ଖୋଲୁଛି ଛାଙ୍ଗୁର ଓରଫ ଜଲାଲଉଦ୍ଦୀନ ନେଟୱର୍କର ଗୁମର । ଧର୍ମାନ୍ତରଣ ଷଡ଼ଯନ୍ତ୍ର ପଛରେ ବିଦେଶୀ ଲିଙ୍କ୍‌ର ପର୍ଦ୍ଦାଫାସ । ଛାଙ୍ଗୁର ଓ ନସରୀନକୁ ୭ ଦିନିଆ ରିମାଣ୍ଡରେ ନେଇ ୟୁପି ATS କରୁଛି ପଚରାଉଚରା । ଛାଙ୍ଗୁର ଟାର୍ଗେଟରେ ଥିଲେ ନିସନ୍ତାନ, ବିଧବା, ସ୍ବାମୀ ପରିତ୍ୟକ୍ତା ଓ ମାନସିକ ଦୁର୍ବଳ ମହିଳା । ଛାଙ୍ଗୁର ବିରୋଧରେ ଯୋଗୀ ସରକାରଙ୍କ ବୁଲଡୋଜର ଆକ୍ସନ ଜାରି । ସମାଜ ବିରୋଧୀ ଓ ଦେଶଦ୍ରୋହୀଙ୍କୁ ସିଏମ ଯୋଗୀଙ୍କ ଚେତାବନୀ ।

ମୁମ୍ବାଇରୁ ଦୁବାଇ ଯାଏ ଲମ୍ବିଛି ଧର୍ମାନ୍ତରଣ ନେଟୱର୍କ । ଧର୍ମାନ୍ତରଣ ରାକେଟର ମାଷ୍ଟରମାଇଣ୍ଡ ଅଭିଯୁକ୍ତ ଛାଙ୍ଗୁର ସହ ସହଯୋଗୀ ନୀତୁ ରୋହରା ଓରଫ ନସରୀନକୁ ୭ ଦିନିଆ ରିମାଣ୍ଡରେ ନେଇ ପଚରାଉଚରା ଆରମ୍ଭ କରିଛି ଉତ୍ତର ପ୍ରଦେଶ ATS । ଗତ ୧୫ ବର୍ଷ ଧରି ଉତ୍ତର ପ୍ରଦେଶରେ ଧର୍ମାନ୍ତରଣର ଜାଲ ବିଛାଇ ୧୫ ଶହରୁ ଅଧିକ ହିନ୍ଦୁ ମହିଳାଙ୍କ ଧର୍ମ ପରିବର୍ତ୍ତନ କରିଥିବା ଅଭିଯୁକ୍ତ ଜଲାଲଉଦ୍ଦୀନ କଳା କାରନାମାର ପର୍ଦ୍ଦାଫାସ କରିଛି ATS । ଛାଙ୍ଗୁର ବାବାର କୋଠିରେ ଲାଗିଥିବା ସିକ୍ରେଟ କ୍ୟାମେରା, ସିସିଟିଭି ଫୁଟେଜ ସହ ଗୁରୁତ୍ବପୂର୍ଣ୍ଣ କାଗତପତ୍ର ଜବତ କରି ତଦନ୍ତ ଜୋରଦାର କରିଛି ପୋଲିସ ।

ଛାଙ୍ଗୁର ବିରୋଧରେ ଯୋଗୀ ସରକାରଙ୍କ ବୁଲଡୋଜର ଆକ୍ସନ ଜାରି ରହିଛି । ବଳରାମପୁରରେ ୪୦ କୋଠରୀଯୁକ୍ତ ଆଲିସାନ ବଙ୍ଗଳାକୁ ମାଟିରେ ମିଶାଇଛି ୯ ବୁଲଡୋଜର । ଛାଙ୍ଗୁର ପରି ସମାଜ ବିରୋଧୀ, ଦେଶଦ୍ରୋହୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଶୁଣାଇଛନ୍ତି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ପୋଲିସ ସୂଚନା ଅନୁସାରେ ଛାଙ୍ଗୁର ଟାର୍ଗେଟରେ ଥିଲେ ଖାସ୍ ମହିଳା ।

ନିସନ୍ତାନ, ବିଧବା, ସ୍ବାମୀ ପରିତ୍ୟକ୍ତା ଓ ମାନସିକ ଦୁର୍ବଳ ମହିଳାଙ୍କୁ ଛାଙ୍ଗୁର ବାବା ଟାର୍ଗେଟ୍ କରୁଥିବା ଖୁଲାସା କରିଛି ATS । ପ୍ରଥମରୁ ଚିକିତ୍ସା ଓ ଚମତ୍କାର ନାଁରେ ଫସାଇ ପରେ ଝିଅଙ୍କ ବ୍ରେନୱାସ କରି ଧର୍ମ ବଦଳାଉଥିଲା ଛାଙ୍ଗୁର । ଦୁଇବର୍ଷ ପୂର୍ବରୁ ଭାରତ-ନେପାଳ ସୀମାରେ ଔଷଧ କେନ୍ଦ୍ର କରିବାକୁ ଯୋଜନା କରିଥିଲା ଛାଙ୍ଗୁର । ଏଥିପାଇଁ ବିଦେଶୀ ଫଣ୍ଡିଂ ମିଳିବା ଆରମ୍ଭ ହୋଇସାରିଥିଲା । ଛାଙ୍ଗୁର ବାବାର ସହଯୋଗୀ ଧର୍ମାନ୍ତରଣ କରିବାକୁ ସାର୍ବଜନିକ କାର୍ଯ୍ୟକ୍ରମ କରୁଥିବା ନେଇ ଅଭିଯୋଗ ପରେ ଯୋଜନା ପଣ୍ଡ କରିଥିଲା ପୋଲିସ ।

ଗତ ଶନିବାର ଛାଙ୍ଗୁର ଓ ସହଯୋଗୀ ନସରୀନକୁ ଗିରଫ କରିଥିଲା ଏଟିଏସ । ଉଭୟ ୟୁପି ବଳରାମପୁରର ମଧୁପୁରରେ ଲୁଚି ରହିଥିଲେ । ଗିରଫ ହେବା ପୂର୍ବରୁ ଉଭୟଙ୍କ ବିରୋଧରେ ଜାମିନ ବିହୀନ ଗିରଫ ପରୱାନା ଜାରି ହେବା ସହ ୫୦ ହଜାର ଟଙ୍କାର ଇନାମ ଘୋଷଣା କରିଥିଲା ୟୁପି ପୋଲିସ । ଦୁଇ ମୁଖ୍ୟ ଅଭିଯୁକ୍ତଙ୍କୁ ATS ଜେରା ଆରମ୍ଭ କରିଥିବାବେଳେ ଖୁବଶୀଘ୍ର ଜଲାଲଉଦ୍ଦୀନର ଧର୍ମାନ୍ତରୀକରଣ ଷଡ଼ଯନ୍ତ୍ରର ପର୍ଦ୍ଦାଫାସ ହେବା ସମ୍ଭାବନା ରହିଛି ।

Argus News | argus news | -Argusnews Home: Odisha Latest News, Breaking News, Trending News, Live TV and more