ମୁମ୍ବାଇ ପୋଲିସ ଜଣେ ବ୍ୟକ୍ତିଙ୍କୁ ଗିରଫ କରିଛି ଯିଏ ଭାବା ଆଣବିକ ଗବେଷଣା କେନ୍ଦ୍ର (BARC)ର ଜଣେ ବୈଜ୍ଞାନିକ ବୋଲି ଦାବି କରିଥିଲେ ଏବଂ ଏହି ମିଥ୍ୟା ସୂଚନା ବ୍ୟବହାର କରି ଦେଶ ସାରା ଭ୍ରମଣ କରିଥିଲେ। ଇଏ କୌଣସି ସାଧାରଣ ଠକ ନଥିଲା, ସେ ଭାରତର ଅନେକ ସମ୍ବେଦନଶୀଳ ପରମାଣୁ ସୂଚନା ବିଦେଶକୁ ପଠାଇ, ବିଦେଶରୁ କୋଟି କୋଟି ଟଙ୍କା ଗ୍ରହଣ କରିଥିବା ଅଭିଯୋଗ ହୋଇଛି।

BARC ଅଧିକାରୀ କହି ଠକୁଥିଲା

ଗିରଫ ହୋଇଥିବା ବ୍ୟକ୍ତିଙ୍କ ନାମ ଅଖତାର ହୁସେନି, ବୟସ ୬୦ ବର୍ଷ। ସେ ଝାଡ଼ଖଣ୍ଡର ଜାମସେଦପୁରର ବାସିନ୍ଦା। ମୁମ୍ବାଇ ପୋଲିସ ତାକୁ ଗତ ମାସରେ ଗିରଫ କରିଥିଲା। ତା' ନିକଟରୁ ପରମାଣୁ ଅସ୍ତ୍ର ସହିତ ଜଡିତ ୧୦ ରୁ ଅଧିକ ମାନଚିତ୍ର ଏବଂ ଡକ୍ୟୁମେଣ୍ଟ ଜବତ କରିଥିଲା ପୋଲିସ ।

ଯେତେବେଳେ ପୋଲିସ ତା' ଘରେ ପହଞ୍ଚିଥିଲା, ଅନେକ ନକଲି ପାସପୋର୍ଟ, ଆଧାର କାର୍ଡ, ପ୍ୟାନ୍ କାର୍ଡ ଏବଂ ଏକ ନକଲି BARC ପରିଚୟପତ୍ର ପାଇଥିଲା। ଆଶ୍ଚର୍ଯ୍ୟର କଥା, ପ୍ରତ୍ୟେକ କାର୍ଡରେ ତା ନାମ ଭିନ୍ନ ଭିନ୍ନ ଥିଲା । କେତେବେଳେ ସେ ଅଲି ରାଜା ହୁସେନ ଥିଲା ତ କେତେବେଳେ ଆଲେକଜାଣ୍ଡାର ପାମର ।

ନକଲି ପରିଚୟ ଦେଖାଇ ଦେଶସାରା ବୁଲୁଥିଲା

ଅଖତାର ହୁସେନି ଦୀର୍ଘ ସମୟ ଧରି ବିଭିନ୍ନ ପରିଚୟ ବ୍ୟବହାର କରି ଭିନ୍ନ ଭିନ୍ନ ସହରରେ ବୁଲୁଥିଲା । ପୋଲିସ ତଦନ୍ତରୁ ଜଣାପଡ଼ିଛି ଯେ ତାର ଅନେକ ବ୍ୟାଙ୍କ ଆକାଉଣ୍ଟ ଅଛି। ଗତ କିଛି ବର୍ଷ ଧରି ଏଥିରେ ବିପୁଳ ପରିମାଣର ଟଙ୍କା ଜମା ହୋଇଥିଲା, ଯାହା ସନ୍ଦେହ ସୃଷ୍ଟି କରିଛି। ପୋଲିସ ଏବେ ଏକ ଘରୋଇ ବ୍ୟାଙ୍କ ଆକାଉଣ୍ଟରେ ସନ୍ଦେହଜନକ କାରବାର ଚିହ୍ନଟ କରିଛି। ଟଙ୍କା କେଉଁଠାରୁ ଆସିଲା ଏବଂ କେଉଁଠାକୁ ଗଲା, ସେନେଇ ତଦନ୍ତ କରିବାକୁ ମୁମ୍ବାଇ ପୋଲିସର କ୍ରାଇମବ୍ରାଞ୍ଚ ଟିମ୍ ବ୍ୟାଙ୍କରୁ ସମସ୍ତ କାରବାର ତଥ୍ୟ ମାଗିଛି।

୧୯୯୫ ରୁ ଆରମ୍ଭ ହୋଇଥିଲା ବିଦେଶୀ ପାଣ୍ଠି ଖେଳ

ପୋଲିସ ସୂତ୍ର ଅନୁଯାୟୀ, ଅଖତାର ଏବଂ ତାର ଭାଇ ଆଦିଲ ୧୯୯୫ ମସିହାରୁ ବିଦେଶରୁ ପାଣ୍ଠି ପାଉଥିଲେ। ପ୍ରାରମ୍ଭରେ ସେମାନେ ଲକ୍ଷ ଲକ୍ଷ ଟଙ୍କା ପାଉଥିଲେ, କିନ୍ତୁ ୨୦୦୦ ମସିହା ପରେ ସେମାନେ କୋଟି କୋଟି ଟଙ୍କା ପାଇଥିଲେ । ସନ୍ଦେହ କରାଯାଉଛି ଯେ ଏହି ଟଙ୍କା ଭାରତର ପରମାଣୁ କେନ୍ଦ୍ର ଏବଂ BARC ସହିତ ଜଡିତ ଗୁପ୍ତ ସୂଚନା ପାଇଁ ମିଳିଥିଲା। ସମ୍ପୂର୍ଣ୍ଣ ଟଙ୍କାର ସୁରାକ ପାଇବା ପାଇଁ ଦୁଇ ଭାଇଙ୍କ ପୁରୁଣା ବ୍ୟାଙ୍କ ଆକାଉଣ୍ଟଗୁଡ଼ିକର ମଧ୍ୟ ତଦନ୍ତ ଚାଲିଛି।

ଭାଇ ମଧ୍ୟ ଗିରଫ, ପାକିସ୍ତାନ ଲିଙ୍କ ସନ୍ଦେହ

ଅଖତାରର ଭାଇ ଆଦିଲକୁ ଦିଲ୍ଲୀରୁ ଗିରଫ କରାଯାଇଛି। ପୋଲିସ କହିଛି ଯେ ଉଭୟ ଭାଇ ପାକିସ୍ତାନ ଗସ୍ତ କରିଛନ୍ତି ଏବଂ ଗୁଇନ୍ଦା ସଂସ୍ଥା ISI ସହିତ ସେମାନଙ୍କର ସମ୍ପର୍କ ଥାଇପାରେ। ପୋଲିସ ବର୍ତ୍ତମାନ ତଦନ୍ତ କରୁଛି ଯେ ଦୁଇ ଭାଇ ଦେଶର ପରମାଣୁ ସୂଚନା କୌଣସି ବିଦେଶୀ ସଂସ୍ଥାକୁ ବିକ୍ରି କରିଛନ୍ତି, ନା କୌଣସି ବୃହତ୍ ନେଟୱାର୍କ ସହ ସାମିଲ ହୋଇ କାମ କରୁଥିଲେ।

୨୦୦୪ରେ ଦୁବାଇରୁ ବହିଷ୍କାର ହୋଇଥିଲା

ତଦନ୍ତରୁ ଏହା ମଧ୍ୟ ଜଣାପଡିଛି ଯେ ଅଖତାରଙ୍କୁ ୨୦୦୪ ମସିହାରେ ଦୁବାଇରୁ ନିର୍ବାସିତ କରାଯାଇଥିଲା। ସେତେବେଳେ ସେ ନିଜକୁ "କ୍ଲାସିଫାଏଡ୍‌ ଦଲିଲ ସହିତ ଜଣେ ବୈଜ୍ଞାନିକ" ଭାବରେ ପରିଚୟ ଦେଇଥିଲେ।

ସେ ୧୯୯୬ ମସିହାରେ ଝାଡ଼ଖଣ୍ଡରେ ଥିବା ତାଙ୍କର ପୈତୃକ ସମ୍ପତ୍ତି ବିକ୍ରି କରିଥିଲା, କିନ୍ତୁ ପୁରୁଣା ସମ୍ପର୍କ ବ୍ୟବହାର କରି ଜାଲ୍ କାଗଜପତ୍ର ସୃଷ୍ଟି କରି ଚାଲିଥିଲା । ଏହି ସମୟରେ, ତା' ଭାଇ ଆଦିଲ୍ ତାକୁ ଝାଡ଼ଖଣ୍ଡର ମୁନଜିଲ୍ ଖାନ ନାମକ ଜଣେ ବ୍ୟକ୍ତି ସହ ପରିଚୟ କରାଇଥିଲା, ଯିଏ ସେମାନଙ୍କ ପାଇଁ ଦୁଇଟି ଜାଲ୍ ପାସପୋର୍ଟ ତିଆରି କରିଥିଲା।

ଏହି ପାସପୋର୍ଟଗୁଡ଼ିକରେ ଥିବା ଠିକଣା ସେହି ଘରର ଥିଲା, ଯାହାକୁ ଦୁଇ ଭାଇ ପ୍ରାୟ ୩୦ ବର୍ଷ ପୂର୍ବେ ବିକ୍ରି କରିଥିଲେ। ସନ୍ଦେହ କରାଯାଉଛି ଯେ ସେମାନେ ଏହି ପାସପୋର୍ଟ ବ୍ୟବହାର କରି ବିଦେଶ ଯାତ୍ରା ଜାରି ରଖିଥିଲେ। ମୁମ୍ବାଇ ପୋଲିସ ଉଭୟ ଭାଇଙ୍କୁ ନିରନ୍ତର ପଚରାଉଚରା କରୁଛି। ସେମାନେ ଦେଶ ସହିତ ଜଡିତ କେଉଁ ସୂଚନା ବିଦେଶକୁ ପଠାଇଥିଲେ ଏବଂ ବଦଳରେ ସେମାନେ କେତେ ଟଙ୍କା ପାଇଥିଲେ ତାହା ଉପରେ ତଦନ୍ତ କରୁଛି ।