ଅର୍ଗସ ବ୍ୟୁରୋ: ବିଷ ବଳୟରେ ଓଡିଶା । ବାୟୁ ପ୍ରଦୂଷଣରେ ଦିଲ୍ଲୀକୁ ଟପିଲା ଅନୁଗୁଳ । କଟକ, ଭୁବନେଶ୍ବର, ବାଲେଶ୍ବରରେ ବି ବାୟୁ ଅତ୍ୟଧିକ ଦୂଷିତ । ଗତ ୩ ତାରିଖ ପ୍ରଦୂଷଣ ମାନର ସୂଚକାଙ୍କରେ ଏଭଳି ତଥ୍ୟ ସାମ୍ନାକୁ ଆସିଛି । ଦିଲ୍ଲୀରେ ଏୟାର କ୍ବାଲିଟି ଇଣ୍ଡେକ୍ସ 341 ଥିବା ବେଳେ ଅନୁଗୁଳ 354 ପଏଣ୍ଟ ସହ ବାୟୁ ପ୍ରଦୂଷଣରେ ଦିଲ୍ଲୀକୁ ପଛରେ ପକାଇ ଦେଇଛି। ଅନୁଗୁଳର ଏୟାର କ୍ବାଲିଟି ଅତି ପ୍ରଦୁଷିତ ଥିବା ରେକର୍ଡ କରାଯାଇଛି। ସେହିପରି ବାଲେଶ୍ବରରେ ପ୍ରଦୂଷଣ ମାତ୍ରା 312 ଓ କଟକରେ 303 ରହିଥିବା ବେଳେ ଭୁବନେଶ୍ବରରେ ପ୍ରଦୂଷଣ ମାତ୍ରା 288 ରହିଛି ।

ରାଜ୍ୟର ୭ ଟି ସହରରେ ପ୍ରଦୂଷଣ ମାତ୍ରା ଅଧିକ ଥିବା ଚିହ୍ନଟ କରାଯାଇଛି । ଯେଉଁଥିରେ ସବୁଠୁ ଅଧିକ ପ୍ରଦୂଷଣ ମାତ୍ରା ଅନୁଗୁଳ ଓ ତାଳଚେର ରେ ଥିବା ଜଣାପଡିଛି । ନିର୍ମାଣାଧୀନ କୋଠା, ରାସ୍ତା ଖୋଳାଯିବା, ରାସ୍ତାପାର୍ଶ୍ବରେ ଅଳିଆ ଆବର୍ଜନା ଓ ବାଲି ଜମା ହେବା ଦ୍ବାରା ସେଥିରୁ ନିର୍ଗତ ହେଉଥିବା ଧୂଳିକଣା ସହରକୁ ଅଧିକ ପ୍ରଦୂଷିତ କରୁଛି। ସେହିପରି ଘନ କୁହୁଡ଼ି ସାଙ୍ଗକୁ ପବନର ବେଗ ମନ୍ଥର ଓ ବାୟୁରେ ଆର୍ଦ୍ରତା ରହିଥିବାରୁ ପ୍ରଦୂଷଣ ମାତ୍ରା ବଢ଼ୁଥିବା ବିଶେଷଜ୍ଞମାନେ କହିଛନ୍ତି।

ବିଶେଷ କରି ଖଣି ଓ କଳକାରଖାନା ରୁ ବାହାରୁ ଥିବା ବିଷାକ୍ତ ଧୂଆ ବାୟୁକୁ ଅଧିକ ଦୂଷିତ କରୁଛି । ଶୀତ ଦିନରେ କୁହୁଡି ର ମାତ୍ରା ଅଧିକ ଥିବାରୁ ପ୍ରଦୂଷଣ ମାତ୍ରା ବଢ଼ୁଛି । ତେବେ ଏହାକୁ ନିୟନ୍ତ୍ରଣ କରିବା ଦିଗରେ ସରକାର ଉଚିତ ପଦକ୍ଷେପ ନ ନେଲେ ଏହି ୭ ସହର ରେ ଫୁସଫୁସ ଓ ହୃଦ ଜନିକ ରୋଗ ବଢ଼ିବା ନେଇ ଆଶଙ୍କା କରାଯାଉଛି ।

ଗତ ଦୀପାବଳି ସମୟରେ ଭୁବନେଶ୍ବରରେ ବାୟୁ ପ୍ରଦୂଷଣର ସାଙ୍ଘାତିକ ସ୍ଥିତି ଦେଖିବାକୁ ମିଳିଥିଲା। ଏପରିକି 2018 ମସିହାରେ ଏକ ଶୁଣାଣି ରେ ଅତ୍ୟଧିକ ଗାଡି ଚଳାଚଳ, କଳକାରଖାନା ରୁ ବାହାରୁ ଥିବା ବିଶାକ୍ତ ଗ୍ୟାସ , ନିର୍ମାଣ ଓ ଧ୍ବଂସ ଯୋଗୁଁ ବାହାରୁ ଥିବା ସିମେଣ୍ଟ ଓ ଧୂଳି ଗୁଣ୍ଡ ଓଡିଶାରେ ବାୟୁ ପ୍ରଦୂଷଣ ର କାରଣ ବୋଲି କହିଥିଲେ ଏନଜିଟି । ହେଲେ ତଥାପି ପ୍ରଦୂଷଣ କମିବା ବଦଳରେ ବଢ଼ିବା ପ୍ରଦୂଷଣ ନିୟନ୍ତ୍ରଣ ନେଇ ରାଜ୍ୟ ସରକାରଙ୍କ କାର୍ଯ୍ୟକାରିତା ଉପରେ ପ୍ରଶ୍ନ ଉଠାଇଛି ।

ଆହୁରି ପଢନ୍ତୁ ଭାରତ ଖବର...

Argus News | argus news | -Argusnews Home: Odisha Latest News, Breaking News, Trending News, Live TV and more