Tourists Missing / ନେପାଳରେ ପ୍ରବଳ ବରଫ ବର୍ଷା, ୬ ଭାରତୀୟ ପର୍ଯ୍ୟଟକଙ୍କୁ ଖୋଜୁଛି ସେନା ହେଲିକପ୍ଟର

କାଠମାଣ୍ଡୁ: ପ୍ରବଳ ବରଫ ବର୍ଷା ଯୋଗୁଁ ନେପାଳର ଡୋଲ୍ପା ଜିଲ୍ଲାରେ ୬ ଜଣ ଭାରତୀୟ ପର୍ଯ୍ୟଟକ ନିଖୋଜ । ଏମାନଙ୍କ ମଧ୍ୟରେ ୪ ଜଣ ପୁରୁଷ ଓ ୨ ଜଣ ମହିଳା ଅଛନ୍ତି । ଏମାନେ ପ୍ରସିଦ୍ଧ ଶେ-ଫୋକ୍ସୁଣ୍ଡୋ ହ୍ରଦ ବୁଲିବାକୁ ଯାଇଥିଲେ । ସେଠାରୁ ଫେରିବା ସମୟରେ ପ୍ରବଳ ବରଫପାତ ଯୋଗୁଁ ରାସ୍ତାରୁ ନିଖୋଜ ହୋଇ ଯାଇଛନ୍ତି ।

ଏହି ଘଟଣା ପରେ ନେପାଳ ପ୍ରଶାସନ ପକ୍ଷରୁ ଉଦ୍ଧାର କାର୍ଯ୍ୟ ଆରମ୍ଭ ହୋଇଛି । ପର୍ଯ୍ୟଟକଙ୍କୁ ସୁରକ୍ଷିତ ଉଦ୍ଧାର ପାଇଁ ନେପାଳ ସେନାର ହେଲିକପ୍ଟର ନିୟୋଜିତ କରାଯାଇଛି । ତେବେ, ଖରାପ ପାଗ ଯୋଗୁଁ ଉଦ୍ଧାର କାର୍ଯ୍ୟରେ ସମସ୍ୟା ହେଉଛି।

କେମିତି ନିଖୋଜ ହେଲେ ୬ ଭାରତୀୟ ପର୍ଯ୍ୟଟକ ?

ସୂଚନା ଅନୁସାରେ, ପର୍ଯ୍ୟଟକମାନେ ଡୋଲ୍ପା ଜିଲ୍ଲାର ଧୋ ଅଞ୍ଚଳରୁ ଶେ-ଫୋକ୍ସୁଣ୍ଡୋ ହ୍ରଦ ଆଡ଼କୁ ଯାଉଥିଲେ । ସେହି ସମୟରେ ଡାନିଗାଡ ଅଞ୍ଚଳରେ ପ୍ରବଳ ବରଫ ବର୍ଷା ହୋଇଥିଲା । ଫଳରେ ପାହାଡ଼ିଆ ରାସ୍ତାରେ ଆଗକୁ ବଢ଼ିବା ସମ୍ଭବ ହୋଇନଥିଲା ।

ଏଥିସହ ପଢ଼ନ୍ତୁ: ବଢ଼ିଲା ବିମାନ ଟିକେଟ୍‌: ଚତୁର୍ଥ ଥର ପାଇଁ ATF ମୂଲ୍ୟ ବୃଦ୍ଧି... 

ସ୍ଥାନୀୟ ଗାଇଡ୍‌ ଏବଂ ସୁରକ୍ଷାକର୍ମୀ ପାଗ ଖରାପ ଥିବାରୁ ଆଗକୁ ରାସ୍ତାରେ ଯାତ୍ରା ନକରିବାକୁ ପରାମର୍ଶ ଦେଇଥିଲେ । ଏପରିକି ଅକ୍ଟୋବର ୨୯ରୁ ଅପର ଡୋଲ୍ପା ଅଞ୍ଚଳକୁ ଟ୍ରେକିଂ ଉପରେ କଟକଣା ଲଗାଯାଇଥିଲା । ତଥାପି ପର୍ଯ୍ୟଟକମାନେ ଆଗକୁ ଯାଇଥିଲେ ।

ମୋବାଇଲ ନେଟୱର୍କ ନଥିବାରୁ ଯୋଗାଯୋଗରେ ସମସ୍ୟା

ଯେଉଁ ଅଞ୍ଚଳରେ ପର୍ଯ୍ୟଟକମାନେ ନିଖୋଜ ଅଛନ୍ତି, ସେଠାରେ ମୋବାଇଲ ନେଟୱର୍କ ସୁବିଧା ନାହିଁ । ଏଥିପାଇଁ ସେମାନଙ୍କ ସହ ସିଧାସଳଖ ଯୋଗାଯୋଗ କରିବାରେ ପ୍ରଶାସନକୁ ସମସ୍ୟା ହେଉଛି ।

ଡୋଲ୍ପାର ମୁଖ୍ୟ ଜିଲ୍ଲା ଅଧିକାରୀ ଜୁନୁ ହମାଲଙ୍କ ସୂଚନା ଅନୁସାରେ, ନେପାଳ ସେନାର ହେଲିକପ୍ଟର ସହାୟତାରେ ପର୍ଯ୍ୟଟକଙ୍କୁ ଖୋଜା ଚାଲିଛି । ସେନାର କର୍ମଚାରୀଙ୍କ ସହ ମଧ୍ୟ ଉଦ୍ଧାର କାର୍ଯ୍ୟ ନେଇ ସମନ୍ୱୟ ରଖାଯାଇଛି ।

ପର୍ଯ୍ୟଟକଙ୍କ ସୁରକ୍ଷାକୁ ନେଇ ଚିନ୍ତା

ରିପୋର୍ଟ ଅନୁସାରେ, ନିଖୋଜ ଥିବା ୬ ଜଣ ପର୍ଯ୍ୟଟକଙ୍କ ଅବସ୍ଥିତି ଜଣାପଡ଼ିଛି ଏବଂ ସେମାନଙ୍କୁ ହେଲିକପ୍ଟର ଯୋଗେ ଉଦ୍ଧାର କରିବା ପ୍ରକ୍ରିୟା ଚାଲିଛି । ଖରାପ ପାଗ ଯୋଗୁଁ ପାହାଡ଼ିଆ ଅଞ୍ଚଳକୁ ଯାତ୍ରା ନ କରିବା ଏବଂ ପ୍ରଶାସନର ନିର୍ଦ୍ଦେଶ ମାନିବାକୁ ପର୍ଯ୍ୟଟକଙ୍କୁ ପରାମର୍ଶ ଦିଆଯାଇଛି ।