Jammu Kashmir / ଉମର ଅବଦୁଲ୍ଲା ସରକାର ପାଇଁ ବଢ଼ିଲା ଅଡୁଆ, ୨୫ ବିଧାୟକଙ୍କ ୧୪ ଦିନିଆ ଅଲ୍ଟିମେଟମ୍

ଶ୍ରୀନଗର: ଜମ୍ମୁ-କାଶ୍ମୀରରେ ଉମର ଅବଦୁଲ୍ଲା ସରକାରକୁ ନେଇ ରାଜନୈତିକ ଚର୍ଚ୍ଚା ବଢ଼ିଛି । ଶାସକ ଦଳ ନ୍ୟାସନାଲ କନଫରେନ୍ସ (NC)ର ୨୫ ଜଣ ଅସନ୍ତୁଷ୍ଟ ବିଧାୟକ ଦଳର ନେତୃତ୍ୱକୁ ୧୪ ଦିନର ଅଲ୍ଟିମେଟମ୍ ଦେଇଛନ୍ତି । ଏହି ସମୟ ମଧ୍ୟରେ ସେମାନଙ୍କ ଦାବି ପୂରଣ ନହେଲେ ସରକାରରୁ ସମର୍ଥନ ଫେରାଇ ନେବାକୁ ବିଧାୟକମାନେ ଚେତାବନୀ ଦେଇଥିବା କୁହାଯାଉଛି ।

ରିପୋର୍ଟ ଅନୁସାରେ, ଅସନ୍ତୁଷ୍ଟ ବିଧାୟକମାନେ ଦଳରେ ବଡ଼ ପରିବର୍ତ୍ତନ ଚାହୁଁଛନ୍ତି । ସମସ୍ତ ବର୍ତ୍ତମାନର ମନ୍ତ୍ରୀଙ୍କୁ ପଦରୁ ହଟାଇ ନୂଆ ମନ୍ତ୍ରିମଣ୍ଡଳ ଗଠନ କରିବା । ଏଥିସହ ମୁଖ୍ୟମନ୍ତ୍ରୀଙ୍କ ପରାମର୍ଶଦାତାଙ୍କୁ ମଧ୍ୟ ହଟାଇବାକୁ ଦାବି କରିଛନ୍ତି ।

କ’ଣ ରହିଛି ବିଧାୟକଙ୍କ ଦାବି ?

ଅସନ୍ତୁଷ୍ଟ ବିଧାୟକମାନେ ଚାହୁଁଛନ୍ତି ଯେ, ମନ୍ତ୍ରୀ ଚୟନ ସମୟରେ କେବଳ କିଛି ନେତାଙ୍କ ନିଷ୍ପତ୍ତିକୁ ଗୁରୁତ୍ୱ ନଦେଇ ସମସ୍ତ ବିଧାୟକଙ୍କ ସହ ଆଲୋଚନା କରାଯାଉ । ଯୋଗ୍ୟତା ଆଧାରରେ ନୂଆ ମନ୍ତ୍ରିମଣ୍ଡଳ ଗଠନ କରାଯାଉ ବୋଲି ସେମାନେ ଦାବି କରିଛନ୍ତି । ମୁଖ୍ୟମନ୍ତ୍ରୀଙ୍କ ପରାମର୍ଶଦାତା ନାସିର ଅସଲମ ୱାନିଙ୍କ ସହ କିଛି ମନ୍ତ୍ରୀଙ୍କୁ ଦାୟିତ୍ୱରୁ ହଟାଇବାକୁ ମଧ୍ୟ ଦାବି ହୋଇଛି ।

କେବଳ ମନ୍ତ୍ରିମଣ୍ଡଳ ପରିବର୍ତ୍ତନ ନୁହେଁ, ଦଳର ନିର୍ବାଚନୀ ପ୍ରତିଶ୍ରୁତିକୁ ମଧ୍ୟ ପୂରଣ କରିବାକୁ ଅସନ୍ତୁଷ୍ଟ ବିଧାୟକମାନେ ଚାହୁଁଛନ୍ତି । ଯଦି ୧୪ ଦିନ ମଧ୍ୟରେ ସେମାନଙ୍କ ଦାବି ଉପରେ ଠୋସ୍ ପଦକ୍ଷେପ ନିଆନଯାଏ । ତେବେ ବିଧାୟକମାନେ ରାଜଭବନ ଯାଇ ସରକାରରୁ ସମର୍ଥନ ପ୍ରତ୍ୟାହାର କରିବାକୁ ଘୋଷଣା କରିବାକୁ ଏକ ପ୍ରକାର ଚେତାବନୀ ଦେଇଥିବା କୁହାଯାଉଛି ।

ଏଥିସହ ପଢ଼ନ୍ତୁ: ୨୦୨୭ ନିର୍ବାଚନ ପୂର୍ବରୁ AAP ଛାଡ଼ିଲେ ପଞ୍ଜାବର ୨ ବିଧାୟକ 

ଇସ୍ତଫା ଦେବେ ଆଗା ସୟଦ ରୁହୁଲ୍ଲା ?

ରାଜନୈତିକ ଟଣା ଓଟରା ଭିତରେ ଶ୍ରୀନଗରର ଲୋକସଭା ସାଂସଦ ଆଗା ସୟଦ ରୁହୁଲ୍ଲା ମେହଦୀଙ୍କ ଘୋଷଣା ମଧ୍ୟ ନ୍ୟାସନାଲ କନଫରେନ୍ସ ପାଇଁ ଚିନ୍ତା ବଢ଼ାଇଛି । ସେ ନଭେମ୍ବର ୩ରେ ଦଳ ଏବଂ ଲୋକସଭା ସଦସ୍ୟ ପଦରୁ ଇସ୍ତଫା ଦେବେ ବୋଲି ଘୋଷଣା କରିଛନ୍ତି । ଦଳର ଆଭ୍ୟନ୍ତରୀଣ ଅସନ୍ତୋଷ ସହ ତାଙ୍କ ଘୋଷଣା ନେତୃତ୍ୱ ପାଇଁ ଆଉ ଏକ ଚ୍ୟାଲେଞ୍ଜ ହୋଇଛି ।

ଭାଙ୍ଗିଯିବ ସରକାର !

ଜମ୍ମୁ-କାଶ୍ମୀର ବିଧାନସଭାରେ ମୋଟ ୯୦ଟି ଆସନ ରହିଛି । ଏଥିରୁ ନ୍ୟାସନାଲ କନଫରେନ୍ସର ୪୧ ଜଣ ବିଧାୟକ ଅଛନ୍ତି । ଯଦି ୨୫ ଜଣ ବିଧାୟକ ଏକାଠି ହୋଇ ସରକାରରୁ ସମର୍ଥନ ଫେରାଇ ନିଅନ୍ତି, ତେବେ ଉମର ଅବଦୁଲ୍ଲା ସରକାରର ବହୁମତ ଉପରେ ବଡ଼ ପ୍ରଭାବ ପଡ଼ିପାରେ ।

ଏବେ ଦଳର ନେତୃତ୍ୱ ପାଇଁ ସବୁଠୁ ବଡ଼ ଚ୍ୟାଲେଞ୍ଜ ହେଉଛି ଅସନ୍ତୁଷ୍ଟ ବିଧାୟକଙ୍କୁ ମନାଇବା ଏବଂ ଦଳରେ ବିଦ୍ରୋହ ରୋକିବା । ଆଗାମୀ ୧୪ ଦିନ ଜମ୍ମୁ-କାଶ୍ମୀରର ରାଜନୀତି ପାଇଁ ଗୁରୁତ୍ୱପୂର୍ଣ୍ଣ ହୋଇପାରେ ।