ଦୀଘାରେ ଜଗନ୍ନାଥ ମନ୍ଦିର ହେବା ପରଠୁ ହିଁ ବିବାଦରେ ଛନ୍ଦି ହୋଇଛି । ବିଭିନ୍ନ ମହଲରୁ ତୀବ୍ର ବିରୋଧ ପରେ ଦୀଘା ଜଗନ୍ନାଥମନ୍ଦିର ଆଗରୁ ହଟିଛି ଜଗନ୍ନାଥ ଧାମ୍ ନାମ ଫଳକ । ହେଲେ ୱେବସାଇଟ୍ ରୁ ଏହା ହଟିନଥିବାବେଳେ ଆଉ ଏକ ବିରାଟ ତ୍ରୁଟି ସାମନାକୁ ଆସିଛି । ଶ୍ରୀଜୀଉଙ୍କ ଆସ୍ଥାନ ବଦଳିଯାଇଥିବା ଦେଖିବାକୁ ମିଳିଛି । ବାମପଟେ ବଳଭଦ୍ର ଡାହାଣ ପଟେ ମହାପ୍ରଭୁ ଜଗନ୍ନାଥ ରହିବା ବଦଳରେ ଭୂଲ୍ ସ୍ଥାନରେ ସ୍ଥାନିତ କରାଯାଇଛି ।

ଏନେଇ ସୋସିଆଲ ମିଡିଆରେ ଅନେକ ପ୍ରଶ୍ନ ଉଠାଇଛନ୍ତି ଲୋକେ । ବଙ୍ଗାଳୀମାନେ ମହାପ୍ରଭୁ ଜଗନ୍ନାଥଙ୍କୁ ବହୁତ ଭଲ ପାଉଥିବା କୁହନ୍ତି । ଏଥିପାଇଁ ବର୍ଷ ତମାମ ପୁରୀକୁ ଆସନ୍ତି । ହେଲେ ଏତେ ଭଲପାଇବା ମଧ୍ୟରେ ମହାପ୍ରଭୁଙ୍କ ସ୍ଥାନ କେମିତି ଭୂଲି ଗଲେ ବୋଲି ସୋସିଆଲ ମିଡିଆରେ ଟ୍ରୋଲ୍ କରାଯାଉଛି ।

ଜଗନ୍ନାଥ ପ୍ରେମୀଙ୍କ ତୀବ୍ର ବିରୋଧ ପରେ ମୁଣ୍ଡ ନୁଆଁଇଲେ ମମତା । ଦୀଘା ଜଗନ୍ନାଥ ମନ୍ଦିର ଆଗରୁ ହଟିଲା ଜଗନ୍ନାଥ ଧାମ ଲେଖାଥିବା ସିଗ୍ନେଚର୍ । ଏନେଇ ସୋସିଆଲ୍ ମିଡ଼ିଆ ଏକ୍ସରେ ଭିଡିଓ ପୋଷ୍ଟ କରି ସୂଚନା ଦେଇଛନ୍ତି ବିଜେପି ମୁଖପାତ୍ର ଅମିତ ମାଲବ୍ୟ । 

ଦୀଘା ଜଗନ୍ନାଥ ଧାମ ନାମକରଣ ନେଇ ମଧ୍ୟ ପଶ୍ଚିମ ବଙ୍ଗ ସରକାରଙ୍କୁ ଚେତାବନୀ ଦେଇଛନ୍ତି ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ । ଧାମ ଶବ୍ଦର ନାଁ କେବଳ ୪ଟି ସ୍ଥାନ ସହ ଜଡ଼ିତ । ଅନ୍ୟ କୌଣସି ସ୍ଥାନକୁ ଧାମ କୁହାଯାଇ ପାରିବ ନାହିଁ । ଦୀଘା ବେଳାଭୂମିକୁ ମହୋଦଧି କହିବାକୁ ବି ବିରୋଧ କରୁଛୁ । ପ୍ରସଙ୍ଗରେ ପଶ୍ଚିମବଙ୍ଗ ସରକାରଙ୍କୁ ଓଡ଼ିଶା ସରକାର ଚିଠି ଲେଖିବେ । ଦରକାର ପଡ଼ିଲେ ଆଇନର ଆଶ୍ରୟ ନିଆଯିବ ବୋଲି କହିଛନ୍ତି ଆଇନ ମନ୍ତ୍ରୀ। ଏହାସହ ମନ୍ତ୍ରୀ ଆହୁରି କହିଛନ୍ତି ମହାପ୍ରଭୁଙ୍କ ସେବକମାନେ ଅନ୍ୟ କୌଣସି ସ୍ଥାନରେ ଯାଇ ପୂଜା କରିବାର ବିଧି ନାହିଁ, ଏହା ଗ୍ରହଣଯୋଗ୍ୟ ନୁହେଁ । ଏ ନେଇ ଖୁବଶୀଘ୍ର ଏକ ମାର୍ଗଦର୍ଶିକା ପ୍ରସ୍ତୁତ କରାଯିବ ।