ଅର୍ଗସ ବ୍ୟୁରୋ: ତାମିଲନାଡୁ ବିଧାନସଭାରେ ଜାତୀୟ ସଙ୍ଗୀତକୁ ଅପମାନ । ଏହାର ପ୍ରତିବାଦ କରି ରାଜ୍ୟପାଳ ଆର.ଏନ. ରବି ତାଙ୍କ ଅଭିଭାଷଣ ଦେଇନାହାନ୍ତି । ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନଙ୍କ ନେତୃତ୍ବାଧୀନ ଡିଏମକେ ସରକାର ସମ୍ବିଧାନକୁ ଅପମାନ କରିଥିବା ସେ ଅଭିଯୋଗ କରିଛନ୍ତି । ଆଜି ତାମିଲନାଡୁ ବିଧାନସଭାର ଅଧିବେଶନ ଆରମ୍ଭ ହେଉଥିଲା ।

ରାଜ୍ୟପାଳ ପହଞ୍ଚିବା ପରେ ତାମିଲ ଭାଷାରେ କେବଳ ରାଜ୍ୟର ସଙ୍ଗୀତ ଗାନ କରାଯାଇଥିଲା । କିନ୍ତୁ ଜାତୀୟ ସଙ୍ଗୀତ ଗାନ କରାଯାଇ ନଥିଲା । ଏଥିରେ ରାଜ୍ୟପାଳ ଆରଏନ ରବି ଭୀଷଣ ଅସନ୍ତୋଷ ହୋଇ ତାଙ୍କ ଅଭିଭାଷଣ ଦେଇନଥିଲେ । ଜାତୀୟ ସଙ୍ଗୀତକୁ ସମ୍ମାନ ଦେବା ପ୍ରଥମ କର୍ତ୍ତବ୍ୟ ବୋଲି ସମ୍ବିଧାନରେ ଉଲ୍ଲେଖ ରହିଛି । ଏହାର ଅପମାନକୁ କୌଣସି ପରିସ୍ଥିତିରେ ସହ୍ୟ କରାଯିବ ନାହିଁ ବୋଲି ତାମିଲନାଡୁ ରାଜ୍ୟପାଳଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ।