China Warning / ନେପାଳରେ ପ୍ରଳୟଙ୍କରୀ ବନ୍ୟା...୬୦୦ ପାର୍ ମୃତ୍ୟୁସଂଖ୍ୟା, ଚୀନ ଜାରି କଲା ‘ପ୍ରଳୟ ସତର୍କତା’

ନେପାଳର କରାଳ ବନ୍ୟାରେ ମୃତ୍ୟୁ ସଂଖ୍ୟା ୬୨୬ ରେ ପହଞ୍ଚିଛି ଏବେବି ୨୦୦୦ରୁ ଅଧିକ ଲୋକ ନିଖୋଜ ଅଛନ୍ତି। ଏହି ସମୟରେ, ଚୀନର ସରକାରୀ ଗଣମାଧ୍ୟମ ଅନୁଯାୟୀ, ତିବ୍ଦତରେ ଭୂସ୍ଖଳନ ଭଗ୍ନାବଶେଷ ଦ୍ୱାରା ଗଠିତ ଏକ ହ୍ରଦର ଜଳସ୍ତର ପୁଣି ବୃଦ୍ଧି ପାଉଛି। ରିପୋର୍ଟରେ କୁହାଯାଇଛି ଯେ ପୁଣି ଥରେ ମାଟି ଅତଡ଼ା ଖସିବା କିମ୍ବା ଭୂସ୍ଖଳନ ହେବାର ଆଶଙ୍କା ରହିଛି। ନେପାଳ ଏବଂ ତିବ୍ଦତ ମଧ୍ୟରେ ମୁଖ୍ୟ ଭୂମି ସୀମା ଗାଇରୋଙ୍ଗ ବନ୍ଦର ପାଖରେ ଉଦ୍ଧାର କାର୍ଯ୍ୟ ପାଇଁ ଦାୟୀ ଦଳ ଡ୍ରୋନ ନିୟୋଜିତ କରିଛନ୍ତି ଏବଂ ପାହାଡ଼ ଉପରେ ନଜର ରଖିବା ଏବଂ ନିକଟରେ କାର୍ଯ୍ୟରତ ଉଦ୍ଧାର କର୍ମୀମାନଙ୍କୁ ସମୟୋଚିତ ଚେତାବନୀ ଦେବା ସହ ଡ୍ରୋନ ଦ୍ବାରା ନଜର ରଖାଯାଇଛି।

ଏହି ବିପର୍ଯ୍ୟୟର ପ୍ରଥମ ପ୍ରକି୍ରିୟା ପାହାଡ଼ରେ ଉଚ୍ଚପର୍ବତମାଳାରେ ଆରମ୍ଭ ହୋଇଥିଲା। ପ୍ରାଥମିକ ଯାଞ୍ଚରୁ ଜଣାପଡ଼ିଥିଲା ଯେ, ଗ୍ଲେସିୟର ପାହାଡ଼ ଭାଙ୍ଗିବାପରେ ବରଫ ଏବଂ ପଙ୍କ ସବୁ ତଳକୁ ଭାରି ମାତ୍ରାରେ ଖସିଲା। ଏହି ମଲଓ୍ବା ନଦୀରେ ଆସିକି ପଡ଼ିଥିଲା। ଯେଉଁଥିପାଇଁ ପାଣିର ରାସ୍ତା ବନ୍ଦ ହୋଇଯାଇଥିଲା। ଯେତେବେଳେ ଏହି ପ୍ରାକୃତିକ ବିପର୍ଯ୍ୟୟ ଭୂସ୍ଖଳନ ହୋଇ ଆସିଲା ସେତେବେଳେ ପାଣି ସହିତ ପଙ୍କ ମାଡ଼ିଆସିଲା। ଏହାର ଗଭୀର ପ୍ରଭାବ ପଡ଼ିଲା ଭୋଟୋକୋଶୀ ଏବଂ ତ୍ରିଶୂଳୀ ନଦୀ ନିକଟବର୍ତ୍ତୀ ଅଞ୍ଚଳରେ। ଯେଉଁଥିରେ ହଜାର ହାଜାର ବସ୍ତି, ସଡ଼କ, ବ୍ରିଜ ଏବଂ ବିଦ୍ୟୁତ ଖୁଣ୍ଟ ସବୁ ନିମିଷକ ମଧ୍ୟରେ ନିଶ୍ଚିହ୍ନ ହୋଇଗଲା।

ବନ୍ୟା ପରେ ସବୁଠାରୁ ବଡ଼ ଚ୍ୟାଲେଞ୍ଜ ହେଉଛି ନିଖୋଜ ଲୋକଙ୍କୁ ଖୋଜିବା। ପାର୍ବତ୍ୟ ଅଞ୍ଚଳରେ ଅନେକ ରାସ୍ତା ଏବଂ ପୋଲ ଧୋଇଯିବାରୁ ଉଦ୍ଧାରକାରୀ ଦଳଗୁଡ଼ିକ ଘଟଣାସ୍ଥଳକୁ ପହଞ୍ଚିବାରେ ବହୁତ ୍ରସୁବିଧାର ସମ୍ମୁଖୀନ ହେଉଛନ୍ତି। ନେପାଳ ରେଡକ୍ରସ ଅନୁଯାୟୀ ଏହି ବିପର୍ଯ୍ୟୟରେ 90,000 ରୁ ଅଧିକ ଲୋକ ପ୍ରଭାବିତ ହୋଇଛନ୍ତି। ବନ୍ୟା ଜଳ ବିଦ୍ୟୁତ୍ ପ୍ରକଳ୍ପଗୁଡ଼ିକୁ ମଧ୍ୟ ପ୍ରଭାବିତ କରିଛି। 13ଟି ଜଳ ବିଦ୍ୟୁତ୍ ପ୍ରକଳ୍ପର ପ୍ରାୟ 933 ଜଣ ଶ୍ରମିକ ନିଖୋଜ ହୋଇଥିବା ରିପୋର୍ଟ ହୋଇଛି, ଯେଉଁଥିରୁ 254 ଜଣଙ୍କୁ ଉଦ୍ଧାର କରାଯାଇଛି। ଆହୁରି ଅନେକ ଲୋକ ସୁଡ଼ଙ୍ଗରେ ଫସି ରହିଥିବା ଆଶଙ୍କା କରାଯାଉଛି। କେବଳ ଉପର ତ୍ରିଶୁଳି-1 ପ୍ରକଳ୍ପର 576 ଜଣ ଶ୍ରମିକ ଏବେ ବି ନିଖୋଜ ଅଛନ୍ତି।

• ନଦୀ ରାସ୍ତାରେ ସୃଷ୍ଟି ହୋଇଥିବା ହ୍ରଦ ଚିନ୍ତାକୁ ବଢ଼ାଇଲା

ପ୍ରଥମ ବନ୍ୟାର ବିନାଶ ପରେ, ଏକ ନୂତନ ଚିନ୍ତା ହେଉଛି ଉପରମୁଣ୍ଡରେ ସୃଷ୍ଟି ହୋଇଥିବା ଅସ୍ଥାୟୀ ହ୍ରଦ। ଭଗ୍ନାବଶେଷ ନଦୀର ପଥକୁ ଅବରୋଧ କରିଛି, ଯାହା ଫଳରେ ସେଠାରେ ପାଣି ଜମା ହେଉଛି। ସାଟେଲାଇଟ୍ ଚିତ୍ର ନିରନ୍ତର ତଦାରଖ କରାଯାଉଛି। ଚୀନ୍ ଅଧିକାରୀଙ୍କ ଅନୁଯାୟୀ, ଏହି ହ୍ରଦରେ ପ୍ରାୟ 2 ନିୟୁତ ଘନ ମିଟର ପାଣି ଜମା ହୋଇଛି, ଏବଂ ଆଗାମୀ ତିନି ଦିନ ମଧ୍ୟରେ ଆହୁରି ୩ ନିୟୁତ ଘନ ମିଟର ପାଣି ଆସିବାର ଆଶା କରାଯାଉଛି। ଯଦି ଜଳ ଚାପ ବୃଦ୍ଧି ପାଏ ଏବଂ ହ୍ରଦର ପ୍ରାକୃତିକ ପ୍ରତିବନ୍ଧକ ଭାଙ୍ଗିଯାଏ, ତେବେ ଏହା ତଳମୁଣ୍ଡ ଅଞ୍ଚଳରେ ବନ୍ୟା ସୃଷ୍ଟି କରିପାରେ।

• ଚୀନ୍ ନେପାଳକୁ ବାର୍ତ୍ତା ପଠାଇଛି

ଚୀନ୍‌ର ବାର୍ତ୍ତାରେ କୁହାଯାଇଛି, "ଗତକାଲି ପୂର୍ବଦିନ ସୃଷ୍ଟି ହୋଇଥିବା ହ୍ରଦଟି କ୍ରମଶଃ ଗାଢ଼ ରଙ୍ଗର ହେଉଛି। ଏହାର ଅର୍ଥ ଏହା ଫାଟିପାରେ।" ଏଥିରେ ଏହା ମଧ୍ୟ କୁହାଯାଇଛି ଯେ ପାଣିର ପରିମାଣ ବହୁତ ଅଧିକ ନଥିବାରୁ ତଳମୁଣ୍ଡରେ ନଦୀଗୁଡ଼ିକରେ ଜଳ ପ୍ରବାହ ସାମାନ୍ୟ ବୃଦ୍ଧି ପାଇପାରେ, କିନ୍ତୁ ଏହା ଯଥେଷ୍ଟ ବୃଦ୍ଧି ପାଇବାର ସମ୍ଭାବନା କମ୍। ଚୀନ୍‌ କର୍ତ୍ତୃପକ୍ଷ ତଳମୁଣ୍ଡରେ ବାସ କରୁଥିବା ସମ୍ପ୍ରଦାୟଗୁଡ଼ିକୁ ସତର୍କ ରହିବାକୁ ପରାମର୍ଶ ଦେଇଛନ୍ତି। ହିମବାହ ଭୁଶୁଡ଼ିବା ଦ୍ୱାରା ହ୍ରଦଟି ସୃଷ୍ଟି ହୋଇଥିଲା; ସମାନ ଘଟଣା ନେପାଳ ଏବଂ ତିବ୍ଦତରେ ଭୟଙ୍କର ବନ୍ୟା ସୃଷ୍ଟି କରିଥିବା କୁହାଯାଉଛି।