ନୂଆଦିଲ୍ଲୀ: ଏକାଧିକ ରାଜ୍ୟରେ ବର୍ଷା, ବନ୍ୟା ଯୋଗୁଁ ପ୍ରଭାବିତ ହୋଇଛି ପିଆଜ ଯୋଗାଣ । କ୍ରମାଗତ ବର୍ଷାରେ ପିଆଜ ଫସଲ ନଷ୍ଟ ବଢ଼ାଇଛି ଦର । ବଜାରରେ ପିଆଜର ମୂଲ୍ୟ ବଢ଼ି ଚାଲିଥିବା ବେଳେ କେନ୍ଦ୍ର ସରକାର ନେଇଛନ୍ତି ବଡ଼ ପଦକ୍ଷେପ । ଲୋକଙ୍କୁ କମ୍ ଦରରେ ପିଆଜି ଯୋଗାଇବା ପାଇଁ ସରକାର ଆରମ୍ଭ କରିଛନ୍ତି ପିଆଜ ବିକ୍ରି ।

ଦିଲ୍ଲୀ, ମୁମ୍ବାଇ ଓ ଅହମଦାବାଦରେ ସରକାର ସବସିଡି ଦରରେ ପିଆଜ କେଜି ପିଛା ୨୪ ଟଙ୍କାରେ ବିକ୍ରି ଆରମ୍ଭ କରିଛନ୍ତି । ଏଥିପାଇଁ କେନ୍ଦ୍ର ଖାଦ୍ୟ ମନ୍ତ୍ରୀ ପ୍ରହଲ୍ଲାଦ ଯୋଶୀ ମୋବାଇଲ୍ ଭ୍ୟାନ୍‌ର ଶୁଭାରମ୍ଭ ପତାକା ଦେଖାଇ କରିଛନ୍ତି । କେନ୍ଦ୍ର ଖାଦ୍ୟ ମନ୍ତ୍ରୀ କହିଛନ୍ତି- ନାଫେଡ୍, ଏନସିସିଏଫ୍ ଓ କେନ୍ଦ୍ରୀୟ ଭଣ୍ଡାର ଜରିଆରେ ସରକାର ବଫର ଷ୍ଟକରୁ ପ୍ରାୟ ୨୫ ଟନ୍ ପିଆଜ ବିକ୍ରି କରିବେ ।

ଦେଶରେ ଯେଉଁ ସବୁ ସ୍ଥାନରେ ପିଆଜ କେଜି ପିଛା ଦର ୩୦ ଟଙ୍କାରୁ ଅଧିକ ରହିଛି ସେଠାରେ ସରକାର ପିଆଜ କେଜି ପିଛା ୨୪ ଟଙ୍କାରେ ବିକ୍ରି କରିବେ । ଶୁକ୍ରବାର ସବସିଡି ପିଆଜ ଚେନ୍ନାଇ, ଗୌହ୍ଵାଟି ଓ କୋଲକାତାରେ ବିକ୍ରି ହେବ ଏବଂ ଏହା ଡିସେମ୍ବର ମାସ ପର୍ଯ୍ୟନ୍ତ ଜାରି ରହିବ ବୋଲି ସୂଚନା ଦେଇଛନ୍ତି କେନ୍ଦ୍ର ଖାଦ୍ୟ ମନ୍ତ୍ରୀ ।

ସରକାରୀ ତଥ୍ୟ ଅନୁସାରେ, ଗୁରୁବାର ଦେଶରେ ପିଆଜର ହାରାହାରି ଖୁଚୁରା ମୂଲ୍ୟ ୨୮ ଟଙ୍କା ରହିଛି । କେତକ ସହରରେ ପିଆଜର କେଜି ପିଛା ଦର ୩୦ ଟଙ୍କାରୁ ଅଧିକ ବି ରହିଛି । ଏବେ କେନ୍ଦ୍ର ସରକାରଙ୍କ ନିକଟରେ ବଫର ଷ୍ଟକରେ ୩ ଲକ୍ଷ ଟନରୁ ଅଧିକ ପିଆଜ ରହିଛି ।

ବଫର ଷ୍ଟକରେ ଥିବା ପିଆଜକୁ ସରକାରୀ ଏଜେନ୍ସି ୨୦୨୪-୨୫ ବର୍ଷରେ ହାରାହାରି କେଜି ପିଛା ୧୫ ଟଙ୍କା ମୂଲ୍ୟରେ କିଣିଥିଲେ । ଏବେ ବଜାରରେ ପିଆଜର ମୂଲ୍ୟ ସ୍ଥିର ରଖିବା ଲାଗି କେନ୍ଦ୍ର ସରକାର ସେହି ବଫର ଷ୍ଟକ ପିଆଜକୁ ଲୋକଙ୍କୁ ବିକ୍ରି କରିବେ ।

Argus News | argus news | -Argusnews Home: Odisha Latest News, Breaking News, Trending News, Live TV and more