ଅର୍ଗସ ବ୍ୟରୋ :  ଛାଡିଲେ ଦୀର୍ଘ ୧୪ ବର୍ଷର କର୍ପୋରେଟ ଚାକିରି । ଏବେ ଅଟୋ ଚାଳକ ଭାବେ ଆରମ୍ଭ କରିଛନ୍ତି ନିଜର ନୂଆ ବିଜନେସ । ଯାହା ସେ ନିଜ ଲିଙ୍କଡେନ ପ୍ରୋଫାଇଲରେ ଶେୟାର କରିଛନ୍ତି । କମଲେଶ କାମଟେକର ।

ମୁମ୍ବାଇର ଏକ କମ୍ପାନୀରେ ଗ୍ରାଫିକ ଡିଜାଇନର ଭାବେ ୧୪ ବର୍ଷ ହେବ କାମ କରୁଥିଲେ । ଦୀର୍ଘ ୧୪ ବର୍ଷ ପରେ ତାଙ୍କୁ ଆସିଷ୍ଟାଣ୍ଟ କ୍ରିଏଟିଭ ମ୍ୟାନେଜର ଭାବେ ପ୍ରମୋସନ ମଧ୍ୟ ମିଳିଥିଲା । ଯାହାକୁ ନେଇ ସେ ଖୁବ ଖୁସି ଥିଲେ । ହେଲେ ସେହି ପୋଷ୍ଟରେ ସୁରକ୍ଷିତ ଭାବେ ରହିବା ପାଇଁ ତାଙ୍କୁ ଅନେକ ସଂଘର୍ଷ କରିବାକୁ ପଡିଲା । ଉପଯୁକ୍ତ ଦରମାକୁ ନେଇ ଅଫିସର ଏଚଆର(HR)ଙ୍କ ସହ ଅନେକ ବିବାଦ ମଧ୍ୟ ହୋଇଥିଲା । ପରେ ସେ ସେହି କମ୍ପାନୀରୁ ରିଜାଇନ ଦେଇଥିଲେ । ହେଲେ ଏହାପରେ ଲଗାତାର ଭାବେ ଅନ୍ୟ କମ୍ପାନୀଗୁଡିକୁ ନିଜର ରିଜ୍ୟୁମ ପଠାଇଥିଲେ । ନିଜର ଅନେକ ବନ୍ଧୁଙ୍କ ପାଖକୁ ରେଫରେନ୍ସ ପାଇଁ ମଧ୍ୟ ଯାଇଥିଲେ । ହେଲେ ସବୁ ସ୍ଥାନରେ ତାଙ୍କୁ ରିଜେକ୍ଟ କରାଯାଇଥିଲା । ଲିଙ୍କଡେନରେ ମଧ୍ୟ ଅନେକ ଥର ସେନିଜର ପ୍ରୋଫାଇଲ ଶେୟାର କରିଥିଲେ, ହେଲେ କୌଣସି ଅଫର ତାଙ୍କ ପାଖକୁ ଆସିନଥିଲା ।

କମଲେଶଙ୍କ ଚାକିରି ଖୋଜିବାର ଯେଉଁ ମୁଖ୍ୟ ପ୍ରତିବନ୍ଧକ ଥିଲା, ତାହା ଥିଲା ଉଯୁକ୍ତ ଦରମା । ଅନେକ ସ୍ଥାନରେ ଚାକିରି ମିଳୁଥିଲେ ମଧ୍ୟ ତାଙ୍କ ଯୋଗ୍ୟତା ହିସାବରେ ତାଙ୍କୁ ଦରମା ଦେବାକୁ ସେହି କମ୍ପାନୀ ଗୁଡିକ ସକ୍ଷମ ନଥିଲେ । ସେହି କାରଣରୁ ସେ କର୍ପୋରଟ ଚାକିରିକୁ ନର୍କ ବୋଲି କହିଥିଲେ । ହେଲେ ଏହାପରେ ମଧ୍ୟ ସେ ହାର ମାନିନଥିଲେ । କମଲେଶ ଚିନ୍ତା କରିଥିଲେ ନିଜର ଏକ ବିଜନେସ କରିବେ, ଯେଉଁଥିରେ ସେ ନିଜେ ନିଜ ପରିଶ୍ରମରୁ ଇନକମ କରିପାରିବେ । ଏହାପରେ ସେ ଅଟୋ ଚଲାଇବା ପାଇଁ ନିଷ୍ପତ୍ତି ନେଇଥିଲେ । ନିଜର ସମସ୍ତ ଗ୍ରାଫିକ ଡିଜାଇନିଂ କାମକୁ ଛାଡି ଅଟୋ ଚାଳକ ଭାବେ ନିଜର ବିଜନେସ ଆରମ୍ଭ କରିଛନ୍ତି କମଲେଶ । ଏହି ନୂଆ ବିଜନେସ ପାଇଁ ସମସ୍ତଙ୍କ ଆଶୀର୍ବାଦ ନିହାତି ଦରକାର ବୋଲି ଲେଖ ସେ ନିଜ ଲିଙ୍କଡେନ ପ୍ରୋଫାଇଲରେ ଶେୟାର କରିଛନ୍ତି ।

କମଲେଶଙ୍କ ଏହି ନିଷ୍ପତ୍ତିକୁ ଅନେକ ୟୁଜର୍ସ ପ୍ରଶଂସା କରିଥିବା ବେଳେ ଅନେକ ଜଣ ଦୁଃଖ ମଧ୍ୟ ପ୍ରକାଶ କରିଛନ୍ତି । ଅନେକ ୟୁଜର୍ସ ତାଙ୍କ ପୋଷ୍ଟରେ ନିଜ ନିଜର କର୍ପୋରେଟ ଅଫିସକୁ ନେଇ ଥିବା ଅସନ୍ତୋଷ ଭାବ ପ୍ରକାଶ କରିଛନ୍ତି । ଜଣେ ଲେଖିଛନ୍ତି, କର୍ପୋରେଟ ଅଫିସର ଏପରି ନିଯୁକ୍ତି ପ୍ରକ୍ରିୟା ଯୋଗୁ ଅନେକ ଭଲ ଯୋଗ୍ୟତା ଥିବା ଲୋକ ନିଜର ଚାକିରି ହରାଉଛନ୍ତି । ସେହିପରି ଆଉ ଜଣେ ଲେଖିଛନ୍ତି, କମଲେଶଙ୍କ ଏହି କାହାଣୀ ଅନେକ ଜଣଙ୍କୁ ନିଜର ବିଜନେସ ଆରମ୍ଭ କରିବା ପାଇଁ ପ୍ରେରଣା ଯୋଗାଇବ । ପ୍ରକୃତରେ କମଲେଶଙ୍କ ଏହି କାହାଣୀ ଅନେକଙ୍କ ପାଇଁ ଆତ୍ମବିଶ୍ବାସ ବଢାଇବା ସହ ଅନେକଙ୍କୁ କିଛି ନୂଆ କରିବାର ପ୍ରେରଣା ଯୋଗାଇବ ।