ଆସ୍ଥାର ମହାକୁମ୍ଭରେ ରେକର୍ଡ ଶ୍ରଦ୍ଧାଳୁଙ୍କ ବୁଡ
ତ୍ରିବେଣୀ ସଂଗମରେ ବୁଡ ପକାଇଲେ ୫୦କୋଟିରୁ ଅଧିକ ଶ୍ରଦ୍ଧାଳୁ
ବିଶ୍ବରେ ପ୍ରଥମଥର ପାଇଁ ଏକାଠି ହେଲେ ଏତେ ସଂଖ୍ୟକ ଶ୍ରଦ୍ଧାଳୁ
ରୁଷିଆ ଓ ଆମେରିକାର ଲୋକ ସଂଖ୍ୟାଠାରୁ ଅଧିକ ଲୋକଙ୍କ ବୁଡ

ଆସ୍ଥାର ମହାପର୍ବରେ ପ୍ରତିଦିନ ସାମିଲ ହେଉଛନ୍ତି ଲକ୍ଷ ଲକ୍ଷ ଶ୍ରଦ୍ଧାଳୁ । ଅତ୍ୟନ୍ତ ଶ୍ରଦ୍ଧା ଓ ଭାବର ସହ ତ୍ରିବେଣୀ ସଙ୍ଗମରେ ବୁଡ ପକାଉଛନ୍ତି ଭକ୍ତ । ପ୍ରୟାଗରାଜର ତ୍ରିବେଣୀ ସଂଗମରେ ବୁଡ ପକାଇବାକୁ ଲକ୍ଷ ଲକ୍ଷ ଶ୍ରଦ୍ଧାଳୁ ଏକାଠି ହେଉଛନ୍ତି । ଏଥିପାଇଁ ଉତ୍ତରପ୍ରଦେଶ ପ୍ରଶାସନ ପକ୍ଷରୁ ସ୍ବତନ୍ତ୍ର ବ୍ୟବସ୍ଥା କରାଯାଉଛି । ଆସ୍ଥାର ବୁଡ ପକାଇବାକୁ ଆଜି ଭିଭିଆଇପିଙ୍କ ଭିଡ ଜମିଥିଲା । ଧର୍ମ, ଆଧ୍ୟାତ୍ମିକତା ଓ ସଂସ୍କୃତିର ମହାକୁମ୍ଭରେ ଲୋକସଭାର ବାଚସ୍ପତି ଓମ୍ ବିର୍ଲା ପୂଜାର୍ଚ୍ଚନା କରବା ସହ ବୁଡ ପକାଇଥିଲେ । ଗୋଆର ରାଜ୍ୟପାଳ ପିଏସ ଶ୍ରୀଧରନ ପିଲାଇ ଓ ମୁଖ୍ୟମନ୍ତ୍ରୀ ପ୍ରମୋଦ ସାଓ୍ବନ୍ତ ଅତ୍ୟନ୍ତ ଶ୍ରଦ୍ଧାର ସହ ମହାକୁମ୍ଭରେ ବୁଡ ପକାଇଥିଲେ । କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂ, ହରଦୀପ ସିଂ, ପୀୟୁଷ ଗୋଏଲ ମଧ୍ୟ ତ୍ରିବେଣୀ ସଂଗମରେ ବୁଡ ପକାଇଥିଲେ । କେବଳ ଧାର୍ମିକ ଦୃଷ୍ଟିକୋଣରୁ ନୁହେଁ ଆସ୍ଥା ଓ ଐତିହ୍ୟ ଦୃଷ୍ଟିର ମଧ୍ୟ କୁମ୍ଭମେଳାର ଗୁରୁତ୍ବ ରହିଛି । ପ୍ରଧାନମନ୍ତ୍ରୀଙ୍କ ଏକ ଭାରତ ଶ୍ରେଷ୍ଠ ଭାରତ ଲକ୍ଷ୍ୟ ନେଇ ଦେଶ ଆଗକୁ ବଢୁଛି । ଆଉ କୁମ୍ଭମେଳା ତାହାର ଏକ ନିଦର୍ଶନ।

ପୌଷ ପୂର୍ଣ୍ଣିମାରୁ ଆରମ୍ଭ ହୋଇଥିବା ଆସ୍ଥାର ମହାକୁମ୍ଭରେ ବର୍ତ୍ତମାନ ସୁଦ୍ଧା ୫୦କୋଟିରୁ ଅଧିକ ଶ୍ରଦ୍ଧାଳୁ ବୁଡ ପକାଇ ସାରିଛନ୍ତି । ଆମେରିକା ଓ ରୁଷିଆର ଲୋକସଂଖ୍ୟା ଠାରୁ ଅଧିକ ଲୋକ ତ୍ରିବେଣୀ ସଂଗମରେ ଏକାଠି ହୋଇଛନ୍ତି । ପ୍ରତିଦିନ ଟ୍ରେନ୍, ବସ୍ ସହ ଅନ୍ୟ ଗାଡିରେ ତ୍ରିବେଣୀସଂଗମ ମୁହାଁ ହେଉଛନ୍ତି ଭକ୍ତ । ବର୍ତ୍ତମାନ ସୁଦ୍ଧା ୫ଟି ଅମୃତ ସ୍ନାନ ସମାପନ ହୋଇଥିବା ବେଳେ ଶିବରାତ୍ରିରେ ଶେଷ ଅମୃତସ୍ନାନ ହେବ । କିନ୍ତୁ ଏବେ ବି ଅନେକ ଶ୍ରଦ୍ଧାଳୁ ବୁଡ ପକାଇବାକୁ ଆଗ୍ରହୀ ଅଛନ୍ତି । ଏଥିପାଇଁ ତ୍ରିବେଣୀ ସଂଗମରେ କୁମ୍ଭମେଳାର ଅବଧିକୁ ବଢାଇବାକୁ ଅନୁରୋଧ କରିଛନ୍ତି ସମାଜବାଦି ପାର୍ଟି ମୁଖ୍ୟ ଅଖିଳେଶ ଯାଦବ ।