ଭାରତ କେବେ ମଧ୍ୟସ୍ଥତା ଚାହେଁନି । ଆମେରିକା ରାଷ୍ଟ୍ରପତି ଡୋନାଲଡ୍ ଟ୍ରମ୍ପଙ୍କୁ ଏଭଳି ରୋକଠୋକ୍ ଶୁଣାଇ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଜମ୍ମୁ ଓ କାଶ୍ମୀର ପ୍ରସଙ୍ଗରେ ମଧ୍ୟସ୍ଥତା ଭାରତର ଦରକାର ନାହିଁ । କିମ୍ବା ଏ ପ୍ରସଙ୍ଗରେ ମଧ୍ୟସ୍ଥତା ଭାରତ ଚାହେଁନାହିଁ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କୁ ଫୋନରେ କହିଛନ୍ତି ।

ଜି-୭ ବୈଠକ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ମଧ୍ୟରେ ସାକ୍ଷାତ ଆଲୋଚନା କରିବାର କାର୍ଯ୍ୟକ୍ରମ ରହିଥିଲା। କିନ୍ତୁ ଟ୍ରମ୍ପ ଆଗୁଆ ଫେରିବାକୁ ପଡିବାରୁ ଦୁଇଦେଶର ରାଷ୍ଟ୍ରମୁଖ୍ୟ ଫୋନରେ କଥାବାର୍ତ୍ତା ହୋଇଥିଲା । ଏଥିପାଇଁ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ଅନୁରୋଧ କରିଥିଲେ । ଦୁଇ ରାଷ୍ଟ୍ରମୁଖ୍ୟ ୩୫ ମିନିଟ୍ ଧରି ଆଲୋଚନା କରିଥିଲେ ।

ଏପ୍ରିଲ ୨୨ ପହଲଗାମ୍ ଆତଙ୍କୀ ଆକ୍ରମଣ ପରେ ଦୁଇ ରାଷ୍ଟ୍ରମୁଖ୍ୟଙ୍କ ମଧ୍ୟରେ ହୋଇଥିବା ଆଲୋଚନାରେ ସମବେଦନା ଜଣାଇଥିଲେ ଏବଂ ଆତଙ୍କବାଦ ବିରୋଧରେ ଲଢ଼ିବାରେ ସମର୍ଥନ ମଧ୍ୟ ଜଣାଇଥିଲେୂ ଟ୍ରମ୍ପ । ଅପରସେନ ସିନ୍ଦୁର ନେଇ ଆମେରିକା ରାଷ୍ଟ୍ରପତିଙ୍କ ସହ ପ୍ରଧାନମନ୍ତ୍ରୀ ବିସ୍ତୃତ କଥାବାର୍ତ୍ତା କରିଥିଲେ । ଭାରତ ଓ ପାକିସ୍ତାନ ମଧ୍ୟରେ ଅସ୍ତ୍ରବିରତି ପାଇଁ ଆମେରିକା ପକ୍ଷରୁ କୌଣସି ଆଲୋଚନା ହୋଇନଥିଲା । ଅସ୍ତ୍ରବିରତି ପାଇଁ ପାକିସ୍ତାନର ଅନୁରୋଧରେ ଦୁଇ ଦେଶର ଡିଜିଏମଓ ସ୍ତରୀୟ ଆଲୋଚନା ହୋଇଥିଲା ବୋଲି ବୈଦେଶିକ ସଚିବ ବିକ୍ରମ ମିଶ୍ରି କହିଛନ୍ତି ।

ଅନ୍ୟପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ କାନାଡା ପ୍ରଧାନମନ୍ତ୍ରୀ ମାର୍କ କାର୍ଣ୍ଣିଙ୍କ ମଧ୍ୟରେ ଦ୍ବିପାକ୍ଷିକ ସମ୍ପର୍କ ବୃଦ୍ଧିନେଇ ଗୁରୁତ୍ବପୂର୍ଣ୍ଣ ଆଲୋଚନା ହୋଇଛି । ଡିଜିଟାଲ ଟ୍ରାନ୍ସଫର୍ମେସନ, ଆର୍ଟିଫିସିଆଲ ଇଣ୍ଟେଲିଜେନ୍ସ, ଏଲଏନଜି, ଖାଦ୍ୟ ସୁରକ୍ଷା, ଉଚ୍ଚଶିକ୍ଷା, ଶକ୍ତି ଯୋଗାଣକୁ ନେଇ ଆଲୋଚନା ହୋଇଥିଲା । ଦୁଇ ଦେଶ ମଧ୍ୟରେ ମୁକ୍ତ ଓ ଅବାଧ ବାଣିଜ୍ୟ ପାଇଁ ବୈଠକରେ ମତ ପ୍ରକାଶ ପାଇଥିଲା ।

ବାଣିଜ୍ୟିକ ସମ୍ପର୍କକୁ ପୁଣି ଆଗକୁ ନେବା ପାଇଁ ଦୁଇ ଦେଶର ବରିଷ୍ଠ ଅଧିକାରୀଙ୍କ ମଧ୍ୟରେ ଖୁବଶୀଘ୍ର ଆଲୋଚନା କରାଯିବାକୁ ଉଭୟ ଦେଶ ରାଜି ହୋଇଛନ୍ତି । ମାର୍କ କାର୍ଣ୍ଣି ନୂଆ ପ୍ରଧାନମନ୍ତ୍ରୀ ଭାବେ ନିର୍ବାଚିତ ହେବା ପରେ ପ୍ରଥମ ଥର ପାଇଁ କାନାଡା ପ୍ରଧାନମନ୍ତ୍ରୀ ଓ ନରେନ୍ଦ୍ର ମୋଦିଙ୍କ ମଧ୍ୟରେ ଆଲୋଚନା ହୋଇଥିଲା । ଗତକାଲି ଜି-୭ ବୈଠକରେ ଯୋଗ ଦେବା ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ମାର୍କ କାର୍ଣ୍ଣିଙ୍କ ମଧ୍ୟରେ ଗୁରୁତ୍ବପୂର୍ଣ୍ଣ ଆଲୋଚନା ହୋଇଥିଲା । ଏହାପରେ ପ୍ରଧାନମନ୍ତ୍ରୀ କ୍ରୋଏସିଆ ଗସ୍ତରେ ଯାଇଛନ୍ତି ।

Argus News | argus news | Odisha Latest News, Breaking News, Trending News, Live TV