ସମ୍ପନ୍ନ ହୋଇଛି ମହାକୁମ୍ଭ, ଏକତାର ଭବ୍ୟ ମହାଯଜ୍ଞ । ଭବ୍ୟ ସଂଗମରେ 140 କୋଟି ଭାରତୀୟ 45 ଦିନ ଧରି ଯେଉଁ ଆସ୍ଥା ପ୍ରକଟ କରିଛନ୍ତି ତାହା ଅତ୍ୟନ୍ତ ଆଶ୍ଚର୍ଯ୍ୟଜନକ ବୋଲି କହିଛନ୍ତି ପ୍ରଧାନମନ୍ତ୍ରୀ । ମହାକୁମ୍ଭ ଶେଷ ହେବା ପରେ ମନରେ ଆସିଥିବା ବିଚାରକୁ ନେଇ ବ୍ଲଗ ଲେଖିଛନ୍ତି ମୋଦି । ମହାକୁମ୍ଭରେ ଶ୍ରଦ୍ଧାଳୁଙ୍କ ବିପୁଳ ଅଂଶଗ୍ରହଣ କେବଳ ଏକ ରେକର୍ଡ ନୁହେଁ । ଏହା ଏକ ମଜଭୁତ ଭିତ୍ତିଭୂମି ସ୍ଥାପନ କରିବ ଯାହା ଆଗାମୀ ଶତାବ୍ଦୀ ପାଇଁ ଆମ ସଂସ୍କୃତି ଏବଂ ଐତିହ୍ୟକୁ ସୁଦୃଢ଼ ଏବଂ ସମୃଦ୍ଧ କରିବ ବୋଲି ଆଶାବ୍ୟକ୍ତ କରିଛନ୍ତି ପିଏମ ମୋଦି । ପ୍ରୟାଗରାଜର ମହାକୁମ୍ଭ ଆଜି ସମଗ୍ର ବିଶ୍ୱରେ ମ୍ୟାନେଜମେଣ୍ଟ ପ୍ରଫେସନାଲ, ପ୍ଲାନିଂ ଏକ୍ସପର୍ଟ ଏବଂ ପଲିସି ଷ୍ଟ୍ରାଟେଜିଷ୍ଟଙ୍କ ପାଇଁ ଗବେଷଣାର ବିଷୟ ପାଲଟିଛି । ନିଜ ଐତିହ୍ୟକୁ ନେଇ ଗର୍ବ ଅନୁଭବ କରୁଥିବା ଭାରତ ଆଜି ଏକ ନୂଆ ଶକ୍ତି ସହ ଆଗେଇ ଚାଲିଛି ।

ଏହି ଯୁଗ ହେଉଛି ପରିବର୍ତ୍ତନର ସେହି ଆହ୍ୱାନ, ଯାହା ଦେଶ ପାଇଁ ଏକ ନୂତନ ଭବିଷ୍ୟତ ଲେଖିବାକୁ ଯାଉଛି । ମହାକୁମ୍ଭରେ ସମାଜର ସବୁ ବର୍ଗ ଓ ପ୍ରତ୍ୟେକ ଅଞ୍ଚଳର ଲୋକ ଏକାଠି ହୋଇଥିଲେ। ଏକ ଭାରତ ଶ୍ରେଷ୍ଠ ଭାରତର ଏହି ସ୍ମରଣୀୟ ଦୃଶ୍ୟ କୋଟି କୋଟି ଦେଶବାସୀଙ୍କ ମଧ୍ୟରେ ଆତ୍ମସନ୍ତୋଷର ଏକ ମହାନ ପର୍ବ ପାଲଟିଥିଲା ବୋଲି ଲେଖିଛନ୍ତି ମୋଦି । ଏକତାର ମହାକୁମ୍ଭକୁ ସଫଳ କରିବା ପାଇଁ ଦେଶବାସୀଙ୍କ କଠିନ ପରିଶ୍ରମ, ପ୍ରୟାସ ଏବଂ ସଂକଳ୍ପରେ ଅଭିଭୂତ ହୋଇ ଦ୍ବାଦଶ ଜ୍ୟୋତିର୍ଲିଙ୍ଗ ମଧ୍ୟରୁ ପ୍ରଥମ ଶ୍ରୀସୋମନାଥ ଦର୍ଶନ କରିବାକୁ ଯିବାକୁ ମନସ୍ଥ କରିଛନ୍ତି ପ୍ରଧାନମନ୍ତ୍ରୀ । ଭାରତୀୟଙ୍କ ପାଇଁ ପ୍ରାର୍ଥନା କରିବା ସହ ଶ୍ରଦ୍ଧାର ସଂକଳ୍ପ ପୁଷ୍ପକୁ ଉତ୍ସର୍ଗ କରିବେ ବୋଲି ବ୍ଲକରେ ଉଲ୍ଲେଖ କରିଛନ୍ତି ପ୍ରଧାନମନ୍ତ୍ରୀ । ଦେଶବାସୀଙ୍କ ମଧ୍ୟରେ ଏକତାର ଏହି ଅବିରଳ ଧାରା ଜାରି ରହୁ ବୋଲି କାମନା କରିଛନ୍ତି ପ୍ରଧାନମନ୍ତ୍ରୀ ।