୧୫ ବର୍ଷ କ୍ଷମତାରେ ରହିବା ପରେ, ମୁଖ୍ୟମନ୍ତ୍ରୀ ପଦବୀ ଲୋଭରେ ମମତା ଏମିତି ଅନ୍ଧ ହୋଇଯାଇଛନ୍ତି ଯେ, କ୍ଷମତା ଚାଲିଯିବା ସତ୍ୟକୁ ସହଜରେ ଗ୍ରହଣ କରିପାରୁ ନାହାନ୍ତି । ସେଥିପାଇଁ ଜନମତକୁ ଅବମାନନା କରି ବଡ଼ ଦୁଃସାହସ କରିଛନ୍ତି ଦିଦି । ସାମ୍ବାଦିକ ସମ୍ମିଳନୀ କରି କହିଛନ୍ତି ଯେ, ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବେନାହିଁ । ତେଣୁ ଚର୍ଚ୍ଚା ଆରମ୍ଭ ହେଇଛି, କଣ ପଶ୍ଚିମବଙ୍ଗରେ ସାମ୍ବଧାନିକ ସଂକଟ ଦେଖାଦେବ? ବିଶେଷଜ୍ଞଙ୍କ ମତରେ ମମତା ପଦ ନଛାଡ଼ିଲେ ମଧ୍ୟ ନୂଆ ସରକାର ଗଠନରେ କୌଣସି ବାଧା ସୃଷ୍ଟି ହେବନାହିଁ ।

ଜନମତକୁ ଅବମାନନା ଓ ଗଣତନ୍ତ୍ରକୁ ଉପହାସ କଲାଭଳି, ପଶ୍ଚିମବଙ୍ଗର ବିଦାୟୀ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଏହି ସାମ୍ବାଦିକ ସମ୍ମିଳନୀ । ମଙ୍ଗଳବାର ଅପରାହ୍ଣରେ କୋଲକାତାରେ ପ୍ରେସମିଟ୍ କରି ଯେଉଁ ବିୟାନ ଦେଇଛନ୍ତି, ତାହା ତାଙ୍କୁ ଜଣେ କ୍ଷମତା ଲୋଭୀ ରାଜନେତା ଭାବେ ଦେଶବାସୀଙ୍କ ଆଗରେ ଚିତ୍ରଣ କରିଛି । ପଶ୍ଚିମବଙ୍ଗ ବିଧାନସଭା ନିର୍ବାଚନରେ ବିଜେପିର ବିପୁଳ ବିଜୟ ସତ୍ବେ, ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାକୁ ସିଧାସିଧା ମନା କରିଦେଇଛନ୍ତି ମମତା । TMC ମୁଖ୍ୟଙ୍କ ଏଭଳି ଆଭିମୁଖ୍ୟ ରାଜ୍ୟରେ ସାମ୍ବିଧାନିକ ସଂକଟ ସୃଷ୍ଟି କରିପାରେ ବୋଲି ଚର୍ଚ୍ଚା ଭିତରେ ବିଶେଷଜ୍ଞଙ୍କ ମତାମତ ସାମ୍ନାକୁ ଆସିଛି । ନଜର ପକାନ୍ତୁ ମୁଖ୍ୟମନ୍ତ୍ରୀ ପଦରୁ ମମତା ବାନାର୍ଜୀ ଇସ୍ତଫା ନଦେଲେ କ'ଣ ହେବ?

ମୁଖ୍ୟମନ୍ତ୍ରୀ ପଦରୁ ମମତା ବାନାର୍ଜୀ ଇସ୍ତଫା ନଦେଲେ କ'ଣ ହେବ ?
୧- ମମତା ମୁଖ୍ୟମନ୍ତ୍ରୀ ପଦରୁ ଇସ୍ତଫା ନଦେଲେ ମଧ୍ୟ ନୂଆ ସରକାର ଗଠନରେ କୌଣସି ଅସୁବିଧା ହେବନାହିଁ
୨- ସେ ରାଜ୍ୟପାଳଙ୍କୁ ଇସ୍ତଫା ପତ୍ର ଦେଲେ ମଧ୍ୟ ନୂଆ ସରକାର ଗଠନ ହେବା ଯାଏଁ ଦାୟିତ୍ବ ତୁଲାଇ ଥାଆନ୍ତେ
୩- ବର୍ତ୍ତମାନ TMC ନେତୃତ୍ବାଧୀନ ସରକାର ଓ ବିଧାନସଭାର କାର୍ଯ୍ୟକାଳ ମେ' ୭ ତାରିଖରେ ଶେଷ ହେଉଛି
୪- ସମ୍ବିଧାନର ଧାରା ୧୬୪ ଅନୁଯାୟୀ ରାଜ୍ୟପାଳଙ୍କ ଅନୁଗ୍ରହରେ ନୂଆ ସରକାର ଗଠନ ଯାଏଁ ଦାୟିତ୍ବରେ ରହିପାରିବେ
୫- ଜଣେ ମୁଖ୍ୟମନ୍ତ୍ରୀଙ୍କ କାର୍ଯ୍ୟକାଳ ସରିବା ପୂର୍ବରୁ ଅନ୍ୟଜଣେ ମୁଖ୍ୟମନ୍ତ୍ରୀ ନିଯୁକ୍ତ କରିବାରେ ଅସୁବିଧା ରହିଛି
୬- କିନ୍ତୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟକାଳ ସରିଗଲେ, ତାଙ୍କ ବିନା ଇସ୍ତଫାରେ ମଧ୍ୟ ନୂଆ ମୁଖ୍ୟମନ୍ତ୍ରୀ ଶପଥ ନେଇପାରିବେ
୭- ପଶ୍ଚିମବଙ୍ଗରେ ବିଧାନସଭା ନିର୍ବାଚନ ଶେଷ ହୋଇଥିବା ନେଇ ୫ ରାଜ୍ୟର ରାଜ୍ୟପାଳଙ୍କୁ ସୂଚିତ କରିସାରିଛନ୍ତି ନିର୍ବାଚନ କମିଶନ୍
୮- ନିର୍ବାଚନରେ ବିଜୟୀ ପାର୍ଟିର ବିଧାୟକ ଦଳ ନେତାଙ୍କୁ ସରକାର ଗଠନ ପାଇଁ ଆମନ୍ତ୍ରଣ କରିବେ ରାଜ୍ୟପାଳ
୯- ମମତା ନିର୍ବାଚନକୁ ଚ୍ୟାଲେଞ୍ଜ କରି କୋର୍ଟକୁ ଗଲେ ମଧ୍ୟ ନୂଆ ସରକାରଙ୍କ ଦାୟିତ୍ବ ଗ୍ରଣହ ପ୍ରକ୍ରିୟା ଜାରି ରହିବ
୧୦- ତେଣୁ ଜନମତକୁ ସମ୍ମାନ ଦେଇ ମମତା ପଦରୁ ଇସ୍ତଫା ଦେବା ସହ ସସମ୍ମାନେ ବଦାୟ ନେଇଯିବା ଉଚିତ୍

ବର୍ତ୍ତମାନ ସ୍ଥିତିରେ ସାମ୍ବିଧାନିକ ମୁଖ୍ୟ ଭାବରେ ରାଜ୍ୟପାଳଙ୍କ ଭୂମିକା ଏବଂ ତାଙ୍କ ପାଖରେ ଥିବା ବିଶେଷ କ୍ଷମତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇପଡ଼ିଛି । ମମତା ବାନାର୍ଜୀଙ୍କ ଜିଦ୍ ଓ ରାଜ୍ୟପାଳଙ୍କ ସାମ୍ବିଧାନିକ କର୍ତ୍ତବ୍ୟ ମଧ୍ୟରେ କିଏ ଜିତିବ, ତାହା ଆଗାମୀ ସମୟ ହିଁ କହିବ । କିନ୍ତୁ ଏହା ସ୍ପଷ୍ଟ ଯେ, ସମ୍ବିଧାନର ପରିସର ମଧ୍ୟରେ ରାଜ୍ୟପାଳଙ୍କ ନିଷ୍ପତ୍ତି ହିଁ ଚୂଡ଼ାନ୍ତ ହେବ।