ଅପରେସନ ସିନ୍ଦୂରକୁ ନେଇ ପାର୍ଲାମେଣ୍ଟରେ ବିତର୍କ । ବିରୋଧୀଙ୍କ ପ୍ରଶ୍ନରେ ପ୍ରତିରକ୍ଷା ମନ୍ତ୍ରୀଙ୍କ ଶାଣିତ କଟାକ୍ଷ । କହିଲେ, ପ୍ରଶ୍ନ ପଚାରିବା ଶିଖି ନାହାନ୍ତି ବିରୋଧୀ । ଭାରତର କେତେ ବିମାନ ନଷ୍ଟ ହୋଇଛି ପଚାରୁଥିବା ଲୋକେ ଥରେ ବି ପଚାରି ନାହାନ୍ତି କେତୋଟି ଖସିଛି ଶତ୍ରୁ ପକ୍ଷର ବିମାନ । ରାଜନାଥଙ୍କ ସ୍ପଷ୍ଟୋକ୍ତି... ଅପରେସନ ସିନ୍ଦୂରରେ ଭାରତୀୟ ସେନାର ହୋଇନାହିଁ କୌଣସି କ୍ଷତି । ଯଦି ବିରୋଧୀ ପଚାରନ୍ତି ଆତଙ୍କୀ ଆଡ୍ଡା ନଷ୍ଟ ହୋଇଛି କି, ତାର ଉତ୍ତର ହଁ । ଅପରେସନ ସିନ୍ଦୁର ସଫଳ ହୋଇଛି କି ନାହିଁ, ତାର ଉତ୍ତର ହଁ ।

ଅପରସେନ ସିନ୍ଦୂରକୁ ନେଇ ସାରା ଦେଶରେ ନୂତନ ଉର୍ଜ୍ଜା ଓ ଆତ୍ମବିଶ୍ବାସ ସୃଷ୍ଟି ହୋଇଥିବା ବେଳେ ବିରୋଧୀଙ୍କ ପ୍ରଶ୍ନକୁ ନେଇ କଡ଼ା ସମାଲୋଚନା କରିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ । ବିରୋଧୀ ପ୍ରଶ୍ନ ପଚାରିବା ଶିଖିନାହାନ୍ତି, ସେମାନଙ୍କ ପ୍ରଶ୍ନରେ ଦେଶବାସୀଙ୍କ ଭାବାବେଗର ପ୍ରତିଫଳନ ହେଉନାହିଁ । ଶତ୍ରୁର କେତେ ଯୁଦ୍ଧ ବିମାନ ନଷ୍ଟ ହୋଇଛି ସେ ପ୍ରଶ୍ନ ପଚାରିବା ବଦଳରେ ବିରୋଧୀ ପଚାରୁଛନ୍ତି ଭାରତର କେତେ ବିମାନ ନଷ୍ଟ ହୋଇଛି ।

ଅପରେସନ ସିନ୍ଦୂରରେ ଆତଙ୍କୀ ଆଡ୍ଡାକୁ ଧ୍ବଂସ କରାଯାଇଛି । ଏହି ଅପରସେନରେ ଭାରତୀୟ ସେନାର କୌଣସି କ୍ଷତି ହୋଇନାହିଁ । ପାକିସ୍ତାନ ପାଖରେ ଏଭଳି ଅପରେସନର କୌଣସି ଜବାବ ନଥିଲା । ଭାରତୀୟ ସେନା ଯେଉଁଭଳି ଢଙ୍ଗରେ ଆତଙ୍କୀଙ୍କ ଭାଷାରେ ସେମାନଙ୍କୁ ଜବାବ ଦେଇଛି ସେଥିପାଇଁ ସେମାନେ ପ୍ରଶଂସା ପାଇବାର ହକ୍‌ଦାର । ବିରୋଧୀ ମଧ୍ୟ ସେନାର ପରାକାଷ୍ଠାକୁ ସମ୍ମାନ ଜଣାଇବାର ସମୟ ଆସିଛି ।

ଆତଙ୍କୀଙ୍କୁ ସମର୍ଥନ କରୁଥିବାରୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ପାକିସ୍ତାନକୁ ଟାର୍ଗେଟ କରିଛନ୍ତି । ଯେଉଁ ଦେଶ ଧର୍ମାନ୍ଧତା, ଆତଙ୍କବାଦୀ, ବିଦ୍ବେଷ ସୃଷ୍ଟିକୁ ପ୍ରାଥମିକତା ଦେଉଛି, ସେମାନଙ୍କ ସହ କୌଣସି ଆଲୋଚନା କରାଯିବ ନାହିଁ । ଗୁଳିର ଭାଷା ଆଗରେ ଆଲୋଚନାର ସ୍ବର ଥମିଯାଏ । ଯେଉଁଠି ନୀରିହ ଲୋକଙ୍କ ରକ୍ତପାତ ହେଉଛି ସେଠି ଆଲୋଚନାର କୌଣସି ସମ୍ଭାବନା ନାହିଁ ।

ଭାରତୀୟ ସେନା ସହ ଲଢିବାର ସିଧାସଳଖ ସାମର୍ଥ୍ୟ ନଥିବାରୁ ପ୍ରକ୍ସି ଓ୍ବାର ମାଧ୍ୟମରେ ଅସ୍ଥିରତା ସୃଷ୍ଟି ପାଇଁ ହୀନ ଉଦ୍ୟମ କରୁଛି ପାକିସ୍ତାନ । ଏଥିପାଇଁ ନିରୀହ ଲୋକଙ୍କୁ ଟାର୍ଗେଟ୍ କରାଯାଉଛି । କିନ୍ତୁ ସେମାନେ ଭୁଲି ଯାଉଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ବରେ ନୂଆ ଭାରତ ଯେ କୌଣସି କଠିନ ନିଷ୍ପତ୍ତି ନେବାକୁ ସମର୍ଥ ।

ପହଲଗାମ୍ ଆତଙ୍କୀ ଆକ୍ରମଣ ପରେ ସାରା ଦେଶ ଏକାଠି ହୋଇଥିଲା । ପ୍ରଧାନମନ୍ତ୍ରୀଙ୍କ ଯେ କୌଣସି ନିଷ୍ପତ୍ତିକୁ ପୁରା ଦେଶର ସମର୍ଥନ ରହିଥିଲା । ଏପରିକି ଭାରତର ଅପରେସନ ସିନ୍ଦୂର ପରେ ପାକିସ୍ତାନ ଆଣ୍ଠେଇବାକୁ ପୁରା ପ୍ରସ୍ତୁତ ରହିଥିଲା । କିନ୍ତୁ କେଉଁ ପରିସ୍ଥିତିରେ ଅଚାନକ ଭାରତ ପକ୍ଷରୁ ଅସ୍ତ୍ରବିରତି ପାଇଁ ଘୋଷଣା କରାଗଲା ଓ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ କଣ ଭୂମିକା ରହିଥିଲା ତାକୁ ନେଇ ପ୍ରଶ୍ନ ଉଠାଇଛନ୍ତି କଂଗ୍ରେସ ସାଂସଦ ଗୌରବ ଗୋଗଇ ।

ଆଜି ଗୃହ କାର୍ଯ୍ୟ ଆରମ୍ଭ ପରଠାରୁ ବିରୋଧୀଙ୍କ ପ୍ରବଳ ହଙ୍ଗାମା ଯୋଗୁ ତିନି ଥର ଗୃହ ମୁଲତବୀ କରିଥିଲେ ବାଚସ୍ପତି । ପ୍ରବଳ ହଙ୍ଗାମା ପରେ ପ୍ରଥମେ ଦିନ ୧୨ଟା ଓ ପରେ ଦିନ ଗୋଟାଏ ଏବଂ ଶେଷରେ ଦିନ ୨ଟା ଯାଏ ମୁଲତବୀ ହୋଇଥିଲା ଗୃହ। ତାପରେ ଆରମ୍ଭ ହୋଇଥିଲା ଚର୍ଚ୍ଚା । ଅପରେସନ ସିନ୍ଦୂରକୁ ନେଇ ଉଭୟ ଲୋକସଭା ଓ ରାଜ୍ୟସଭାରେ ୧୬ ଘଣ୍ଟା ଲେଖାଏଁ ଆଲୋଚନା ହେବ ।