ସରିଲା ମହାକୁମ୍ଭ, ୧୨ ବର୍ଷ ପରେ ବୃଷ ରାଶିରେ ବୃହଷ୍ପତ୍ତି ପ୍ରବେଶ ସହ ହେବ ପୂର୍ଣ୍ଣକୁମ୍ଭ
ସଙ୍ଗମରେ ସରିଲା ମହାକୁମ୍ଭ । ମହାଶିବରାତ୍ରିରେ ତ୍ରିବେଣୀ ସଂଗମରେ ଶେଷ ଅମୃତ ସ୍ନାନ ସରିଛି । ମେଳା ଶେଷ ଦିନରେ ଦେଢ଼ କୋଟିରୁ ଅଧିକ ଶ୍ରଦ୍ଧାଳୁ ପକାଇଛନ୍ତି ପବିତ୍ର ବୁଡ଼ । ବିଦେଶୀଙ୍କ ଆକ୍ରମଣ, ବିଧର୍ମୀଙ୍କ ହଜାର ବର୍ଷର କଷଣ ପରେ ବି ଅକ୍ଷୟ ରହିଛି ସନାତନ ଧର୍ମ । ବିଶ୍ୱର ସର୍ବବୃହତ୍ତ ଆଧ୍ୟାତ୍ମିକ ସମାବେଶରେ ବସୁଧୈବ କୁଟୁମ୍ବକମର ବାର୍ତ୍ତା ଦିଆଯାଇଛି । ମହାକୁମ୍ଭ ହିଁ ପ୍ରମାଣ କରୁଛି, ସନାତନ ସଂସ୍କୃତି ପ୍ରତି ବଢୁଛି ବିଶ୍ୱବାସୀଙ୍କ ଆସ୍ଥା ।
ହର ହର ମହାଦେବ, ଜୟ ମା ଗଙ୍ଗା ଧ୍ୱନିରେ କମ୍ପୁଥିଲା ମହାତୀର୍ଥ ପ୍ରୟାଗରାଜ । ୧୪୪ ବର୍ଷର ଅପେକ୍ଷା ପରେ ଅମୃତ ଭୂମିକୁ ଫେରିଥିବା ମହାକୁମ୍ଭର ଶେଷ ଦିନରେ ତ୍ରିବେଣୀ ସଙ୍ଗମରେ ବୁଡ଼ ପକାଇଛନ୍ତି ପାଖାପାଖି ୨ କୋଟି ଶ୍ରଦ୍ଧାଳୁ। ମହାଶିବରାତ୍ରୀରେ ଶେଷ ଅମୃତ ସ୍ନାନରେ ଲକ୍ଷାଧିକ ବିଦେଶୀ ଶ୍ରଦ୍ଧାଳୁ ସାମିଲ ହୋଇ କରିଛନ୍ତି ଭାରତୀୟ ସଂସ୍କୃତିର ଜୟଗାନ । ଆକାଶରୁ ହୋଇଛି ପୁଷ୍ପବର୍ଷା । ଶେଷଦିନରେ ମହାକୁମ୍ଭ ମେଳା କ୍ଷେତ୍ରରେ ଭାରତୀୟ ବାୟୁସେନାର ଏୟାର ଶୋ ଶ୍ରଦ୍ଧାଳୁଙ୍କୁ ଦେଇଥିଲା ଭିନ୍ନ ଅନୁଭବ । ପାହାନ୍ତି ପ୍ରହରରୁ ସଂଗମକୁ ଛୁଟିଥିଲା ଶ୍ରଦ୍ଧାଳୁଙ୍କ ସୁଅ ।
ମହାକୁମ୍ଭ ପ୍ରଶାସନ ରିପୋର୍ଟ ଅନୁସାରେ ଜାନୁଆରୀ ୧୩ ପୌଷ ପୂର୍ଣ୍ଣିମାରୁ ମହାଶିବରାତ୍ରୀ ଯାଏ ମହାକୁମ୍ଭରେ ୧୮୩ଟି ଦେଶରୁ କୋଟିଏରୁ ଅଧିକ ବିଦେଶୀଙ୍କ ସମେତ ବୁଡ଼ ପକାଇଛନ୍ତି ୬୬ କୋଟି ଶ୍ରଦ୍ଧାଳୁ । ଏହି ବିଶ୍ବକୀର୍ତ୍ତିମାନ ସ୍ଥାପନ ଭାରତୀୟ ସଂସ୍କୃତି ପ୍ରତି ବିଦେଶୀଙ୍କ ଆକର୍ଷଣ ପ୍ରମାଣିତ କରୁଛି । ହଜାର ହଜାର ବର୍ଷ ଧରି ବିଦେଶୀ, ବିଧର୍ମୀଙ୍କ ଆକ୍ରମଣ, ଲୁଣ୍ଠନ ସତ୍ତ୍ବେ ଆଜି ବି ଅକ୍ଷୟ, ଅଜେୟ, ଅମର ସନାତନ ସଂସ୍କୃତି । ଆଜି ବି ପବିତ୍ର ଗଙ୍ଗା ତଟରୁ ବିଶ୍ବବାସୀଙ୍କୁ ଶାନ୍ତି, ସଦଭାବନାର ମନ୍ତ୍ର ବାଣ୍ଟୁଛି ଭାରତବର୍ଷ । କୁମ୍ଭମେଳା ଶେଷ ହେଉଥିବାରୁ ଭାବବିହ୍ବଳ ହେବା ସହ ମେଳାରେ ସାମିଲ ହୋଇ ଦିବ୍ୟ ଅନୁଭୂତି ବଖାଣିଛନ୍ତି ଶ୍ରଦ୍ଧାଳୁ ।
ଏତେ ବିଶାଳ ଆୟୋଜନ ସାରା ବିଶ୍ବକୁ ଚକିତ କରିଛି । କେନ୍ଦ୍ର ଓ ରାଜ୍ୟ ସରକାରଙ୍କ ଦୃଢ ସଂକଳ୍ପ ଏବଂ ଦୂରଦର୍ଶିତା ହିଁ ମହାକୁମ୍ଭକୁ ଏଭଳି ଭବ୍ୟ ଏବଂ ଦିବ୍ୟ ସ୍ବରୂପ ଦେବାରେ ସଫଳ ହୋଇଛି । ବିଶାଳ ଆୟୋଜନ ସହ ସୁରକ୍ଷା ବ୍ୟବସ୍ଥାକୁ ନେଇ ମହାକୁମ୍ଭ ପ୍ରଶାସନର ପଦକ୍ଷେପକୁ ବିଶ୍ବବ୍ୟାପୀ ପ୍ରଶଂସା ମିଳିଛି ।
ଦିବ୍ୟ ଓ ଭବ୍ୟ ମହାକୁମ୍ଭରେ ସାମିଲ ହୋଇ ସନାତନୀ ମୂଲ୍ୟବୋଧରେ ବିଶ୍ବାସ ରଖୁଥିବା ମଣିଷଙ୍କୁ ଏକତାର ମନ୍ତ୍ର ବାଣ୍ଟିବାରେ ସଫଳ ହୋଇଛି ମହାକୁମ୍ଭ ଆୟୋଜନ । ପୁଣି ଏହିପରି ମହାକୁମ୍ଭ ଦେଖିବାକୁ ଆଉ ଗୋଟିଏ ଶତାବ୍ଦୀକୁ ଅପେକ୍ଷା କରିବାକୁ ପଡ଼ିବ । ୧୨ ବର୍ଷ ପରେ ପୁଣିଥରେ ବୃଷ ରାଶିରେ ବୃହଷ୍ପତ୍ତି ପ୍ରବେଶ ସହ ପ୍ରୟାଗରାଜରେ ଆୟୋଜନ ହେବ ପୂର୍ଣ୍ଣକୁମ୍ଭ ।
