ବେଙ୍ଗଲକୁ ବଦନାମ କରାଯାଉଛି । ବେଙ୍ଗଲରେ ବିରୋଧୀଙ୍କ ଅଭିଯୋଗକୁ ଖଣ୍ଡନ କଲେ ମୁଖ୍ୟମନ୍ତ୍ରୀ ମମତା ବାନାର୍ଜୀ । କହିଲେ, ୱାକଫ୍ ଆଇନକୁ ନେଇ କିଛି ଘଟଣା ହୋଇଛି । ହିଂସାକୁ ନେଇ ଫେକ୍ ନ୍ୟୁଜ୍ ଚଳାଯାଉଛି । ଅନ୍ୟ ରାଜ୍ୟର ହିଂସା ଭିଡିଓ ଦେଖାଇ ବେଙ୍ଗଲକୁ ବଦନାମ କରାଯାଉଛି । ହିଂସାରେ ତୃଣମୂଳ କଂଗ୍ରେସ ନେତାଙ୍କ ଘର ଉପରେ ବି ଆକ୍ରମଣ ହୋଇଛି । ହିଂସାରେ ତୃଣମୂଳ କଂଗ୍ରେସର ସମ୍ପୃକ୍ତି ନାହିଁ ବୋଲି କହିଛନ୍ତି ମମତା ।

ବେଙ୍ଗଲ ହିଂସା ମାମଲାରେ କେନ୍ଦ୍ର ସରକାରଙ୍କୁ ଟାର୍ଗେଟ୍ କରିଛନ୍ତି ମମତା । ବାଂଲାଦେଶୀ ଆସି ହିଂସା କରୁଥିଲେ । ସେମାନଙ୍କୁ ସୀମାରେ ରୋକାଗଲା ନାହିଁ କାହିଁକି ବୋଲି ସେ ପାଲଟା ପ୍ରଶ୍ନ କରିଛନ୍ତି । ଇମାମ୍ ମାନଙ୍କ ସହ ଆଲୋଚନା ବେଳେ ମମତା ବାନାର୍ଜୀ ଏ ବୟାନ ଦେଇଛନ୍ତି ।

ସେପଟେ ପଶ୍ଚିମବଙ୍ଗରେ ହିନ୍ଦୁ ସହିଦ ଦିବସ ପାଳୁଛି ବିଜେପି । ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ କହିଛନ୍ତି, ସାରା ରାଜ୍ୟରେ ହିନ୍ଦୁ ସହିଦ ଦିବସ ପାଳନ କରାଯାଉଛି । ପୁରା ଘଟଣା ପାଇଁ ମମତା ବାନାର୍ଜୀ ଦାୟୀ । ମୁଖ୍ୟମନ୍ତ୍ରୀ ମମତା ବାନାର୍ଜୀ ତାଙ୍କ ପଦ ଛାଡ଼ନ୍ତୁ, ଆଉ ସେ ଜେଲ୍ ଯିବା ଦରକାର ବୋଲି କହିଛନ୍ତି ଶୁଭେନ୍ଦୁ ଅଧିକାରୀ

ତେବେ ପଶ୍ଚିମବଙ୍ଗ ହିଂସା ପଛରେ ବାଂଲାଦେଶୀଙ୍କ ହାତ । ମୁର୍ଶିଦାବାଦରେ ହିନ୍ଦୁଙ୍କ ଉପରେ ଆକ୍ରମଣ ପଛରେ ରୋହିଙ୍ଗ୍ୟା ମୁସଲମାନ । ପ୍ରାଥମିକ ଅନୁସନ୍ଧାନରୁ ହିଂସାକାଣ୍ଡରେ ବାଂଲାଦେଶୀ ଅନୁପ୍ରବେଶକାରୀଙ୍କ ସଂପୃକ୍ତି ସାମ୍ନାକୁ ଆସିବା ପରେ କଡ଼ା ପଦକ୍ଷେପ ଗ୍ରହଣ କରିଛି କେନ୍ଦ୍ର ଗୃହ ମନ୍ତ୍ରଣାଳୟ । ପୋଲିସ ଉପସ୍ଥିତିରେ ହିନ୍ଦୁଙ୍କ ଘରେ ନିଆଁ ଲଗାଇବାଠାରୁ ଆରମ୍ଭ କରି ପାଣି ଟାଙ୍କିରେ କଠୋରପନ୍ଥୀ ବିଷ ମିଶାଇବା ଅଭିଯୋଗକୁ ନେଇ କେନ୍ଦ୍ର ଗୃହ ମନ୍ତ୍ରଣାଳୟ ସଚିବ ପଶ୍ଚିମବଙ୍ଗ ଡିଜିପି ଓ ମୁଖ୍ୟ ଶାସନ ସଚିବଙ୍କୁ କରିଛନ୍ତି ରିପୋର୍ଟ ତଲବ ।

ଭୋଟବ୍ୟାଙ୍କ ଲୋଭରେ ମମତା ବାନାର୍ଜୀ ରାଜ୍ୟକୁ ଦ୍ବିତୀୟ ବାଂଲାଦେଶରେ ପରିଣତ କରିବାକୁ ଷଡ଼ଯନ୍ତ୍ର ସହ ରାଜ୍ୟ ପୋଲିସକୁ ଅପାରଗ ବନାଇ ରଖିଥିବା ଅଭିଯୋଗ କରିଛନ୍ତି ପଶ୍ଚିମବଙ୍ଗରେ ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ । ହିଂସାକୁ ନେଇ ମମତାଙ୍କ ନିରବତା ଉପରେ ପ୍ରଶ୍ନ ଉଠାଇଛନ୍ତି ବରିଷ୍ଠ କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ ।

Argus News | argus news | Odisha Latest News, Breaking News, Trending News, Live TV