Kitchen Talent / ମହିଳାଙ୍କ କମାଲ୍‌... ରାଇତାରେ ରେକର୍ଡ ଗିନିଜ୍‌ ନୁହେଁ, ଲଣ୍ଡନ ବୁକ୍‌ରେ ନାଁ

ରାଇତା ତ ଆପଣ ଅନେକ ଖାଇଥିବେ... କିନ୍ତୁ କେବେ ଭାବିଛନ୍ତି କି, ମାତ୍ର କିଛି ସେକେଣ୍ଡରେ ତିଆରି ହୋଇପାରେ ୫୦୦ ପ୍ରକାରର ରାଇତା ! ଏଭଳି ଅସାଧାରଣ କାରନାମା କରି ଚର୍ଚ୍ଚାରେ ଆସିଛନ୍ତି ନୋଏଡାର ଗୃହିଣୀ ରେଖା ଶର୍ମା । ରୋଷେଇ ଘରର ଛୋଟ ଏକ ପରୀକ୍ଷଣ ଆଜି ତାଙ୍କୁ ପହଞ୍ଚାଇଛି ରେକର୍ଡ ବୁକ୍‌ରେ ।
ମାତ୍ର ୧ ମିନିଟ୍ ୪୮ ସେକେଣ୍ଡରେ ୫୦୦ ପ୍ରକାରର ରାଇତା ପ୍ରସ୍ତୁତ କରି ଲଣ୍ଡନ ବୁକ୍ ଅଫ୍ ରେକର୍ଡସ୍‌ରେ ସ୍ଥାନ ପାଇଛନ୍ତି ରେଖା । ତେବେ ଆସନ୍ତୁ ଜାଣିବା ଖାଦ୍ୟ ପ୍ରତି ତାଙ୍କର ଭଲପାଇବା ଓ ନୂଆ କିଛି କରିବାର ଆଗ୍ରହ ଏହି ଅନନ୍ୟ ସଫଳତାର କାରଣ କିପରି ପାଲଟିଛି ।

ରାଇତା ଖାଇବାକୁ ପ୍ରାୟ ସମସ୍ତେ ପସନ୍ଦ କରନ୍ତି । ଘରେ ମଧ୍ୟ ବିଭିନ୍ନ ପ୍ରକାରର ରାଇତା ତିଆରି ହୋଇଥାଏ । କିନ୍ତୁ ମାତ୍ର ୨ ମିନିଟ୍‌ରୁ କମ୍ ସମୟରେ ୫୦୦ ପ୍ରକାରର ରାଇତା ତିଆରି କରି ଜଣେ ମହିଳା ଏକ ଅନନ୍ୟ ରେକର୍ଡ ସୃଷ୍ଟି କରିଛନ୍ତି । ଏହି ଅସାଧାରଣ ସଫଳତା ପାଇଁ ନୋଏଡାର ଗୃହିଣୀ ରେଖା ଶର୍ମାଙ୍କୁ ଲଣ୍ଡନ ବୁକ୍ ଅଫ୍ ରେକର୍ଡସ୍ ପକ୍ଷରୁ ମାନ୍ୟତା ମିଳିଛି ।

୧ ମିନିଟ୍ ୪୮ ସେକେଣ୍ଡରେ ୫୦୦ ପ୍ରକାର ରାଇତା
ଉତ୍ତରପ୍ରଦେଶର ନୋଏଡା ସେକ୍ଟର-୩୪ର ଅରାବଳୀ ବି-୧ ଅଞ୍ଚଳରେ ରହୁଥିବା ରେଖା ଶର୍ମା ଜଣେ ଗୃହିଣୀ । ଖାଦ୍ୟ ପ୍ରସ୍ତୁତି ପ୍ରତି ତାଙ୍କର ଥିବା ଆଗ୍ରହକୁ ସେ ନିଜର କୌଶଳରେ ପରିଣତ କରିଛନ୍ତି । ମୁଜାଫରନଗରର ଏକ ହୋଟେଲ୍‌ରେ ଆୟୋଜିତ କାର୍ଯ୍ୟକ୍ରମରେ ରେଖା ଶର୍ମା ପ୍ରାୟ ୧୦୦ ଜଣଙ୍କ ଟିମ୍‌ ସହ ମିଶି ମାତ୍ର ୧ ମିନିଟ୍ ୪୮ ସେକେଣ୍ଡରେ ୫୦୦ ପ୍ରକାରର ରାଇତା ପ୍ରସ୍ତୁତ କରିଥିଲେ । ଏହି ଟିମ୍‌ରେ ବିଭିନ୍ନ ସହରରୁ ଆସିଥିବା ପ୍ରଫେସନାଲ୍ ଶେଫ୍‌, ଗୃହିଣୀ ଏବଂ ହୋଟେଲ୍ ମ୍ୟାନେଜମେଣ୍ଟ ଛାତ୍ରଛାତ୍ରୀ ସାମିଲ ଥିଲେ ।

ନୂଆ ନୂଆ ଖାଦ୍ୟ ତିଆରି କରିବା ଥିଲା ଶୌକ
ରେଖା ଶର୍ମା କହିଛନ୍ତି ଯେ, ଛୋଟବେଳୁ ତାଙ୍କର ନୂଆ ନୂଆ ପ୍ରକାରର ଖାଦ୍ୟ ତିଆରି କରିବା ପ୍ରତି ଆଗ୍ରହ ରହିଥିଲା । ଘରେ ସେ ବିଭିନ୍ନ ପ୍ରକାରର ଖାଦ୍ୟ ପ୍ରସ୍ତୁତ କରିଥାନ୍ତି । ସେ ୨୦୧୮ ମସିହାରୁ ଅନଲାଇନ୍ ଓ ଫେସବୁକ୍‌ରେ ହେଉଥିବା ବିଭିନ୍ନ କୁକିଂ ପ୍ରତିଯୋଗିତାରେ ମଧ୍ୟ ଭାଗ ନେଉଥିଲେ ।

ବେକିଂରେ ମଧ୍ୟ ଜିତିଛନ୍ତି ପୁରସ୍କାର
ରେଖା ଶର୍ମାଙ୍କୁ ପୂର୍ବରୁ ‘ବେଷ୍ଟ ବେକର ଅଫ୍ ନୋଏଡା’ ଭଳି ସମ୍ମାନ ମଧ୍ୟ ମିଳିଛି । ଏବେ ୫୦୦ ପ୍ରକାରର ରାଇତା ପ୍ରସ୍ତୁତ କରି ସେ ନିଜ ପ୍ରତିଭାର ଆଉ ଏକ ଉଦାହରଣ ଦେଇଛନ୍ତି । ରେଖା ଶର୍ମାଙ୍କ ଏହି ସଫଳତା ଖାଦ୍ୟ ପ୍ରତି ଆଗ୍ରହ ଓ ସୃଜନଶୀଳତାର ଏକ ଅନନ୍ୟ ଉଦାହରଣ ପାଲଟିଛି ।