ଫାସୀ ବଦଳରେ ବିଷ ଇଞ୍ଜେକ୍ସନକୁ ନା କହିଲେ କେନ୍ଦ୍ର ସରକାର । ଅସନ୍ତୋଷ ଜାହିର କଲେ ସୁପ୍ରିମକୋର୍ଟ । ଦେଶରେ ଗୁରୁତର ଅପରାଧୀଙ୍କୁ ଫାଶୀ ଦେବା ବଦଳରେ ବିଷ ଇଞ୍ଜେକ୍ସନ ବ୍ୟବହାର କରିବା ପାଇଁ ଏକ ଆବେଦନ କରାଯାଇଥିଲା । ଏହାର ଶୁଣାଣି କରି ସୁପ୍ରିମକୋର୍ଟ କହିଥିଲେ କେନ୍ଦ୍ର ସରକାର ସମୟ ଅନୁସାରେ ପରିବର୍ତ୍ତନ ହେବାକୁ ଚାହୁଁ ନାହାନ୍ତି। ଫାଶୀ ବ୍ୟବସ୍ଥା ବହୁ ପୁରାତନ । ହେଲେ କେନ୍ଦ୍ର ସରକାର ଏହି ପ୍ରଥାକୁ ପରିବର୍ତ୍ତନ କରିବାକୁ ଇଚ୍ଛୁକ ନୁହନ୍ତି ବୋଲି ସୁପ୍ରିମକୋର୍ଟ ସିଧା ସିଧା କହିଥିଲେ ।

କେନ୍ଦ୍ର ସରକାରଙ୍କ ଏଭଳି ଚିନ୍ତାଧାରାକୁ ନେଇ ଏହି ମାମଲାରୁ ଶୁଣାଣି କରୁଥିବା ବିଚାରପତି ବିକ୍ରମ ନାଥ ଏବଂ ସନ୍ଦୀପ ମେହେଟ୍ଟାଙ୍କ ଖଣ୍ଡପୀଠ ମୌଖିକ ଭାବରେ କହିଛନ୍ତି ଯେ ସରକାର ନିଜେ ଏହି ପୁରାତନ ପ୍ରଥାକୁ ପରିବର୍ତ୍ତନ କରିବାକୁ ଇଚ୍ଛୁକ ନାହାନ୍ତି । ଏହା ଏକ ବହୁତ ପୁରୁଣା ପ୍ରଥା, ଏବଂ ସମୟ ସହିତ ଜିନିଷଗୁଡ଼ିକ ପରିବର୍ତ୍ତନ ହୋଇଥାଏ। କିନ୍ତୁ ସରକାର ଏହାକୁ ଗ୍ରହଣ କରିବାକୁ ନାରାଜ ।

ବୁଧବାର, ଏକ ଜନସ୍ୱାର୍ଥ ମାମଲାର ଶୁଣାଣି ସମୟରେ ସୁପ୍ରିମକୋର୍ଟ ଏଭଳି କହିଛନ୍ତି । ପୁରୁଣା ପ୍ରଥାକୁ ନବଦଳାଇବାକୁ ନେଇ କେନ୍ଦ୍ର ସରକାରଙ୍କ ଯୁକ୍ତିକୁ ମଧ୍ୟ କଡ଼ା ସମାଲୋଚନା କରିଛନ୍ତି । ଶୁଣାଣି ସମୟରେ, ଏହା ପରାମର୍ଶ ଦିଆଯାଇଥିଲା ଯେ ଦୋଷୀଙ୍କୁ ଫାଶୀ ଏବଂ ଘାତକ ଇଞ୍ଜେକ୍ସନ ମଧ୍ୟରୁ ଗୋଟିଏ ବାଛିବାର ବିକଳ୍ପ ଦିଆଯାଇପାରିବ।

କେନ୍ଦ୍ର ସରକାରଙ୍କ ସତ୍ୟପାଠରେ କୁହାଯାଇଛି ଯେ ଏହା ବାସ୍ତବରେ ଅସମ୍ଭବ। ଏନେଇ କୋର୍ଟ ଅସନ୍ତୋଷ ପ୍ରକାଶ କରି କହିଛନ୍ତି ଯେ କେନ୍ଦ୍ର ସରକାର ସମୟ ସହିତ ନିଜ ଚିନ୍ତାଧାରା ବିକଶିତ କରିବାକୁ ଚାହୁଁନଥିବା ବାରି ହୋଇପଡ଼ୁଛି । କେନ୍ଦ୍ର ସରକାରଙ୍କ ପ୍ରତିନିଧିତ୍ୱ କରୁଥିବା ବରିଷ୍ଠ ଆଇଜୀବୀ ସୋନିଆ ମାଥୁର ଯୁକ୍ତି ଦେଇଥିଲେ ଯେ ଏହି ମାମଲା ଏକ ନୀତିଗତ ନିଷ୍ପତ୍ତି ସହିତ ଜଡ଼ିତ। ମାମଲାର ପରବର୍ତ୍ତୀ ଶୁଣାଣି ନଭେମ୍ବର ୧୧ରେ ହେବ।

ପିଟିସନରେ ଫାଶୀ ଦ୍ୱାରା ମୃତ୍ୟୁଦଣ୍ଡର ବ୍ୟବସ୍ଥା କରୁଥିବା ଫୌଜଦାରୀ କାର୍ଯ୍ୟବିଧି ସଂହିତା (CrPC)ର ଧାରା 354(5)କୁ ଅସାମ୍ବିଧାନିକ ଘୋଷଣା କରିବାକୁ ଆବେଦନ କରାଯାଇଛି। ପିଟିସନରେ ଏହା ମଧ୍ୟ କୁହାଯାଇଛି ଯେ ସମ୍ବିଧାନର ଧାରା ୨୧ ଅନୁଯାୟୀ ଏକ ମର୍ଯ୍ୟାଦାଜନକ ମୃତ୍ୟୁର ଅଧିକାରକୁ ଏକ ମୌଳିକ ଅଧିକାର ଭାବରେ ସ୍ୱୀକୃତି ଦିଆଯିବା ଉଚିତ।

ଆବେଦନକାରୀଙ୍କ ଅନୁଯାୟୀ, ଫାଶୀ ଦଣ୍ଡରେ ମୃତ୍ୟୁ ଘୋଷଣା ପାଇଁ ପ୍ରାୟ ୪୦ ମିନିଟ୍ ସମୟ ଲାଗେ । ଯେତେବେଳେ କି ଗୁଳି କିମ୍ବା ବିଷ ଇଞ୍ଜେକ୍ସନ ମାଧ୍ୟମରେ ମୃତ୍ୟୁ ମାତ୍ର ପାଞ୍ଚ ମିନିଟ୍‌ରେ ହୋଇଥାଏ । ଆବେଦନରେ ଜାତିସଂଘର ଏକ ପ୍ରସ୍ତାବ ମଧ୍ୟ ଉଲ୍ଲେଖ କରାଯାଇଛି ଯେ ଯେଉଁଠାରେ ମୃତ୍ୟୁଦଣ୍ଡ ଲାଗୁ କରାଯାଏ, ତାହା ଯଥାସମ୍ଭବ କମ୍ ଯନ୍ତ୍ରଣାଦାୟକ ଉପାୟରେ କରାଯିବା ଉଚିତ।