ଶେଷ ହୋଇଛି ୬ଦଶନ୍ଧିର ଯାତ୍ରା । ଭାରତୀୟ ବାୟୁସେନାରୁ ବିଦାୟ ନେଲା ମିଗ୍-୨୧ । ଆସନ୍ତାକାଲି ବାୟୁସେନାରୁ ବିଦାୟ ନେବ ଦେଶର ପ୍ରଥମ ସୁପରସୋନିକ୍ ଲଢ଼ୁଆ ବିମାନ । ପ୍ରାୟ ୬ ଦଶନ୍ଧି ଧରି ବାୟୁସେନାର ଏକ ସୁଦୃଢ଼ ଅଂଶ ଥିଲା ମିଗ୍-୨୧ । ଶତ୍ରୁମାନଙ୍କ ମଧ୍ୟରେ ଭୟ ସୃଷ୍ଟି କରିଥିବା ମିଗ୍-୨୧କୁ ଏକ ଭିନ୍ନ ଏବଂ ସ୍ୱତନ୍ତ୍ର ଉପାୟରେ ବିଦାୟ ଦେବାକୁ ବାୟୁସେନା ପ୍ରସ୍ତୁତ ହେଉଛି । ସେବାରୁ ନିବୃତ୍ତ ପୂର୍ବରୁ ଗତକାଲି ମିଗ୍ ବିମାନକୁ ୱାଟର୍ ସାଲ୍ୟୁଟ୍ ପ୍ରଦାନ କରାଯାଇଛି। ଆସନ୍ତାକାଲି ଚଣ୍ଡିଗଡ଼ ବାୟୁସେନା ଘାଟିରେ ଏକ ସ୍ବତନ୍ତ୍ର ଉତ୍ସବର ଆୟୋଜନ କରାଯାଇଛି ।

ସମାରୋହରରେ ମିଗ୍-୨୧ ଏକ ସ୍ୱତନ୍ତ୍ର ଫ୍ଲାଏପାଷ୍ଟ ପାଇଁ ଚଣ୍ଡିଗଡ଼ର ଆକାଶକୁ ଶେଷ ଥର ପାଇଁ ଉଡ଼ାଣ କରିବ। ୯୦ମିନିଟ୍‌ର ବିଦାୟ ଉତ୍ସବରେ ଗାର୍ଡ ଅଫ୍ ଅନର, ସ୍ମାରକୀ ପ୍ରଦର୍ଶନ କରାଯିବ । ଏହି ବିମାନ ୧୯୬୫, ୧୯୭୧, ୧୯୯୯ ଓ ୨୦୧୯ରେ ପ୍ରମୁଖ ସାମରିକ ଅଭିଯାନରେ ଅଂଶଗ୍ରହଣ କରିଛି। MiG-21 ହେଉଛି ଏକ ହାଲୁକା ସିଙ୍ଗଲ ପାଇଲଟ୍ ଲଢ଼ୁଆ ବିମାନ। ଏହି ଯୁଦ୍ଧ ବିମାନ ୧୮ ହଜାର ମିଟର ଉଚ୍ଚତାରେ ଉଡ଼ିପାରୁଥିଲା। ଆକାଶରୁ ଆକାଶରେ ନିକ୍ଷେପ ହେଉଥିବା କ୍ଷେପଣାସ୍ତ୍ର ଓ ବୋମା ବହନ କରିବାରେ ସକ୍ଷମ।

ଭାରତୀୟ ବାୟୁସେନାର ସବୁଠାରୁ ଦୀର୍ଘ ସେବା ପ୍ରଦାନକାରୀ ଲଢ଼ୁଆ ବିମାନ, MiG-21। 62 ବର୍ଷର ଗୌରବମୟ ସେବା ପରେ, ଏହି ବିମାନ ସେପ୍ଟେମ୍ବର 26 ତାରିଖରେ ଚଣ୍ଡିଗଡ଼ରେ ଶେଷ ଉଡ଼ାଣ କରିବ। ମିଗ୍-୨୧ର ବିଦାୟର ଏହି ଐତିହାସିକ ମୁହୂର୍ତ୍ତକୁ ସ୍ୱତନ୍ତ୍ର କରିବା ପାଇଁ, ବାୟୁସେନା ଏକ ସ୍ୱତନ୍ତ୍ର କାର୍ଯ୍ୟକ୍ରମ ପ୍ରସ୍ତୁତ କରିଛି ଯେଉଁଥିରେ ଦେଶର ପ୍ରତିରକ୍ଷା ମନ୍ତ୍ରୀ ଏବଂ ବାୟୁସେନା ମୁଖ୍ୟ ମଧ୍ୟ ଉପସ୍ଥିତ ରହିବେ। ମିଗ୍-୨୧ ଭାରତୀୟ ବାୟୁସେନାର ପ୍ରଥମ ସୁପରସୋନିକ୍ ଲଢୁଆ ବିମାନ। ଏହା ୧୯୬୫ ଏବଂ ୧୯୭୧ ଯୁଦ୍ଧରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ଏହି ବିମାନ ପାକିସ୍ତାନର ଅନେକ ଆକ୍ରମଣକୁ ବିଫଳ କରିଥିଲା ଏବଂ ଭାରତୀୟ ସାମରିକ ଶକ୍ତିର ପ୍ରତୀକ ପାଲଟିଥିଲା। ବର୍ତ୍ତମାନ ଏହାକୁ ସେହି ସ୍ଥାନରୁ ଅନ୍ତିମ ବିଦାୟ ଦିଆଯାଉଛି ଯେଉଁଠାରୁ ଏହା ପ୍ରାୟ ଛଅ ଦଶନ୍ଧି ପୂର୍ବେ ବାୟୁସେନାରେ ଯୋଗ ଦେଇଥିଲା।

୨୦୧୯ ମସିହାରେ ଯେତେବେଳେ ୱିଙ୍ଗ କମାଣ୍ଡର ଅଭିନନ୍ଦନ ବର୍ଥମାନ ଏହି ବିମାନ ସାହାଯ୍ୟରେ ଏକ ପାକିସ୍ତାନୀ ଏଫ-୧୬ ଯୁଦ୍ଧ ବିମାନକୁ ଖସାଇ ଦେଇଥିଲେ। ସେତେବେଳେର ମିଗ୍-୨୧ର ସ୍ମୃତି ଏବେ ବି ଲୋକଙ୍କ ମନରେ ତାଜା ହୋଇ ରହିଛି। ଏହି ସାହସିକ କାର୍ଯ୍ୟ ପୁଣି ଥରେ ବିଶ୍ୱକୁ ମିଗ୍-୨୧ର କ୍ଷମତା ଏବଂ ଭାରତର ବାୟୁ ଶକ୍ତିକୁ ଅନୁଭବ କରାଇଥିଲା।

ଭାରତୀୟ ବାୟୁସେନା ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ଭିଡିଓ ସେୟାର କରିଛି ଯାହା ମିଗ୍-୨୧ର ଗୌରବମୟ ଯାତ୍ରାକୁ ଦର୍ଶାଉଛି। ଏହି ଭିଡିଓରେ ପୁରୁଣା ଫୁଟେଜ୍, ଯୁଦ୍ଧ ଅଭ୍ୟାସ ଏବଂ ମିଶନର ଝଲକ ଏବଂ ପାଇଲଟମାନଙ୍କ ଭାବନା ରେକର୍ଡ କରାଯାଇଛି। ବାୟୁସେନା ଏହି ଐତିହାସିକ ବିଦାୟ ଅବସରରେ ମିଗ୍-୨୧ ସହିତ ଜଡିତ ପାଇଲଟମାନଙ୍କୁ ମଧ୍ୟ ନିମନ୍ତ୍ରଣ କରିଛି ଯାହାଦ୍ୱାରା ସେମାନେ ଏହି ମୁହୂର୍ତ୍ତର ସାକ୍ଷୀ ହୋଇପାରିବେ।

ଅଧିକ ପଢ଼ନ୍ତୁ ଦେଶ ଖବର:

Argus News | argus news | Odisha Latest News, Breaking News, Trending News, Live TV