ବିଶାଖାପାଟଣାରେ ସମର ଶକ୍ତି ପ୍ରଦର୍ଶନ। ନୀଳ ଜଳରାଶିରେ ଶୁଭୁଛି ଯୁଦ୍ଧ ଜାହାଜର ଗର୍ଜନ। ମିଳିତ ନୌସେନା ଅଭ୍ୟାସରେ ସେନା ଶୌର୍ଯ୍ୟର ଝଲକ୍
'ମିଲନ-୨୦୨୬'ରେ ସାମିଲ ହେଲେ ୭୨ଟି ଦେଶ। ଚୀନ୍ ଓ ପାକିସ୍ତାନକୁ ଭାରତର କଡ଼ା ଜବାବ। ସମୁଦ୍ର ଭିତରେ ଭାରତୀୟ ସେନା ପରାକ୍ରମର ଝଲକ । ବିଶାଖାପାଟଣା ଉପକୂଳ ସାଜିଛି ବିଶ୍ୱ ନୌସେନାର ରଣକ୍ଷେତ୍ର । ଆରମ୍ଭ ହୋଇଛି ବିଶ୍ୱର ସବୁଠାରୁ ବଡ଼ ସାମୁଦ୍ରିକ ସମରାଭ୍ୟାସ ମଧ୍ୟରୁ ଅନ୍ୟତମ - 'ମିଲନ-୨୦୨୬' ଓ ଆନ୍ତର୍ଜାତୀୟ ଫ୍ଲିଟ୍ ରିଭ୍ୟୁ । ଆମେରିକା, ଋଷ, ଜର୍ମାନୀ ଭଳି ୭୨ଟି ମିତ୍ର ରାଷ୍ଟ୍ରର ନୌସେନା ଏକାଠି ହୋଇ କରୁଛନ୍ତି ଶକ୍ତି ପ୍ରଦର୍ଶନ । ଆସନ୍ତା ୨୫ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ନୌସେନା ମହୋତ୍ସବର ଚଳିତବର୍ଷର ଥିମ୍ ରହିଛି 'ସହଭାଗିତା, ସହଯୋଗ ଏବଂ ସମନ୍ୱୟ' । ଭାରତର 'ଇଣ୍ଡୋ-ପାସିଫିକ୍' ରଣନୀତିର କେନ୍ଦ୍ରବିନ୍ଦୁ ପାଲଟିଥିବା ସମରାଭ୍ୟାସରେ ୬୦ରୁ ଅଧିକ ଯୁଦ୍ଧପୋତ ଓ ଶତାଧିକ ବିମାନର ରଣକୌଶଳ ଶତ୍ରୁ ଛାତିରେ ଖେଳାଇଛି ଆତଙ୍କ ।

ଚଳିତ ନୌସେନା ସମରାଭ୍ୟାସରେ ସବୁଠୁ ବଡ଼ ଆକର୍ଷଣ ସାଜିଛି ଭାରତର ଗର୍ବ - ସ୍ୱଦେଶୀ ବିମାନବାହୀ ଯୁଦ୍ଧପୋତ ଆଇଏନଏସ୍ ବିକ୍ରାନ୍ତ । ଏହି ବିଶାଳକାୟ ଯୁଦ୍ଧପୋତ 'ଅପରେସନ୍ ସିନ୍ଦୂର' ସମୟରେ ପାକିସ୍ତାନର ନିଦ ହଜାଇଥିଲା । ଏହାସହ ପ୍ରଥମ କରି ଜର୍ମାନୀ, ଫିଲିପାଇନ୍ସ ଏବଂ UAEର ଅତ୍ୟାଧୁନିକ ଯୁଦ୍ଧପୋତଗୁଡ଼ିକ ଭାରତୀୟ ସମୁଦ୍ରରେ ସାମିଲ ହୋଇ ଭାରତର ବୃଦ୍ଧି ପାଉଥିବା କୂଟନୈତିକ ପ୍ରଭାବକୁ ଦର୍ଶାଉଛନ୍ତି ।

ବିଶ୍ୱ ରାଜନୀତିରେ ଚାଲିଥିବା ଉତ୍ତେଜନା ମଧ୍ୟରେ ଏହି ସମରାଭ୍ୟାସକୁ ବେଶ୍ ଗୁରୁତ୍ୱପୂର୍ଣ୍ଣ ବିବେଚନା କରାଯାଉଛି । ଗୋଟିଏ ପଟେ ଋଷ ଓ ଇରାନ ମଧ୍ୟରେ ରଣନୈତିକ ସମ୍ପର୍କ ସୁଦୃଢ଼ ହେଉଥିବା ବେଳେ ରାଷ୍ଟ୍ରପତି ପୁଟିନ ଇରାନର ସାର୍ବଭୌମତ୍ୱକୁ ସମର୍ଥନ ଘୋଷଣା କରିଛନ୍ତି । କିନ୍ତୁ ବିଶାଖାପାଟଣାରେ ଆମେରିକା ଓ ଋଷ ନୌସେନା ସମରାଭ୍ୟାସରେ ଏକାଠି ହେବାର ଦୃଶ୍ୟ ସାରା ବିଶ୍ୱକୁ ଚକିତ କରିଛି ।

୨୦୦୧ରୁ ଆରମ୍ଭ ହୋଇଥିବା ଏହି ଆନ୍ତର୍ଜାତୀୟ ଫ୍ଲିଟ୍ ରିଭ୍ୟୁ କେବଳ ଶକ୍ତି ପ୍ରଦର୍ଶନ ନୁହେଁ, ବରଂ 'ସାଗର'ମିଶନର ଏକ ମୁଖ୍ୟ ଅଂଶ । କାର୍ଯ୍ୟସୂଚୀ ଅନୁସାରେ ଆସନ୍ତା ୧୮ ତାରିଖରେ ଫ୍ଲିଟ୍ ରିଭ୍ୟୁ କରିବେ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଭାରତୀୟ ଓ ବିଦେଶୀ ନୌସେନାର ପାରଦର୍ଶିତାକୁ ନୀରିକ୍ଷଣ କରିବେ ମହାମହିମ । ଚୀନର ସମୁଦ୍ର ସୀମାରେ ଡ୍ରାଗନର ଦାଦାଗିରି ବଢୁଥିବାବେଳେ ଭାରତ ମହାସାଗରରେ ଶାନ୍ତି ରକ୍ଷା ପାଇଁ 'ମିଲନ-୨୦୨୬' ଶକ୍ତ ବାର୍ତ୍ତା ଦେଇଛି । ଇଣ୍ଡୋ-ପାସିଫିକ କ୍ଷେତ୍ରରେ ଏବେ ଭାରତ କେବଳ ସାମୁଦ୍ରିକ ଶକ୍ତି ନୁହେଁ, ବରଂ ବିଶ୍ୱର ବିଶ୍ବସନୀୟ ସିକ୍ୟୁରିଟି ପାର୍ଟନର ଭାବେ ଉଭା ହୋଇଛି ।