ଅର୍ଗସ ବ୍ୟୁରୋ: ସହଜ ନଥିଲା ଯାତ୍ରା । କେତେବେଳେ ବାପା ମା ତ କେତେବେଳେ ଘର ପରିବାର ଚିନ୍ତା । ଘରର ଆଶାବାଡି ଥିଲେ । ପରିବାର ପାଇଁ ଅଧାରୁ ପାଠ ଛାଡିଥିଲେ । ସ୍କୁଲ ନ ଯାଇ କ୍ଷେତରେ କାମ କରୁଥିଲେ । ସେ ଦିନ ମନେ ପଡିଲେ ଆଜି ବି ଭାଇ ଭଉଣୀଙ୍କ ଆଖିରେ ଲୁହ ଜକେଇ ଆସୁଛି । ସେ କଷ୍ଟର ଦିନ ସେ ଗରିବିର ଦିନ ଆଜି ବି ଆଖି ଆଗରେ ନାଚି ଉଠେ।

ତାରିଖ ଡିସେମ୍ବର 10 । ରବିବାର ଅପରାହ୍ନ ପ୍ରାୟ 3 ଟା ହେବ । ବିଜେପି ବିଧାୟକ ଦଳ ବୈଠକରେ ବିଷ୍ଣଦେଓଙ୍କ ନାଁରେ ମୋହର ବାଜେ । ଘୋଷଣା ହୁଏ ବିଷ୍ଣୁଦେଓ ସାଏ ହେବେ ଛତିଶଗଡର ପରବର୍ତ୍ତୀ ମୁଖ୍ୟମନ୍ତ୍ରୀ ।

ନାଚି ଉଠନ୍ତି ନେତା କର୍ମୀଠୁ ଆରମ୍ଭ କରି ପରିବାର ଲୋକେ । ଚାରିଆଡେ ହୁରି ପଡିଯାଏ ।

ଘରେ ପୂଜାର୍ଚ୍ଚନା ଆରମ୍ଭ ହୁଏ । ମା, ଭାଇ ଖୁସିରେ ମିଠା ବାଣ୍ଟନ୍ତି । ଚାରିଆଡୁ ଛୁଟେ ଶୁଭେଚ୍ଛାର ସୁଅ ।

ହଁ ଇଏ ସେହି ବିଷ୍ଣୁ ଯିଏ ଦିନେ ଘର ସମ୍ଭାଳିବାକୁ ପାଠ ପଢା ଛାଡିଦେଇଥିଲେ । କ୍ଷେତରେ କାମ କରୁଥିଲେ ।

୧୯୬୪ ଫେବ୍ରୁଆରୀ ୨୧ରେ ଯାସପୁର ଜିଲ୍ଲାର ଏକ ଆଦିବାସୀ ପରିବାରରେ ଜନ୍ମ ହୋଇଥିଲେ ବିଷ୍ଣୁଦେବ । ଯେତେବେଳେ ବାପା ବଞ୍ଚିଥିଲେ ସବୁ ଠିକ୍ ଥିଲା । ପ୍ରାଇମେରୀ ପାଠ ପଢା ଭଲରେ ଭଲରେ ହେଇଗଲା । ହେଲେ ହଠାତ୍ ବାପାଙ୍କ ନିଧନ ସବୁ କିଛି ଓଲଟପାଲଟ କରିଦେଲା । ଘର ସମ୍ଭାଳିବାକୁ କଲେଜରୁ ଅଧାରୁ ପାଠ ଛାଡିଲେ । କ୍ଷେତରେ କାମ କଲେ । ତା ପରେ ଜୀବନରେ କିଛି କରି ଦେଖାଇବାର ଇଚ୍ଛା ଯୋଗୁଁ ରାଜନୀତିକୁ ଏଣ୍ଟ୍ରି କରନ୍ତି ବିଷ୍ଣୁ ।

ସରପଞ୍ଚରୁ ରାଜନୈତିକ କ୍ୟାରିଅର ଆରମ୍ଭ ହୁଏ । ଗୁରୁତ୍ୱପୂର୍ଣ୍ଣ ସାଂଗଠନିକ ଭୂମିକା ପାଇବା ସହିତ କେନ୍ଦ୍ରମନ୍ତ୍ରୀ ଓ ଏକାଧିକ ଥର ଲୋକସଭା ସାଂସଦ ହୋଇଥିଲେ। ତାଙ୍କ ଉପରେ ଲୋକଙ୍କ ଭରସା ଅଛି । ବିଶ୍ୱାସ ଅଛି । ଆଉ ଭଗବାନଙ୍କ ଆଶୀର୍ବାଦ ବି ଅଛି ।

ସେ ଘରେ ଯେମିତି ବାହାରେ ମଧ୍ୟ ଠିକ୍ ସେମିତି । ଛୋଟ ଛୁଆ ହୁଅନ୍ତୁ କି ବଡ ଲୋକ ସମସ୍ତଙ୍କର କେୟାର କରନ୍ତି । ଘରର କେହି ଜମେ ବଡ କାମ କରୁ । ଭଲ ପୋଷ୍ଟରେ ରହୁ । ଏହା ପ୍ରାୟ ସବୁ ପରିବାରର ଇଚ୍ଛା ଥାଏ । ଆଉ ସେ ଇଛା ଆଜି ପୁରା ହୋଇଛି ବୋଲି କହିଛନ୍ତି ତାଙ୍କ ଧର୍ମପତ୍ନୀ । ତାଙ୍କର ବ୍ୟକ୍ତିତ୍ୱ ଏମିତି ଯେ ପୁରା ଗାଁ ତାଙ୍କ ପାଇଁ ପୂଜା କରୁଥିଲା । ସବୁ ଚାହୁଁଥିଲେ ସେ ଯେମିତି ଘରର ମୁଖିଆ ସେମିତି ରାଜ୍ୟର ବି ମୁଖିଆ ବନନ୍ତୁ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV