର ରହିଛନ୍ତି । ସେ ନିଜେ ଏହି ହତ୍ୟାକାଣ୍ଡ ଘଟାଇଥିବା କୁହାଯାଉଛି । ତେବେ ନିଜ ଝିଅ ଏବଂ ପତ୍ନୀଙ୍କ ହତ୍ୟା କାହିଁକି କଲେ ରାହୁଲ। ଏହାକୁ ନେଇ ଚର୍ଚ୍ଚା ଜୋର ଧରିଛି ।

ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଗୋବିନ୍ଦପୁରରେ ରହୁଥିବା ରାହୁଲ ଝା ନାମକ ବ୍ୟକ୍ତିଙ୍କ ପରିବାରରେ ଏଭଳି ଅଘଟଣ ଘଟିଛି । ଶୁକ୍ରବାର ସକାଳେ ଯେତେବେଳେ ପୋଲିସ ଘଟଣାସ୍ଥଳରେ ପହଞ୍ଚିଥିଲା, ସେତେବେଳେ ଘର ଭିତରର ଦୃଶ୍ୟ ଦେଖି ସମସ୍ତଙ୍କର ହୋସ୍ ଉଡ଼ିଯାଇଥିଲା । ଘରର ପ୍ରଥମ ମହଲାରେ ରାହୁଲଙ୍କ ପତ୍ନୀ ଗୀତା (୪୦)ଙ୍କ ମୃତଦେହ ପଡ଼ିଥିବାବେଳେ, ଗ୍ରାଉଣ୍ଡ ଫ୍ଲୋରରେ ତାଙ୍କର ତିନି ଝିଅ ନନ୍ଦିନୀ, ଗିରୀଶା ଏବଂ ରାଧିକାଙ୍କ ମୃତଦେହ ମିଳିଥିଲା । ଝିଅମାନଙ୍କ ବୟସ ପ୍ରାୟ ୧୭ ରୁ ୨୩ ବର୍ଷ ମଧ୍ୟରେ ବୋଲି ଜଣାପଡ଼ିଛି ।

ପ୍ରାଥମିକ ତଦନ୍ତରୁ ପୋଲିସ ସନ୍ଦେହ କରୁଛି ଯେ, ଅଭିଯୁକ୍ତ ରାହୁଲ ଝା ରାତିରେ ସମସ୍ତେ ଶୋଇଥିବା ସମୟରେ ଘର ନିର୍ମାଣ କାମରେ ବ୍ୟବହୃତ ହେଉଥିବା ଇଟା ସାହାଯ୍ୟରେ ଜଣଙ୍କ ପରେ ଜଣଙ୍କ ମୁଣ୍ଡରେ ଆକ୍ରମଣ କରିଥିଲା । ଆକ୍ରମଣଟି ଏତେ ଭୟଙ୍କର ଥିଲା ଯେ ଚାରି ଜଣଙ୍କର ଘଟଣାସ୍ଥଳରେ ପ୍ରାଣବାୟୁ ଉଡ଼ିଯାଇଥିଲା । ଘଟଣା ସମୟରେ ଘରେ ଅଭିଯୁକ୍ତ ରାହୁଲଙ୍କ ୮୫ ବର୍ଷୀୟ ବୃଦ୍ଧ ପିତା ମଧ୍ୟ ଉପସ୍ଥିତ ଥିଲେ । ଏତେ ବଡ଼ ଘଟଣା ପରେ ବୃଦ୍ଧ ପିତା ଜଣକ ଗଭୀର ମାନସିକ ଆଘାତ ମଧ୍ୟରେ ଅଛନ୍ତି । ପୋଲିସ ତାଙ୍କଠାରୁ ମଧ୍ୟ ଘଟଣା ସମ୍ପର୍କରେ ସୂଚନା ସଂଗ୍ରହ କରିବାକୁ ପ୍ରୟାସ କରୁଛି।

ପ୍ରାଥମିକ ତଦନ୍ତରୁ ଏହା ପରିବାର ଭିତରର କୌଣସି ଘରୋଇ ବିବାଦ କିମ୍ବା କଳହକୁ ନେଇ ହୋଇଥିବା ପୋଲିସ ଅନୁମାନ କରୁଛି । ତେବେ ହତ୍ୟାର ପ୍ରକୃତ କାରଣ କ'ଣ, ସେନେଇ ଏଯାଏଁ ସ୍ପଷ୍ଟ ହୋଇନାହିଁ । ପତ୍ନୀ ପୁଅ ଦେଇପାରି ନଥିବାରୁ ଏଭଳି ହତ୍ୟାକାଣ୍ଡ ଭିଆଇଛନ୍ତି ବୋଲି ସନ୍ଦେହ କରାଯାଉଛି। ଘଟଣା ପରେ ମୁଖ୍ୟ ଅଭିଯୁକ୍ତ ରାହୁଲ ଝା ଘରୁ ଫେରାର୍ ହୋଇଯାଇଛି । ପୋଲିସ ତାଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି ଏବଂ ସହରରେ ନାକାବନ୍ଦୀ କରାଯାଇଛି । ଅଭିଯୁକ୍ତର ଗିରଫଦାରୀ ପରେ ହିଁ ଏହି ହତ୍ୟାକାଣ୍ଡର ପ୍ରକୃତ ରହସ୍ୟ ପଦ୍ଦାଫାଶ୍ ହେବ ବୋଲି ପୋଲିସ ପକ୍ଷରୁ କୁହାଯାଇଛି ।