ପ୍ରଧାନମନ୍ତ୍ରୀ ମୋଦିଙ୍କ ୧୨୪ ତମ ମନ କୀ ବାତ କାର୍ଯ୍ୟକ୍ରମ । ବିଭିନ୍ନ ପ୍ରସଙ୍ଗରେ ନିଜ ମନର କଥା କହିଛନ୍ତି ପ୍ରଧାନମନ୍ତ୍ରୀ ମୋଦି । କାର୍ଯ୍ୟକ୍ରମରେ କେନ୍ଦୁଝର ଜିଲ୍ଲାର କୀର୍ତ୍ତନ ମଣ୍ଡଳୀର ପ୍ରସାୟକୁ ପ୍ରଶଂସା କରିଛନ୍ତି ମୋଦି । କୀର୍ତ୍ତନ ମାଧ୍ୟମରେ ପରିବେଶ ସୁରକ୍ଷା, ଜଙ୍ଗଲ ନିଆଁ ବିଷୟରେ ସଚେତନ କରୁଛନ୍ତି କେନ୍ଦୁଝରର ରାଧାକ୍ରିଷ୍ଣ ସଂକୀର୍ତ୍ତନ ମଣ୍ଡଳୀ । ଭକ୍ତିଭାବ ସହ ପରିବେଶ ସୁରକ୍ଷାର ମଧ୍ୟ ବାର୍ତ୍ତା ଦେଉଛନ୍ତି କୀର୍ତ୍ତନ ମଣ୍ଡଳୀ ।

ଏହି ଅଭିବନ ପ୍ରୟାସ ପ୍ରମିଳା ପ୍ରଧାନ ନାମକ ମହିଳାଙ୍କ ଦ୍ବାରା ଆରମ୍ଭ ହୋଇଛି । ଜଙ୍ଗଲ ଏବଂ ପରିବେଶ ସୁରକ୍ଷା ପାଇଁ ପ୍ରମିଳା ପାରମ୍ପରିକ ଗୀତରେ ନୂଆ ପଦ ଯୋଡ଼ି ତାକୁ ସଙ୍କୀର୍ତ୍ତନ ମାଧ୍ୟମରେ ପରିବେଷଣ କରୁଛନ୍ତି । ତେବେ ଏହି ଉଦାହରଣ ଆମ ଲୋକ ଗୀତ ଏବଂ ପରମ୍ପରା କଥା ମାନେ ପକାଇ ଦେଉଛି ବୋଲି କହିଛନ୍ତି ମୋଦି । ଭାରତର ବିବିଧତାର ଝଲକ ଲୋକଗୀତ ଏବଂ ପରମ୍ପରାରେ ଦେଖିବାକୁ ମିଳେ । ଆଉ ଏଥିରେ ଆମର ଭଜନ ଓ କୀର୍ତ୍ତନର ସ୍ଵତନ୍ତ୍ର ସ୍ଥାନ ଅଛି ବୋଲି କହିଛନ୍ତି ପ୍ରଧାନମନ୍ତ୍ରୀ ।

ଅନ୍ୟପଟେ ଆସନ୍ତା ୭ ଅଗଷ୍ଟରେ ପାଳନ ହେବ ୧୦ମ ନ୍ୟାସନାଲ୍ ହ୍ୟାଣ୍ଡଲୁମ୍ ଡେ । ମନ କୀ ବାତ କାର୍ଯ୍ୟକ୍ରମରେ ଦେଶର ବିଭିନ୍ନ ସ୍ଥାନରେ ହ୍ୟାଣ୍ଡଲୁମ୍ ଷ୍ଟାର୍ଟଅପର ସଫଳତା କଥା କହିଛନ୍ତି ପ୍ରଧାନମନ୍ତ୍ରୀ ମୋଦି । ଦେଶରେ ଏବେ ୩ ହଜାରରୁ ଅଧିକ ହ୍ୟାଣ୍ଡଲୁମ୍ ଷ୍ଟାର୍ଟଅପ୍ ଅଛି । ଓଡ଼ିଶାର ମୟୂରଭଞ୍ଜର ଏକ ସାନ୍ତାଳୀ ଶାଢ଼ୀ ଷ୍ଟାର୍ଟଅପର ଉଦାହରଣ ବି ଦେଇଛନ୍ତି ପିଏମ୍ । ସେ କହିଛନ୍ତି ୬୫୦ରୁ ଅଧିକ ଆଦିବାସୀ ମହିଳା ସାନ୍ତାଳୀ ଶାଢ଼ୀକୁ ପୁଣି ଉଜ୍ଜୀବିତ କରିଛନ୍ତି । ଏହି ମହିଳାମାନେ ପ୍ରତି ମାସରେ ହଜାର ହଜାର ଟଙ୍କା ଆୟ କରୁଛନ୍ତି । ଏମାନେ ଶାଢ଼ୀ ତିଆରି କରିବା ସହ ନିଜ ପରିଚୟ ମଧ୍ୟ ସୃଷ୍ଟି କରୁଛନ୍ତି ।