ଅଫର ଆଣିଲେ ମଦ ଦୋକାନୀ: ଗୋଟିଏ କିଣିଲେ....

ଏ ଦୃଶ୍ୟ ହେଉଛି ଉତ୍ତର ପ୍ରଦେଶର। ମଦ ପ୍ରେମୀଙ୍କ ପାଇଁ ଭଲ ଦିନ ଆସିଥିବା ଭଳି ମନେ ହେଉଛି। କାରଣ ଏବେ ନୋଏଡା ସମେତ ସମସ୍ତ ଜିଲା ଏବଂ ପ୍ରାୟ ସମସ୍ତ ମଦ ଦୋକାନରେ ରିହାତି ମୂଲ୍ୟରେ ମଦ ବିକ୍ରି ହେଉଛି। ଅର୍ଥାତ ଗୋଟିଏ ବୋତଲର ମୂଲ୍ୟରେ ଦୁଇଟି ବୋତଲ ମିଳୁଛି। ଏହି ଖବର ପାଇବା ମାତ୍ରେ ମଦ ଦୋକାନରେ ଲୋକଙ୍କ ଲମ୍ବା ଧାଡି ଲାଗୁଛି। ପରିସ୍ଥିତି ଏପରି ହୋଇଛି ଯେ ସାଧାରଣତଃ ଗୋଟିଏ ବୋତଲ ମଦ କିଣୁଥିବା ଲୋକମାନେ ମଧ୍ୟ ଏବେ ଗୋଟିଏ ପେଟି କିଣୁଛନ୍ତି। ମାର୍ଚ୍ଚ ମାସ ବନ୍ଦ ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଛି। ଏପ୍ରିଲ ୧ରୁ ନୂତନ ଆର୍ଥିକ ବର୍ଷ ଆରମ୍ଭ ହେବ। ଏହା ସହିତ ନୂତନ ମଦ ଡିଲରସିପ ମଧ୍ୟ ଆରମ୍ଭ ହେବ। ଯଦି ପୁରୁଣା ଠିକାଦାର ନୂତନ ଟେଣ୍ଡର ନ ପାଆନ୍ତି, ତେବେ ତାଙ୍କୁ ତାଙ୍କ ଦୋକାନ ବନ୍ଦ କରିବାକୁ ପଡିବ। ଏପରି ପରିସ୍ଥିତିରେ ସମସ୍ତ ଠିକାଦାର ସେମାନଙ୍କ ଗୋଦାମରେ ଥିବା ଷ୍ଟକକୁ ଖାଲି କରିବା ପ୍ରକ୍ରିୟା ଆରମ୍ଭ କରିଦେଇଛନ୍ତି।

ଏଥିପାଇଁ ଅଧିକାଂଶ ଦୋକାନରେ ପୁରୁଣା ଷ୍ଟକର ବିକ୍ରି ଆରମ୍ଭ ହୋଇଛି। କିଛି ଦୋକାନରେ ଗୋଟିଏ ମୂଲ୍ୟରେ ଦୁଇଟି ବୋତଲ ଦିଆଯାଉଥିବା ବେଳେ କିଛି ଦୋକାନରେ ମଦର ମୂଲ୍ୟ ଅଧା କରାଯାଇଛି। ଏହି ଖବର ମଦ ପ୍ରେମୀଙ୍କ ପାଇଁ ଖୁସି ଆଣିଛି। ମଙ୍ଗଳବାର ଅପରାହ୍ନରେ ନୋଏଡାର ମଦ ଦୋକାନଗୁଡ଼ିକରେ ବହୁ ସଂଖ୍ୟକ ଲୋକ ପହଞ୍ଚିଥିଲେ। ପ୍ରଚଣ୍ଡ ଖରା ସତ୍ତ୍ୱେ,ସେମାନେ ଘଣ୍ଟା ଘଣ୍ଟା ଧାଡ଼ିରେ ଠିଆ ହୋଇଥିଲେ ଏବଂ ନିଜ ପସନ୍ଦର ଅଧିକ ପରିମାଣର ମଦ କିଣିବା ପରେ ହିଁ ସେଠାରୁ ବାହାରି ଯାଉଥବା ଦେଖାଯାଇଥଲା। ଅନେକ ଲୋକ ଦୋକାନରୁ ବୋତଲ ନୁହେଁ ବରଂ ସମ୍ପୂର୍ଣ୍ଣ ବାକ୍ସ ଧରି ବାହାରକୁ ଆସୁଥିବାର ଦେଖାଯାଇଥିଲା। ମୁଜାଫରନଗର, ଗାଜିଆବାଦ, ମିରଟ, ଆଗ୍ରା, ବାଲିଆ ଏବଂ ଗାଜିପୁର ଭଳି ଜିଲ୍ଲାରେ ସମାନ ପରିସ୍ଥିତି ଦେଖାଯାଇଥିଲା। କୁହାଯାଉଛି ଯେ ଅନେକ ଲୋକ କାର୍ଯ୍ୟାଳୟରୁ ଛୁଟି ନେଇ ତ କିଛି ଦୋକାନ ବନ୍ଦ କରି ମଦ ଦୋକାନରେ ପହଞ୍ଚିଥିଲେ। ଆଗାମୀ ଗୋଟିଏ ବର୍ଷ ପାଇଁ ଏତେ ଶସ୍ତା ମଦ ଉପଲବ୍ଧ ହେବ ନାହିଁ। ବରଂ ନୂତନ ଚୁକ୍ତିନାମା ଆରମ୍ଭ ହେବା ପରେ ମଦର ମୂଲ୍ୟ ଆହୁରି ବୃଦ୍ଧି ପାଇବ ବୋଲି ସେମାନେ ଆବଶ୍ୟକଠାରୁ ଅଧିକ କିଣି ନେଉଥିବା ପ୍ରତିକ୍ରିୟା ରଖିଛନ୍ତି।