ପାଠ୍ୟ ସୁସ୍ତକରେ ସ୍ଥାନିତ ବିଭାଜନ ବିଭୀଷିକା । NCERT ପକ୍ଷରୁ ଉନ୍ମୋଚିତ ୨ଟି ସ୍ବତନ୍ତ୍ର ପୁସ୍ତିକାରେ ଭାରତର ବିଭାଜନ ପାଇଁ ମହମ୍ମଦ ଅଲ୍ଲୀ ଜିନ୍ନା, କଂଗ୍ରେସ ଓ ମାଉଣ୍ଟବ୍ୟାଟେନଙ୍କୁ ଦାୟୀ କରାଯାଇଛି । ଶୁକ୍ରବାର ବିଭାଜନ ବିଭୀଷିକା ଦିବସର ଅବସରରେ ଏହି ପୁସ୍ତିକା ଉନ୍ମୋଚନ କରାଯାଇଛି । ବିଭାଜନ ପାଇଁ ଜଣେ ବ୍ୟକ୍ତି ପାଇଁ ଦାୟୀ ନୁହଁନ୍ତି, ତିନିଟି ଶକ୍ତି କାମ କରିଥିଲା । ମହମ୍ମଦ ଜିନ୍ନା ବିଭାଜନ ପାଇଁ ଦାବି କରିଥିଲେ, କଂଗ୍ରେସ ତାକୁ ସ୍ବୀକାର କରିଥିଲେ । ପରେ ମାଉଣ୍ଟ ବ୍ୟାଟେନ୍ ଏହାକୁ କାର୍ଯ୍ୟକାରୀ କରିଥିଲେ ବୋଲି ପୁସ୍ତକରେ ଉଲ୍ଲେଖ କରାଯାଇଛି । ବିଭାଜନ ପରେ କାଶ୍ମୀର ଏକ ନୂଆ ସମସ୍ୟା ଭାବେ ଉଭା ହୋଇଥିଲା । ଷଷ୍ଠ ଶ୍ରେଣୀରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଗୋଟିଏ ପାଠ୍ୟ ପୁସ୍ତକ ଓ ନବମରୁ ଦ୍ବାଦଶ ପର୍ଯ୍ୟନ୍ତ NCERT ପକ୍ଷରୁ ଆଉ ଏକ ପୁସ୍ତିକା ପ୍ରସ୍ତୁତ କରାଯାଇଛି ।

ଇତିହାସ ପୃଷ୍ଠାରେ ସଂଘର୍ଷ, ଷଡ଼ଯନ୍ତ୍ର ଓ ବଳିଦାନର ଗାଥାକୁ ନେଇ ମୁହାଁମୁହିଁ ରାଜନୈତିକ ଦଳ । ପୁସ୍ତିକାରେ ଦୁଇ ବିଦେଶୀ ବ୍ୟକ୍ତିଙ୍କ ସହ କଂଗ୍ରେସ ନାଁକୁ ନେଇ ତୀବ୍ର ବିରୋଧ କରିଛନ୍ତି ଇଣ୍ଡିମେଣ୍ଟ ନେତା । ଦେଶ ସ୍ବାଧୀନତା ପରଠୁ ତୁଷ୍ଟିକରଣ ଓ ସାଂପ୍ରଦାୟିକ ରାଜନୀତି କରି ସତ ଉପରେ ପରଦା ଢ଼ାଙ୍କିବାକୁ ପ୍ରୟାସ କରୁଥିବା ଦଳକୁ ଆଘାତ ଲାଗିବା ସ୍ବାଭାବିକ ବୋଲି କହି କଂଗ୍ରେସକୁ ଟାର୍ଗେଟ୍ କରିଛି ବିଜେପି ।

ବିଭାଜନ- ଭାରତ ଇତିହାସର ସବୁଠାରୁ ଗୁରୁତ୍ବପୂର୍ଣ୍ଣ ପ୍ରସଙ୍ଗ ହୋଇଥିବାରୁ ସତ ଜାଣିବା ବର୍ତ୍ତମାନ ପିଢ଼ିର ଅଧିକାର । ଦେଶ ବିଭାଜନ ଘୋଷଣା ପରେ ସ୍ବଳ୍ପ ସମୟ ମଧ୍ୟରେ ଦେଢ କୋଟି ଲୋକ ହୋଇଥିଲେ ବିସ୍ଥାପିତ । ତତକାଳୀନ ରାଷ୍ଟ୍ର ନେତାଙ୍କ ନିଷ୍ପତ୍ତିରେ ପରିବର୍ତ୍ତନ ଯୋଗୁ ଯାଇଥିଲା ୧୨ରୁ ୧୫ ଲକ୍ଷ ନୀରିହ ଲୋକଙ୍କ ଜୀବନ । ସ୍ବାଧୀନତାର ଖିୁସି ଭିତରେ ରକ୍ତରେ ରଙ୍ଗୀନ ହୋଇଥିଲା ଦେଶର ମାଟି । ଦେଶ ସ୍ବାଧୀନତାର ୭୯ ବର୍ଷ ପୂର୍ତ୍ତିରେ ବିଭାଜନ ବିଭୀଷିକା ବିଷୟରେ ଅଜ୍ଞ ବର୍ତ୍ତମାନ ପିଢ଼ିକୁ ତତ୍କାଳୀନ ସମୟର ସ୍ଥିତି ବିଷୟରେ ଜଣାଇବାକୁ ବଡ଼ ପ୍ରୟାସ କରିଛି NCERT ।