ଆରସିବିର ବିଜୟ ସେଲିବ୍ରେସନରେ ହୋଇଥିବା ଦଳାଚକଟା ଘଟଣାରେ ଇସ୍ତଫା ଦେଲେ କର୍ଣ୍ଣାଟକ ରାଜ୍ୟ କ୍ରିକେଟ୍ ସଂଘ (KSCA) ସମ୍ପାଦକ ଏ ଶଙ୍କର ଏବଂ କୋଷାଧ୍ୟକ୍ଷ ଇ ଜୟରାମ। ଉଭୟ ଆଜି ଇସ୍ତଫା ଦେଇଥିବା ନେଇ ସୂଚନା ଦେଇଛନ୍ତି। ନୈତିକତା ଦୃଷ୍ଟିରୁ ସେମାନେ ଇସ୍ତଫା ଦେଇଥିବା ବିଜ୍ଞପ୍ତିରେ ଜଣାଇଛନ୍ତି। ଗତକାଲି ସେମାନେ KSCA ସଭାପତିଙ୍କ ନିକଟକୁ ସେମାନଙ୍କର ଇସ୍ତଫାପତ୍ର ପଠାଇଛନ୍ତି।

ପ୍ରେସ୍ ବିଜ୍ଞପ୍ତିରେ କୁହାଯାଇଛି, "ଗତ ଦୁଇ ଦିନ ମଧ୍ୟରେ ଘଟିଥିବା ଦୁର୍ଭାଗ୍ୟଜନକ ଘଟଣାରେ ଆମର ସିଧାସଳଖ ସମ୍ପୃକ୍ତି ନଥିଲେ ମଧ୍ୟ ନୈତିକତା ଦୃଷ୍ଟିରୁ ଗତକାଲି ରାତିରେ ଆମେ କର୍ଣ୍ଣାଟକ ରାଜ୍ୟ କ୍ରିକେଟ୍ ସଂଘର ସଭାପତିଙ୍କୁ ଏକ ଚିଠି ମାଧ୍ୟମରେ କର୍ଣ୍ଣାଟକ ରାଜ୍ୟ କ୍ରିକେଟ୍ ସଂଘର ସମ୍ପାଦକ ଏବଂ କୋଷାଧ୍ୟକ୍ଷ ପଦରୁ ଇସ୍ତଫା ଦେଇଛୁ।"

ଜୁନ୍ ୪ରେ ଚିନ୍ନାସ୍ୱାମୀ ଷ୍ଟାଡିୟମରେ ଦଳାଚକଟାରେ ୧୧ ଜଣଙ୍କର ମୃତ୍ୟୁ ହୋଇଛି। ଘଟଣାକୁ ନେଇ କର୍ଣ୍ଣାଟକ ସରକାର ପ୍ରଥମେ ଉଚ୍ଚ ପୋଲିସ ଅଧିକାରୀମାନଙ୍କୁ ନିଲମ୍ବିତ କରିଥିଲେ। ଘଟଣାରେ ଯିଏ ଦୋଷୀ ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଥିଲେ।

କ୍ୟୁବନ ପାର୍କ ପୋଲିସ ଦ୍ୱାରା ଦାୟର କରାଯାଇଥିବା ଏଫଆଇଆରରେ ଅଭିଯୋଗରେ ଆରସିବି ଏବଂ ଡିଏନଏ ଏଣ୍ଟରଟେନମେଣ୍ଟର ଚାରି ଜଣ ଅଧିକାରୀଙ୍କ ନାମ ରହିଛି। ସେମାନଙ୍କ ଉଦାସୀନତା ଓ ଅବହେଳା ପାଇଁ ଅଘଟଣ ଘଟିଥିବା ଅଭିଯୋଗରେ ଉଲ୍ଲେଖ କରାଯାଇଛି। ବେଙ୍ଗାଲୁରୁର ଏକ ସେସନ୍ସ କୋର୍ଟ ଶୁକ୍ରବାର ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି)ର ଅଧିକାରୀ ନିଖିଲ ସୋସାଲେଙ୍କ ସମେତ ଚାରି ଜଣଙ୍କୁ ୧୪ ଦିନିଆ ପୋଲିସ ହେପାଜତକୁ ପଠାଇଛି।କ୍ୟୁବନ ପାର୍କ ପୋଲିସ ଏବଂ କେନ୍ଦ୍ରୀୟ ଅପରାଧ ଶାଖା (ସିସିବି) ଶୁକ୍ରବାର ଭୋର ସମୟରେ କେମ୍ପେଗୌଡା ଅନ୍ତର୍ଜାତୀୟ ବିମାନବନ୍ଦରରୁ ସେମାନଙ୍କୁ ଗିରଫ କରିଥିଲା।

ସଭାପତି ରଘୁ ରାମ ଭଟ୍ଟ, ଶଙ୍କର ଏବଂ ଜୟରାମଙ୍କ ସମେତ କ୍ରିକେଟ ଆସୋସିଏସନର ଅଧିକାରୀମାନେ ଶୁକ୍ରବାର କର୍ଣ୍ଣାଟକ ହାଇକୋର୍ଟରୁ ମଧ୍ୟବର୍ତ୍ତୀକାଳୀନ ଆଶ୍ୱସ୍ତି ପାଇଛନ୍ତି। ଦଳାଚକଟା ନେଇ ଦାୟର ହୋଇଥିବା ଏଫଆଇଆରକୁ ରଦ୍ଦ କରିବା ପାଇଁ କେଏସସିଏ ଅଧିକାରୀମାନେ କୋର୍ଟକୁ ଆବେଦନ କରିଥିଲେ। ପୋଲିସକୁ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଆବେଦନକାରୀଙ୍କ ବିରୁଦ୍ଧରେ କୌଣସି ଦଣ୍ଡାତ୍ମକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କୋର୍ଟ ପୋଲିସକୁ ନିର୍ଦ୍ଦେଶ ଦେଇଛନ୍ତି। ହାଇକୋର୍ଟ ମାମଲାର ପରବର୍ତ୍ତୀ ଶୁଣାଣି ଜୁନ୍ ୯ ରେ କରିବାକୁ ଧାର୍ଯ୍ୟ କରିଛନ୍ତି।

Argus News | argus news | -Argusnews Home: Odisha Latest News, Breaking News, Trending News, Live TV and more