ଅର୍ଗସ ବ୍ୟୁରୋ: ମଣିପୁରରେ ରାଜନୈତିକ ହଲଚଲ୍ । ଇସ୍ତଫା ଦେଲେ ମୁଖ୍ୟମନ୍ତ୍ରୀ ଏନ୍. ବୀରେନ ସିଂହ । ମଣିପୁର ରାଜ୍ୟପାଳ ଅଜୟ ଭଲ୍ଲାଙ୍କୁ ଭେଟି ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ଏନ୍.ବୀରେନ ସିଂହ । ରାଜ୍ୟପାଳଙ୍କୁ ଇସ୍ତଫା ଦେବା ବେଳେ ବୀରେନ ସିଂହଙ୍କ ସହ ମନ୍ତ୍ରୀ ଓ ବିଧାୟକଙ୍କ ସହିତ ବିଜେପି ସାଂସଦ ସମ୍ବିତ ପାତ୍ର ଉପସ୍ଥିତ ଥିଲେ ।

ଇସ୍ତଫା ଦେବା ପୂର୍ବରୁ ବୀରେନ ସିଂହ ଦିଲ୍ଲୀରେ କେନ୍ଦ୍ର ସ୍ଵରାଷ୍ଟ୍ର ମନ୍ତ୍ରୀ ଅମିତ ଶାହଙ୍କୁ ଭେଟିଥିଲେ । ବୀରେନ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ ଗୃହ ମନ୍ତ୍ରଣାଳୟ ସୁରକ୍ଷା ଏଜନ୍ସି ଗୁଡ଼ିକୁ ହାଇଆଲର୍ଟରେ ରହିବାକୁ କହିଛି । ସୋମବାର ସରକାର ବିରୋଧରେ ଆସିବାକୁ ଥିବା ଅନାସ୍ଥା ପୂର୍ବରୁ ବୀରେନ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ।

ଦୀର୍ଘ ଦିନରୁ ମଣିପୁରର ବିଜେପି ବିଧାୟକ ଓ ବୀରେନ ସିଂହଙ୍କ ମଧ୍ୟରେ ତୁ ତୁ ମେଁ ମେଁ ଚାଲିଥିଲା । ଗତବର୍ଷ ଅକ୍ଟୋବରରେ ବିଜେପିର ୧୯ ବିଧାୟକ ବୀରେନ ସିଂହଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇବାକୁ ଦାବି କରିଥିଲେ । ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟିଛି ଲେଖିଥିଲେ ବିଜେପି ବିଧାୟକ । ଆଉ ଉକ୍ତ ଚିଠିରେ ବିଧାନସଭା ବାଚସ୍ପତିଙ୍କ ସହ କେତେ ଜଣ ମନ୍ତ୍ରୀ ହସ୍ତାକ୍ଷର କରିଥିଲେ ।

ପ୍ରଧାନମନ୍ତ୍ରୀଙ୍କୁ ଲେଖିଥିବା ଚିଠିରେ ବିଧାୟକ କହିଥିଲେ, ମଣିପୁରର ଲୋକ ବିଜେପି ସରକାରକୁ ପଚାରୁଛନ୍ତି ଯେ, ରାଜ୍ୟକୁ ଏବେ ଯାଏଁ ଶାନ୍ତି କାହିଁକି ଫେରି ନାହିଁ । ଯଦି ଶାନ୍ତି ନ ଫେରେ ତ ବିଧାୟକମାନେ ଇସ୍ତଫା ଦେବା ପାଇଁ ଲୋକ ଦାବି କରୁଛନ୍ତି । ତେବେ ବିଜେପି ବିଧାୟକଙ୍କ ଚିଠି ପୂର୍ବରୁ ବୀରେନ ଇସ୍ତଫା ଦେବେ ନାହିଁ ବୋଲି କହିଥିଲେ ।

Argus News | argus news | -Argusnews Home: Odisha Latest News, Breaking News, Trending News, Live TV and more