ଅନଲାଇନ ଗେମିଂ ଯୋଗୁ ଆର୍ଥିକ ଓ ସାମାଜିକ କ୍ଷତି ରୋକିବାକୁ ସଂସଦରେ ପାସ୍ ହୋଇଛି ବିଲ୍ । ଗତକାଲି ଲୋକସଭା ଓ ଆଜି ରାଜ୍ୟସଭାରେ ବିଲ୍ ପାସ୍ ସହ ଦେଶରେ ଅନଲାଇନ ମନି ଗେମ୍ ଉପରେ ଲାଗିବାକୁ ଯାଉଛି ରୋକ୍ । ଅନଲାଇନ ଗେମ ର ଅଫର କିମ୍ବା ପ୍ରଚାର କଲେ ୩ ବର୍ଷ ଜେଲ ଦଣ୍ଡ ସହ ଦେବାକୁ ପଡ଼ିବ ୧ କୋଟି ଜରିମାନା । ମହାଦେବ ବେଟିଂ ଆପ୍ ମାମଲାରେ ଛତିଶଗଡ଼ର ପୂର୍ବତନ ମୁଖ୍ୟମନ୍ତ୍ରୀ ଭୂପେଶ ବଘେଲ ଏବେବି ଇଡି ରାଡାରରେ ଥିବାବେଳେ ଗତମାସରେ ତାଙ୍କ ପୁଅ ଚୈତନ୍ୟ ବଘେଲଙ୍କୁ ଗିରଫ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ମାମଲାରେ ସାଉଥ ଫିଲ୍ମ ଇଷ୍ଟଷ୍ଟ୍ରିର ୨୯ ଜଣ କଳାକାରଙ୍କୁ ମଧ୍ୟ ଇଡି ନୋଟିସ ଜାରିଥିଲା । ବିଲ୍ ଆଇନରେ ପରିଣତ ହେବା ପରେ -
1. ଟଙ୍କା-ଭିତ୍ତିକ ଅନଲାଇନ୍ ଗେମ ବେଆଇନ ଘୋଷିତ ହେବ
2. ଅନଲାଇନ ଗେମ୍ସ ପ୍ଲାଟଫର୍ମକୁ ପ୍ରୋତ୍ସାହିତ କରୁଥିବା ବିଜ୍ଞାପନ ନିଷିଦ୍ଧ ହେବ
3. ବ୍ୟାଙ୍କ ଓ ଆର୍ଥିକ ପ୍ରତିଷ୍ଠାନଗୁଡ଼ିକ ଅନଲାଇନ ଗେମିଂ ସମ୍ବନ୍ଧିୟ କାରବାର କରିପାରିବେ ନାହିଁ
4. ଅନ୍‌ଲାଇନ୍ ମନି ଗେମିଂ, ବିଜ୍ଞାପନ, ଖେଳିବା ପାଇଁ ପ୍ରବର୍ତ୍ତାଇଲେ ୩ବର୍ଷ ଜେଲ୍‌ ଦଣ୍ତ ସହ ଦେବାକୁ ପଡ଼ିବ ୧ କୋଟି ଜରିମାନା
5. ଅନଲାଇନ୍ ଗେମିଂ ପ୍ଲାଟଫର୍ମ ଗୁଡ଼ିକ ସେଲ୍ଫ-ରେଗୁଲେଟରୀ ସିଷ୍ଟମ ବା SRO ପରିସରକୁ ଆସିବ

ଅନଲାଇନ ଗେମ ନିଶା କେବଳ ଆର୍ଥିକ କ୍ଷତି ନୁହେଁ, ବରଂ ସୃଷ୍ଟି କରୁଥିଲା ସାମାଜିକ ସଙ୍କଟ । ଏବେ ଭାରତରେ ଅନଲାଇନ୍ ଗେମିଂର ବଜାର ୩୨ ହଜାର କୋଟିରେ ପହଞ୍ଚିଥିବବେଳେ ଖେଳ ନିଶା ଯୋଗୁ ଶହ ଶହ ପରିବାର ହେଉଛନ୍ତି ସର୍ବସ୍ବାନ୍ତ । ଗତମାସରେ ବାଲେଶ୍ବର ରେମୁଣା ଥାନା ବାଲିଆ ଅଞ୍ଚଳର ତପନ ଗିରିଙ୍କ ୧୪ବର୍ଷର ପୁଅ ପ୍ରିନ୍ସ ଅନଲାଇନ ଗେମ୍ ଜାଲରେ ପଡ଼ି ନିଜ ଜୀବନ ନିଜେ ନେଇଥିଲେ । ୯ମ ଶ୍ରେଣୀ ଛାତ୍ର ପ୍ରିନ୍ସ ପରିବାରର ଏକ ମାତ୍ର ସନ୍ତାନ ଥିଲେ ।

ପିଲାଙ୍କ ଉପରେ ଅନଲାଇନ୍ ଗେମର ପଢୁଛି କୁପ୍ରଭାବ । ପିଲାଙ୍କୁ ଆକ୍ରମଣାତ୍ମକ ବନାଉଛି ଅନଲାଇନ ଗେମିଂ । ଗେମିଂ ଅର୍ଥରୁ ଟେରର ଫଣ୍ଡିଂ ସହ ଧର୍ମାନ୍ତରୀକରଣ ପାଇଁ ବି ବ୍ୟବହାର ହେଉଥିବା ଅଭିଯୋଗ ରହିଛି । ଦେଶରେ ଅନଲାଇନ୍ ଗେମ୍ ଖେଳୁଥିବା ଲୋକଙ୍କ ସଂଖ୍ୟା ୫୯ କୋଟିରେ ପହଞ୍ଚିଥିବାବେଳେ ବର୍ଷକୁ ସଟ୍ଟେବାଜିରେ କ୍ଷତି ହେଉଥିଲା ୨୦ ହଜାର କୋଟି ।

Argus News | argus news | Odisha Latest News, Breaking News, Trending News, Live TV