ରୋଷେଇ ଘରେ ପଶିଲା ସିଂହ, ଭୟରେ ବାହାରକୁ ଦୌଡିଲେ ଘର ଲୋକେ
ରାତି ଅଧରେ ଘର ଭିତରେ ପଶିଲା ସିଂହ । ଛାନିଆ ହୋଇ ବାହାରକୁ ଦୌଡିଲେ ଘର ଲୋକେ । ଏପରି କିଛି ଘଟଣା ଦେଖିବାକୁ ମିଳିଛି ଗୁଜୁରାଟର ଆମ୍ରେଲି ଜିଲ୍ଲା ମୁଲ୍ଲୁଭାଇ ରାମଭାଇ ଲଖାନ୍ନୋତ୍ରାଙ୍କ ଘରେ । ରାତିରେ ପ୍ରାୟ ପରିବାରର ସମସ୍ତ ଲୋକେ ଶୋଇଥିଲେ । ଏହି ସମୟରେ ଠିକ ମଧ୍ୟରାତ୍ରୀରେ ଜଣଙ୍କର ନିଦ ଭାଙ୍ଗି ଯାଇଥିଲା । ଆଉ ଏହି ସମୟରେ ସେ ଘରର ଅଧକାନ୍ଥ ପଟେ କିଛି ଦେଖିବାକୁ ପାଇଥିଲେ । ଆଉ ଭଲ କରି ଦେଖିବାରୁ ଜାଣି ପାରିଥିଲେ, ସିଂହଟେ ଘର ଭିତରକୁ ମୁଣ୍ଡ କାଢିଛି ।
ଘରର ଛାତ ଉପର କବାଟ ଖୋଲା ଥିବାରୁ ସେହି ବାଟ ଦେଇ ଘରର ରୋଷେଇ ଘରକୁ ପଶିଥିଲା ସିଂହ । ତେବେ ସିଂହକୁ ଦେଖିବା ପରେ ପରିବାର ଲୋକେ ଭୟରେ ଦୌଡାଦୌଡି ହୋଇ ବାହାରକୁ ଚାଲିଯାଇଥିଲେ । ପରେ ଗାଁ ଲୋକଙ୍କୁ ଡାକିଥିଲେ । ହେଲେ ସିଂହ ସେଠାରେ ପାଖାପାଖି ୨ ଘଣ୍ଟା ଯାଏଁ ବସି ରହିଥିଲା । ଗାଁ ଲୋକେ ଲାଇଟ ଲଗାଇ ବାଣ ଫୁଟାଇ ସିଂହକୁ ତଡିବାକୁ ଚେଷ୍ଟା କରିଥିଲେ । ପରେ ସେ ଜଙ୍ଗଲକୁ ଚାଲି ଯାଇଥିଲା । ତେବେ ସେହି ଅଞ୍ଚଳକୁ ସିଂହ ପଶି ଆସିବା କିଛି ନୂଆ କଥା ନୁହେଁ । ପୂର୍ବରୁ ମଧ୍ୟ ଅନେକ ଥର ସିଂହ ବୁଲୁଥିବାର ଭିଡିଓ ଭାଇରାଲ ହେଉଥିବା ଦେଖିବାକୁ ମିଳିଛି ।
