Gold Sweet / ସୁନାରେ ତିଆରି ମିଠାର ଦାମ୍ ଶୁଣିଲେ ଉଡ଼ିଯିବ ହୋସ୍, ଗୋଟିଏ ଖଣ୍ଡ ୧,୧୧୧ ଟଙ୍କା

ଦୀପାବଳି ପର୍ବ ଅବସରରେ ରାଜସ୍ଥାନର ରାଜଧାନୀ ଜୟପୁରରେ ଏକ ଦାମୀ ଓ ସ୍ୱତନ୍ତ୍ର ମିଠାକୁ ନେଇ ଚର୍ଚ୍ଚା ଜୋର ଧରିଛି । ‘ତ୍ୟୋହାର ଅଶର୍ଫି’ ନାମକ ଏହି ରାଜକୀୟ ମିଠାର ଗୋଟିଏ ଖଣ୍ଡର ମୂଲ୍ୟ ୧,୧୧୧ ଟଙ୍କା । ଏହାର ଏକ କିଲୋଗ୍ରାମ ମୂଲ୍ୟ ପ୍ରାୟ ୧ ଲକ୍ଷ ୨୩ ହଜାର ୪୪୪ ଟଙ୍କା ।

ଦେଖିବାକୁ ପୁରୁଣା ସୁନା ମୁଦ୍ରା ଭଳି ଏହି ମିଠାକୁ ବାଦାମ ପେଷ୍ଟ, କାଶ୍ମୀରୀ କେଶର, ସ୍ୱର୍ଣ୍ଣ ଏବଂ ୨୪ କ୍ୟାରେଟ୍ ଖାଇବା ଯୋଗ୍ୟ ସୁନାର ବର୍କ ବ୍ୟବହାର କରି ପ୍ରସ୍ତୁତ କରାଯାଉଛି । ଏହାର ୯ ଖଣ୍ଡ ଥିବା ଏକ ବାକ୍ସର ଦାମ୍ ୯,୯୯୯ ଟଙ୍କା ରଖାଯାଇଛି । ଭିଆଇପି ଓ କର୍ପୋରେଟ୍ ଉପହାର ପାଇଁ ଏହା ଗ୍ରାହକଙ୍କ ଆକର୍ଷଣ ପାଲଟିଛି ।
ରାଜାମହାରାଜାଙ୍କ ପରମ୍ପରାରୁ ପ୍ରେରିତ ମିଠା

ଏହି ଆଉଟଲେଟ୍‌ର ପ୍ରତିଷ୍ଠାତା ସିଏ ଅଞ୍ଜଳି ଜୈନଙ୍କ କହିବା ଅନୁସାରେ, ପୂର୍ବ ସମୟରେ ରାଜାମହାରାଜାମାନେ ସୁନାର ଅଶର୍ଫି ଉପହାର ଦେବାର ପରମ୍ପରାରୁ ଏହି ମିଠା ପ୍ରସ୍ତୁତ କରିବାର ଚିନ୍ତା ଆସିଥିଲା । ଏଥିରେ ବ୍ୟବହୃତ ସୁନା ଆୟୁର୍ବେଦିକ ମାନଦଣ୍ଡ ଅନୁସାରେ ସୁରକ୍ଷିତ ବୋଲି ସେ ଦାବି କରିଛନ୍ତି । ଏହା ବ୍ୟତୀତ ‘ସ୍ୱର୍ଣ୍ଣ ପ୍ରସାଦମ୍’ ନାମରେ ଆଉ ଏକ ମିଠା ମଧ୍ୟ ବଜାରକୁ ଆସିଛି । ଏହାର କିଲୋଗ୍ରାମ ପିଛା ମୂଲ୍ୟ ୧ ଲକ୍ଷ ୧୧ ହଜାର ଟଙ୍କା ।

ନବରତ୍ନ ଓ ବାଣ ଆକୃତିର ମିଠା ମଧ୍ୟ ଆକର୍ଷଣ
ଜୟପୁରର ରତ୍ନ ପରିଚୟକୁ ଦର୍ଶାଇବା ପାଇଁ ‘ନବରତ୍ନ ମିଠା’ ମଧ୍ୟ ପ୍ରସ୍ତୁତ କରାଯାଇଛି । ଏହା ସହିତ ଦୀପାବଳିର ଉତ୍ସବକୁ ଆହୁରି ଆକର୍ଷଣୀୟ କରିବା ପାଇଁ ବାଣ ଆକୃତିର ମିଠା ମଧ୍ୟ ଗ୍ରାହକଙ୍କ ମନ ଜିଣୁଛି । ଏହି ମିଠାଗୁଡ଼ିକ ପ୍ରସ୍ତୁତ କରିବା ସମୟରେ ସୁନା ଓ ରୁପା ବ୍ୟବହାର ହେଉଥିବାରୁ କଡ଼ା ସୁରକ୍ଷା ବ୍ୟବସ୍ଥା ରଖାଯାଉଛି । ଏଥିରେ କୃତ୍ରିମ ରଙ୍ଗ ବ୍ୟବହାର ନକରି ପ୍ରାକୃତିକ ରଙ୍ଗ ଓ ସ୍ୱାଦକୁ ପ୍ରାଧାନ୍ୟ ଦିଆଯାଇଛି ବୋଲି ଅଞ୍ଜଳି ଜୈନ କହିଛନ୍ତି ।

ସୂଚନାଯୋଗ୍ୟ, ଦୀପାବଳିରେ ମିଠା ବାଣ୍ଟିବା ଭାରତୀୟ ପରମ୍ପରାର ଏକ ଅଂଶ । ପୂର୍ବରୁ ଲୋକମାନେ ଘରେ ତିଆରି ଲଡ଼ୁ ଓ ବିଭିନ୍ନ ମିଠା ପରସ୍ପରକୁ ଦେଉଥିଲେ । କିନ୍ତୁ ଏବେ ସୁନା ଓ ରୁପାରେ ତିଆରି ଏଭଳି ଦାମୀ ମିଠା ଉତ୍ସବର ଆକର୍ଷଣ ବଢ଼ାଇଛି ।