ଦୁଃଖ ଶୁଣିଲେ ପ୍ରଧାନମନ୍ତ୍ରୀ । ମଣିପୁରର ଚୁରାଚାନ୍ଦପୁରରେ ବିସ୍ତାପିତଙ୍କ ସହ କଥା ହେଲେ ମୋଦି । ପୂର୍ବାଞ୍ଚଳବାସୀଙ୍କୁ ଶାନ୍ତି ବାର୍ତ୍ତା ଦେବା ସହ ନୂଆ ବିକାଶ ଯୋଜନା ଭେଟି ଦେଇଛନ୍ତି ମୋଦି । ରିଲିଫ ଶିବିରରେ ପହଞ୍ଚି ବୟସ୍କ ଓ ପିଲାଙ୍କ ମନୋବଳ ବଢ଼ାଇଛନ୍ତି ପ୍ରଧାନମନ୍ତ୍ରୀ । ମିଜୋରାମରୁ ମଣିପୁରରେ ପହଞ୍ଚିବା ପରେ ପ୍ରବଳ ବର୍ଷା ଯୋଗୁ ଇମ୍ଫାଲ ବିମାନବନ୍ଦର ସଡ଼କପଥରେ ୬୫ କିଲୋମିଟର ଯାତ୍ରା କରି ଚୁରାଚାନ୍ଦପୁରର ଶାନ୍ତି ଭୂମିରେ ପହଞ୍ଚିଥିଲେ ମୋଦି । ୭ ହଜାର ୩ ଶହ କୋଟି ମୂଲ୍ୟର ୧୪ଟି ବିକାଶମୂଳକ ପ୍ରକଳ୍ପର ଶିଳାନ୍ୟାସ କରି ରାଜ୍ୟବାସୀଙ୍କୁ ବଡ଼ ଉପହାର ଦେଲେ । ମଣିପୁରକୁ ସାହସ ଓ ଦୃଢ଼ତାର ଭୂମି କହିବା ସହ ଶାନ୍ତି ରାସ୍ତାରେ ଆଗକୁ ବଢି ଭବିଷ୍ୟତ ଗଢିବା ପାଇଁ ରାଜ୍ୟବାସୀଙ୍କୁ ଦେଇଛନ୍ତି ଆହ୍ବାନ ।

ମଣିପୁର ପୂର୍ବରୁ ମିଜୋରାମବାସୀଙ୍କୁ ମଧ୍ୟ ବଡ଼ ଉପହାର ଦେଇଛନ୍ତି ପ୍ରଧାନମନ୍ତ୍ରୀ । ରାଜଧାନୀ ଆଇଜଲରେ ୩ଟି ଏକ୍ସପ୍ରେସ ଟ୍ରେନକୁ ପତାକା ଦେଖାଇ ଶୁଭାରମ୍ଭ କରିଛନ୍ତି। ଭୈରବୀ-ସୈରଙ୍ଗ ରେଳ ଲାଇନର ଉଦଘାଟିତ ହେବା ପରେ ମିଜୋରାମ ଭାରତୀୟ ରେଳ ନେଟୱର୍କ ସହିତ ସଂଯୁକ୍ତ ହୋଇଛି । ୪୫ଟି ସୁଡ଼ଙ୍ଗ ଓ ୫୫ଟି ବଡ଼ ସେତୁ ରହିଥିବା ଏହି ଚାଲେଞ୍ଜପୂର୍ଣ୍ଣ ୫୧ କିଲୋମିଟର ଦୀର୍ଘ ରେଳପଥ ମିଜୋରାମ ବିକାଶର ବାର୍ତ୍ତାବହ ହେବ ବୋଲି କହିଛନ୍ତି ମୋଦି । ନୂଆ ରେଳ ଲାଇନ ମିଜୋରାମକୁ ଗୌହାଟି, କୋଲକାତା, ଦିଲ୍ଲୀ ଓ ଦେଶର ଅନ୍ୟ ସହର ସହିତ ସଂଯୋଗ କରିବା ସହ ମିଜୋରାମବାସୀଙ୍କ ଜୀବନ ଓ ଜୀବିକାର ବିରାଟ ପରିବର୍ତ୍ତନରେ ସହାୟକ ହେବ । ଏଥିସହ ମିଜୋରାମରେ ୯ ହଜାର କୋଟି ଟଙ୍କାର ବିକାଶ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ ହୋଇଛି।

୫ ରାଜ୍ୟ ଗସ୍ତର ପ୍ରଥମ ପର୍ଯ୍ୟାୟରେ ମିଜୋରାମ, ମଣିପୁର ଓ ଆସାମ ଗସ୍ତ କରି ଉତ୍ତର-ପୂର୍ବାଞ୍ଚଳକୁ ବଡ଼ ଭେଟି ଦେଇଛନ୍ତି ପ୍ରଧାନମନ୍ତ୍ରୀ । ଆସନ୍ତାକାଲି ପଶ୍ଚିମବଙ୍ଗ ଓ ବିହାରରେ ଏକାଧିକ କାର୍ଯ୍ୟକ୍ରମରେ ସାମିଲ ହେବେ ମୋଦି । ୩ ଦିନିଆ ଗସ୍ତରେ ୫ ରାଜ୍ୟ ପାଇଁ ମୋଟ ୭୧ ହଜାର ୮୫୦ କୋଟିରୁ ଅଧିକ ମୂଲ୍ୟର ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କାର୍ଯ୍ୟକ୍ରମ ରହିଛି ।