ଆଜିଠାରୁ ଆରମ୍ଭ ହେବାକୁ ଯାଉଛି ସଂସଦର ମୌସୁମୀ ଅଧିବେଶନ । ଅଗଷ୍ଟ ୧୩ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଅଧିବେଶନ ବେଶ୍ ସରଗରମ ହେବାକୁ ଯାଉଛି । ୧୮ତମ ଲୋକସଭାର ଅଷ୍ଟମ ଅଧିବେଶନରେ କେନ୍ଦ୍ର ସରକାର ଅନେକ ଗୁରୁତ୍ୱପୂର୍ଣ୍ଣ ବିଲ୍ ଆଣିବାକୁ ପ୍ରସ୍ତୁତି କରିଥିବା ବେଳେ, ବିରୋଧୀ ମଧ୍ୟ ବିଭିନ୍ନ ପ୍ରସଙ୍ଗରେ ସରକାରଙ୍କୁ ଘେରିବା ପାଇଁ ପ୍ରସ୍ତୁତ କରିଛନ୍ତି ରଣନୀତି ।

ମୌସୁମୀ ଅଧିବେଶନରେ ସରକାର ୫ଟି ନୂଆ ବିଲ୍ ଆଗତ କରିବା ସହ ୨ଟି ପେଣ୍ଡିଂ ବିଲ୍‌କୁ ପାସ୍ କରାଇବା ପାଇଁ ଲକ୍ଷ୍ୟ ରଖିଛନ୍ତି । ଏଥିମଧ୍ୟରେ ଆୟକର ସଂଶୋଧନ ବିଲ୍ ଏବଂ ସୁପ୍ରିମକୋର୍ଟର ବିଚାରପତି ସଂଖ୍ୟା ବୃଦ୍ଧି ସମ୍ପର୍କିତ ବଡ଼ ବିଲ୍ ସାମିଲ ରହିଛି, ଯାହା ପୂର୍ବରୁ ଆସିଥିବା ଅଧ୍ୟାଦେଶ ବଦଳରେ ସ୍ଥାନ ପାଇବ ।

ଏହାଛଡ଼ା ଜନ୍ମ-ମୃତ୍ୟୁ ପଞ୍ଜୀକରଣ ଏବଂ ଜାତୀୟ ସମ୍ମାନ ରକ୍ଷା ଭଳି ଜନସାଧାରଣଙ୍କ ସହ ଜଡ଼ିତ ଗୁରୁତ୍ୱପୂର୍ଣ୍ଣ ବିଲ୍ ଉପରେ ମଧ୍ୟ ଆଲୋଚନା ସମ୍ଭାବନା ରହିଛି । ଗୋଟିଏ ପଟେ ସରକାର ଗୁରୁତ୍ଵପୂର୍ଣ୍ଣ ବିଲ ପାସ କରାଇବାକୁ ଲକ୍ଷ୍ୟ ରଖିଥିବାବେଳେ ବିରୋଧୀ ଦଳ ପ୍ରସଙ୍ଗଭିତ୍ତିକ ଆଲୋଚନା ପାଇଁ ଅଣ୍ଟା ଭିଡ଼ିଛନ୍ତି । ଗତକାଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ଅଧ୍ୟକ୍ଷତାରେ ବସିଥିବା ସର୍ବଦଳୀୟ ବୈଠକକୁ ବୟକଟ କରିଥିଲେ ବିରୋଧୀ ।

ସେହିପରି ଚଳିତ ମୌସୁମୀ ଅଧିବେଶନରେ ଅନେକ ଗୁରୁତ୍ୱପୂର୍ଣ ବିଲ୍‌ ଆସିପାରେ । ପ୍ରିଭେନସନ ଅଫ ଇନସଲ୍ଟ ଟୁ ନ୍ୟାସନାଲ ଅନର ଆମେଣ୍ଡମେଣ୍ଟ ବିଲ୍ ଆସିପାରେ । ''ବନ୍ଦେ ମାତରମ୍" ଗାନ ସମୟରେ ଉଦ୍ଦେଶ୍ୟମୂଳକ ଭାବେ ବାଧା ସୃଷ୍ଟି କଲେ ଦଣ୍ଡବିଧାନ ପାଇଁ ଏହି ବିଲ୍ ମାଧ୍ୟମରେ ୧୯୭୧ର ଆଇନରେ ସଂଶୋଧନ ହେବ ।

ଏହାସହ ଜନ୍ମ ଓ ମୃତ୍ୟୁ ପଞ୍ଜୀକରଣ ସଂଶୋଧନ ବିଲ୍, ଆୟକର ସଂଶୋଧନ ବିଲ୍, ସୁପ୍ରିମକୋର୍ଟ ବିଚାରପତିଙ୍କ ସଂଖ୍ୟା ସଂଶୋଧନ ବିଲ୍, ସୂକ୍ଷ୍ମ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ବିକାଶ ସଂଶୋଧନ ବିଲ୍ ଆସିପାରେ । ସେହିପରି ସ୍ଥଗିତ ରଖାଯାଇଥିବା ବିଲ ମଧ୍ୟରେ ରହିଛି ବିଦେଶୀ ଅନୁଦାନ ନିୟନ୍ତ୍ରଣ ସଂଶୋଧନ ବିଲ୍, ବିକଶିତ ଭାରତ ଶିକ୍ଷା ଅଧିଷ୍ଠାନ ବିଲ୍, ୧୩୦ତମ ସମ୍ବିଧାନ ସଂଶୋଧନ ବିଲ୍ ।