Viral News / ମୁମ୍ବାଇରେ ୧୦ମ ମହଲାରୁ ଖସିଲେ ମହିଳା, ଗଛ ଡାଳରେ ଅଟକି ବଞ୍ଚିଲା ଜୀବନ

୧୦ମ ମହଲାରୁ ହଠାତ୍ ଖସିପଡ଼ିଲେ ମହିଳା, ତଳେ ଅପେକ୍ଷା କରିଥିଲା ମୃତ୍ୟୁ ! କିନ୍ତୁ ଶେଷ ମୁହୂର୍ତ୍ତରେ ଏମିତି କିଛି ଘଟିଲା, ଯାହା ଦେଖି ସମସ୍ତେ ଆଶ୍ଚର୍ଯ୍ୟ । ମୁମ୍ବାଇର ଭାଣ୍ଡୁପରେ ସନସାଇନ୍ SRA ବିଲ୍ଡିଂର ୧୦ମ ମହଲାରୁ ତଳକୁ ଖସିଥିବା ଜଣେ ମହିଳା ସିଧା ମାଟିରେ ନପଡ଼ି ଏକ ବଡ଼ ଗଛର ଡାଳରେ ଅଟକିଯାଇଥିଲେ । ଯେଉଁ ଗଛ ଡାଳ ସେହି ମୁହୂର୍ତ୍ତରେ ତାଙ୍କ ପାଇଁ ସାଜିଲା ଜୀବନରକ୍ଷକ । ଖବର ପାଇ ପୋଲିସ ଓ ଅଗ୍ନିଶମ ବାହିନୀ ତୁରନ୍ତ ପହଞ୍ଚି ଆରମ୍ଭ କଲେ ଦୁଃସାହସିକ ରେସ୍କ୍ୟୁ ଅପରେସନ୍ । ତେବେ ସେ କିପରି ତଳକୁ ଖସିଲେ, ତାହା ଏବେ ବି ରହସ୍ୟ ।

ମୁମ୍ବାଇର ଭାଣ୍ଡୁପ ଅଞ୍ଚଳରେ ଗୁରୁବାର ଏକ ଆଶ୍ଚର୍ଯ୍ୟଜନକ ଘଟଣା ଘଟିଛି । ସନସାଇନ୍ SRA ବିଲ୍ଡିଂର ୧୦ମ ମହଲାରୁ ଜଣେ ମହିଳା ତଳକୁ ଖସିପଡ଼ିଥିଲେ । ତେବେ ସେ ସିଧାସଳଖ ମାଟିରେ ନପଡ଼ି ବିଲ୍ଡିଂ ତଳେ ଥିବା ଏକ ବଡ଼ ଗଛର ଡାଳରେ ଅଟକି ଯାଇଥିଲେ । ଫଳରେ ତାଙ୍କ ଜୀବନ ରକ୍ଷା ପାଇଥିଲା । ଘଟଣା ପରେ ଅଞ୍ଚଳରେ ଆତଙ୍କ ଖେଳିଯାଇଥିଲା । ସ୍ଥାନୀୟ ଲୋକେ ତୁରନ୍ତ ପୋଲିସ ଓ ଅଗ୍ନିଶମ ବିଭାଗକୁ ଖବର ଦେଇଥିଲେ । ସୂଚନା ପାଇ ଉଭୟ ବିଭାଗର ଟିମ୍ ଘଟଣାସ୍ଥଳରେ ପହଞ୍ଚିଥିଲେ।

ଡାଳରୁ ମହିଳାଙ୍କୁ ଉଦ୍ଧାର
ଗଛର ଉଚ୍ଚ ଡାଳରେ ମହିଳା ଫସିଥିବା ଦେଖି ଅଗ୍ନିଶମ କର୍ମଚାରୀମାନେ ସାବଧାନତାର ସହ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ଦୀର୍ଘ ସମୟର ଚେଷ୍ଟା ପରେ ମହିଳାଙ୍କୁ ଡାଳରୁ ସୁରକ୍ଷିତ ଭାବେ ତଳକୁ ଅଣାଯାଇଥିଲା । ସ୍ଥାନୀୟ ଲୋକଙ୍କ କହିବା ଅନୁସାରେ, ୧୦ମ ମହଲାରୁ ଖସିବା ପରେ ଗଛର ଡାଳରେ ଅଟକିଯିବା ମହିଳାଙ୍କ ପାଇଁ ଜୀବନରକ୍ଷକ ସାବ୍ୟସ୍ତ ହୋଇଛି । ଯଦି ସେ ସିଧା ମାଟିରେ ପଡ଼ିଥାନ୍ତେ, ତେବେ ପରିଣାମ ଅତ୍ୟନ୍ତ ଗୁରୁତର ହୋଇପାରିଥାନ୍ତା । ତେବେ ମହିଳାଙ୍କୁ କେତେ ଆଘାତ ଲାଗିଛି, ସେନେଇ ବିସ୍ତୃତ ସୂଚନା ଏପର୍ଯ୍ୟନ୍ତ ମିଳିନାହିଁ ।

ଦୁର୍ଘଟଣା ନା ଅନ୍ୟ କିଛି ? ତଦନ୍ତରେ ପୋଲିସ
ମହିଳା ଜଣକ ୧୦ମ ମହଲାରୁ କିପରି ତଳକୁ ଖସିଲେ, ତାହା ଏବେ ବଡ଼ ପ୍ରଶ୍ନ ହୋଇଛି । ସେ ଦୁର୍ଘଟଣାବଶତଃ ଖସିପଡ଼ିଥିଲେ ନା ଏହା ପଛରେ ଅନ୍ୟ କୌଣସି କାରଣ ରହିଛି, ତାହା ସ୍ପଷ୍ଟ ହୋଇନାହିଁ । ପୋଲିସ ଘଟଣାର ତଦନ୍ତ କରୁଛି ଏବଂ ମହିଳାଙ୍କ ବୟାନ ସହ ଘଟଣାସ୍ଥଳରୁ ମିଳୁଥିବା ତଥ୍ୟ ଆଧାରରେ ମାମଲାର ତଦନ୍ତ ଆଗକୁ ବଢ଼ାଉଛି ।