800 Feet Gorge Fall / କେରଳରେ ଭୟଙ୍କର ଦୁର୍ଘଟଣା… ୮୦୦ ଫୁଟ୍ ଖାଇକୁ ଖସିପଡ଼ିଲେ ଡାକ୍ତର

କେରଳର ପ୍ରସିଦ୍ଧ ପର୍ଯ୍ୟଟନସ୍ଥଳୀ ଭାଗାମୋନ୍‌ରେ ଘଟିଛି ଏକ ଭୟାବହ ଦୁର୍ଘଟଣା। ପ୍ରାକୃତିକ ଇନଫିନିଟି ପୁଲ୍‌ ନିକଟରେ ବୁଲୁଥିବା ବେଳେ ପ୍ରାୟ ୮୦୦ ଫୁଟ ଗଭୀର ଖାଇକୁ ଖସିପଡ଼ିଛନ୍ତି ଉତ୍ତରପ୍ରଦେଶର ଜଣେ ୨୮ ବର୍ଷୀୟ ପର୍ଯ୍ୟଟକ। ତାଙ୍କ ଗୋଡ଼ରେ ଗୁରୁତର ଆଘାତ ଲାଗିବା ସହ ହାଡ଼ ଭାଙ୍ଗିଯାଇଥିବାରୁ ସେ ଚାଲିବାକୁ ଅକ୍ଷମ ହୋଇପଡ଼ିଥିଲେ। ତେବେ ଦୁର୍ଗମ ପାହାଡ଼ିଆ ଅଞ୍ଚଳରେ ଦୀର୍ଘ ସମୟ ଧରି ଉଦ୍ଧାର ଅଭିଯାନ ଚଳାଇ ଅଗ୍ନିଶମ ଓ ଉଦ୍ଧାରକାରୀ ଦଳ ତାଙ୍କୁ ସୁରକ୍ଷିତ ଭାବେ ଉଦ୍ଧାର କରିଛନ୍ତି। ପରେ ତାଙ୍କୁ ଚିକିତ୍ସା ପାଇଁ ଡାକ୍ତରଖାନା ନିଆଯାଇଛି।

ଘଟଣାଟି ଏକ 'ପ୍ରାକୃତିକ ଇନଫିନିଟି ପୁଲ୍' (natural infinity pool) ନିକଟରେ ଘଟିଥିଲା, ଯେଉଁଠାରେ ପାହାଡ଼ିଆ ରାସ୍ତାରେ ଚାଲିବା ସମୟରେ ହଠାତ ତାଙ୍କ ଗୋଡ଼ ଖସିଯାଇଥିଲା। ଗୁରୁତର ଆହତ ହେବା କାରଣରୁ ସେ ଚାଲିବାକୁ ଅକ୍ଷମ ହୋଇପଡ଼ିଥିଲେ। ଖବର ପାଇ ଅଗ୍ନିଶମ ଓ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରିଥିଲେ।

ଆହତ ପର୍ଯ୍ୟଟକ ହେଲେ ଉତ୍ତର ପ୍ରଦେଶ ନିବାସୀ ୨୮ ବର୍ଷୀୟ ସୁଖିୟା ଜୈନ। ପେଶାରେ ସେ ଜଣେ ଡାକ୍ତର। ସୁଖିୟା କେରଳ ଭ୍ରମଣରେ ଆସିଥିଲେ। ସୋମବାର ଦିନ ସେ ବାଗାମୋନ୍‌ଠାରୁ ପ୍ରାୟ ଦୁଇ କିଲୋମିଟର ଦୂରରେ ଥିବା 'ପ୍ରାକୃତିକ ଇନଫିନିଟି ପୁଲ୍' ନିକଟରେ ପହଞ୍ଚିଥିଲେ। ସେଠାରେ ଏକ ପାହାଡ଼ିଆ ରାସ୍ତା ଦେଇ ଯାଉଥିବାବେଳେ ହଠାତ ଭାରସାମ୍ୟ ହରାଇଥିଲେ।

ପ୍ରାଥମିକ ରିପୋର୍ଟ ଅନୁଯାୟୀ, ସୁଖିୟା ଜୈନ ପୁଲ୍ ନିକଟସ୍ଥ ଏକ ପାହାଡ଼ିଆ ପଥରେ ଚାଲୁଥିବା ବେଳେ ଖସି ପଡ଼ିଥିଲେ ଏବଂ ପ୍ରାୟ ୮୦୦ ଫୁଟ ତଳକୁ ଏକ ଖାଲୁଆ ସ୍ଥାନକୁ ଖସି ଯାଇଥିଲେ। ତାଙ୍କ ଗୋଡ଼ରେ ହାଡ଼ ଭାଙ୍ଗି ଯାଇଥିବାରୁ ସେ ଗୁରୁତର ଅଛନ୍ତି। ସେହି ଅଞ୍ଚଳଟି ଅତ୍ୟନ୍ତ ଦୁର୍ଗମ ଓ ପାହାଡ଼ିଆ ହୋଇଥିବାରୁ, ତାଙ୍କ ପକ୍ଷେ ନିଜେ ଉପରକୁ ଉଠି ଆସିବା ଅସମ୍ଭବ ଥିଲା।

ଘଟଣା ସମ୍ପର୍କରେ ସୂଚନା ପାଇବା ପରେ ଅଗ୍ନିଶମ ଓ ଉଦ୍ଧାରକାରୀ ସେବା ଦଳ ଘଟଣାସ୍ଥଳରେ ପହଞ୍ଚିଥିଲେ। ଜଙ୍ଗଲିଆ ରାସ୍ତା ହୋଇଥିବାରୁ ତାଙ୍କୁ ଉଦ୍ଧାର କରିବାକୁ ସମୟ ଲାଗିଥିଲା। ଜଣେ ଅଗ୍ନିଶମ ଓ ଉଦ୍ଧାରକାରୀ ଅଧିକାରୀଙ୍କ ସୂଚନା ଅନୁଯାୟୀ, ଯୁବକ ଜଣକଙ୍କ ଗୋଡ଼ ଖସିଯିବା ଫଳରେ ହାଡ଼ ଭାଙ୍ଗି ଯାଇଥିଲା। ଆଘାତ ଯୋଗୁଁ ସେ ଚାଲିବାକୁ ଅକ୍ଷମ ଥିବାରୁ, ଉଦ୍ଧାରକାରୀ ଦଳ ତାଙ୍କୁ ସୁରକ୍ଷିତ ଭାବେ ତଳୁ ଉପରକୁ ଆଣିଥିଲେ। ପରେ ଆମ୍ବୁଲାନ୍ସ ସହାୟତାରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କର ଚିକିତ୍ସା କରାଯାଇଥିଲା। ସମୟରେ ସୂଚନା ମିଳିଥିବାରୁ ତାଙ୍କ ଜୀବନ ବଞ୍ଚିଗଲା।

ବାଗାମୋନ କେରଳର ଅତି ଲୋକପ୍ରିୟ ପର୍ଯ୍ୟଟନସ୍ଥଳୀ। ଏଠାକାର ପ୍ରାକୃତିକ ସୌନ୍ଦର୍ଯ୍ୟ ଉପଭୋଗ କରିବାକୁ ବହୁ ପର୍ଯ୍ୟଟକ ଏଠାକୁ ବୁଲିବାକୁ ଆସିଥାଆନ୍ତି। କିନ୍ତୁ ଏଠାକାର ଦୁର୍ଗମ ପାହାଡ଼ିଆ ଅଞ୍ଚଳରେ ଟିକେ ବି ଅସାବଧାନତା ବଡ଼ ଦୁର୍ଘଟଣାର କାରଣ ହୋଇପାରେ। ଏତେ ଲୋକ ଆସୁଥିବାରୁ ପ୍ରଶାସନ ଏହି ସ୍ଥାନରେ କଡ଼ା କଟକଣା କରିବା ଦରକାର।