ତୁର୍କୀଏ ବିମାନବନ୍ଦରରେ ଫସିଛନ୍ତି ୨୫୦ରୁ ଅଧିକ ଭାରତୀୟ, ୪୦ ଘଣ୍ଟା ହେଲା...
ଲଣ୍ଡନରୁ ମୁମ୍ବାଇ ଫେରୁଥିଲେ, ହେଲେ ତୁର୍କୀଏରେ ଫସିଗଲେ । ମେଡିକାଲ୍ ଏମରଜେନ୍ସି ପାଇଁ ବିମାନ ଓହ୍ଲାଇଥିଲା । ଦେଖୁ ଦେଖୁ ୪୦ ଘଣ୍ଟା ବିତିଥିବା ବେଳେ ଫେରୁ ପାରୁ ନାହାନ୍ତି ଯାତ୍ରୀ । ପ୍ରାୟ ୨୫୦ରୁ ଅଧିକ ଭାରତୀୟ ଯାତ୍ରା ସମସ୍ୟାର ସମ୍ମୁଖୀନ ହୋଇଛନ୍ତି । ଭର୍ଜିନ ଆଟଲାଣ୍ଟିକ ବିମାନରେ ଥିବା ଯାତୀ ୨ ଦିନ ହେଲାଣି ତୁର୍କୀଏର ଦିୟାରବାକିର ବିମାନବନ୍ଦରରେ ଫସି ରହିଛନ୍ତି ।
ଏୟାରଲାଇନ୍ ମୁଖପାତ୍ର ଅନୁସାରେ, ଏପ୍ରିଲ୍ ୨ରେ ଲଣ୍ଡନରୁ ମୁମ୍ବାଇ ଆସୁଥିବା VS358 ବିମାନ ମେଡିକାଲ୍ ଏମରଜେନ୍ସି ପାଇଁ ଦିୟାରବାକିର ଏୟାରପୋର୍ଟ ଅବତରଣ କରିଥିଲା । ତେବେ ଅବତରଣ ପରେ ବିମାନରେ ଦେଖା ଦେଇଥିଲା ଯାନ୍ତ୍ରିକ ତ୍ରୁଟି । ଆଉ ଯାନ୍ତ୍ରିକ ତ୍ରୁଟିର ଯାଞ୍ଚ ଚାଲିଥିବା ବେଳେ ଯାତ୍ରୀ ୪୦ ଘଣ୍ଟା ହେଲାଣି ଅସୁବିଧା ଭୋଗୁଛନ୍ତି ।
ଯାତ୍ରୀଙ୍କ ପରିବାର ଲୋକ ଏନେଇ ସୋସିଆଲ୍ ମିଡିଆରେ ଅଭିଯୋଗ କରିଛନ୍ତି । ଫଟୋ ଓ ଭିଡିଓ ପୋଷ୍ଟ କରି ଲେଖିଛନ୍ତି, ବିମାନଟି ଏକ ସୈନ୍ୟ ବିମାନବନ୍ଦରରେ ଅବତରଣ କରିଛି । ଯାତ୍ରୀଙ୍କୁ ସର୍ବନିମ୍ନ ସୁବିଧା ମିଳୁ ନାହିଁ । ବିମାନରେ ୨୫୦ରୁ ଅଧିକ ଯାତ୍ରୀ ଥିବା ବେଳେ ବିମାନବନ୍ଦରରେ ଗୋଟିଏ ମାତ୍ର ଶୌଚାଳୟ ରହିଛି । ଏପରିକି ପ୍ରବଳ ଥଣ୍ଡ ସତ୍ତ୍ଵେ ଯାତ୍ରୀଙ୍କୁ କମ୍ବଳ ଦିଆଯାଉ ନାହିଁ ।
ଏବେ ସଦ୍ୟ ସୂଚନା ଅନୁସାରେ, ତ୍ରୁଟି ପାଇଁ ଏୟାରଲାଇନ୍ କ୍ଷମା ପ୍ରାର୍ଥନା କରିଛି । ଯାତ୍ରୀ ଓ ଚାଳକଙ୍କ ସୁରକ୍ଷା ସର୍ବୋଚ୍ଚ ପ୍ରାଥମିକତା କହିବା ସହ ଅନୁମତି ମିଳିଲେ ବିମାନ ଶୁକ୍ରବାର ଦିନ ୧୨ଟାରେ ମୁମ୍ବାଇ ଅଭିମୁଖେ ଉଡ଼ାଣ ଭରିବ ବୋଲି କୁହା ଯାଇଛି । ଅନୁମତି ନ ମିଳିଲେ ତୁର୍କୀଏର ଅନ୍ୟ ବିମାନବନ୍ଦରରୁ ବିକଳ୍ପ ବିମାନରେ ଯାତ୍ରୀଙ୍କୁ ମୁମ୍ବାଇ ପହଞ୍ଚାଇ ଦିଆଯିବ ବୋଲି କହିଛି ଏୟାର ଲାଇନ୍ ।
📱 Get Argus News App
✨
ଯାତ୍ରୀଙ୍କୁ ରହିବା ଲାଗି ହୋଟେଲ୍ ପ୍ରଦାନ ସହ ଖାଇବା ପିଇବା ସୁବିଧା ଉପଲବ୍ଧ କରାଯାଇଥିବା ଏୟାର ଲାଇନ୍ କହିଛି । ତେବେ ୪୦ ଘଣ୍ଟା ପରେ ଏୟାରଲାଇନ୍ ଯାତ୍ରୀଙ୍କ ପାଇଁ ବ୍ୟବସ୍ଥା କରିବାକୁ ନେଇ ଅସନ୍ତୋଷ ପ୍ରକାଶ ପାଇଛି । ଘଟଣାରେ ଭାରତୀୟ ଦୂତାବାସ ମଧ୍ୟ ତୁର୍କୀଏ ବିଦେଶ ମନ୍ତ୍ରାଣାଳୟ ସହ ସମ୍ପର୍କରେ ରହିଛି ।