Open Borewell / ଖୋଲା ବୋରୱେଲ୍ ନେଲା ଜୀବନ... ୧୦ ଘଣ୍ଟାର ଉଦ୍ଧାର ବିଫଳ

ଖେଳୁଥିବା ବେଳେ ହଠାତ୍ ଖୋଲା ବୋରୱେଲ୍‌ରେ ଖସିପଡ଼ିଲା ୩ ବର୍ଷର ନିଷ୍ପାପ ଶିଶୁ । ପ୍ରାୟ ୧୦ ଘଣ୍ଟା ଧରି ଚାଲିଲା ଜୀବନ-ମରଣର ଲଢ଼େଇ । ଶିଶୁକୁ ବଞ୍ଚାଇବା ପାଇଁ ରାତିସାରା ଲାଗି ରହିଥିଲେ NDRF, SDRF ସମେତ ଅନେକ ଉଦ୍ଧାରକାରୀ ଦଳ। ଉଦ୍ଧାର ବେଳେ ଶୁଣାଯାଉଥିଲା ଶିଶୁର କାନ୍ଦିବା ଶବ୍ଦ, ଯାହା ପରିବାରରେ ଆଶା ବଢ଼ିଥିଲା । ହେଲେ ଭୋର ହେଉ ହେଉ ଶେଷ ହୋଇଗଲା ସବୁ ଆଶା । ବୋରୱେଲ୍‌ରୁ ବାହାରିବା ପରେ ଡାକ୍ତର ଶିଶୁଟିକୁ ମୃତ ଘୋଷଣା କରିଥିଲେ ।

କିପରି ଘଟିଲା ଘଟଣା ?
ସୂଚନା ଅନୁସାରେ, "ରବିବାର ସନ୍ଧ୍ୟା ପ୍ରାୟ ୬ଟା ସମୟରେ ସିହି ଗାଁରେ ଅନ୍ୟ ପିଲାମାନଙ୍କ ସହ ଶିଶୁଟି ଖେଳୁଥିଲା। ବୋରୱେଲ୍‌ ନିକଟରେ ଥିବା ଏକ ଟ୍ରାକ୍ଟର ଉପରେ ପିଲାମାନେ ଚଢ଼ିଥିବା ବେଳେ ଶିଶୁଟି ଖସି ଖୋଲା ବୋରୱେଲ୍‌ ଭିତରକୁ ପଡ଼ିଯାଇଥିବା କୁହାଯାଇଛି। ଅନ୍ୟ ପିଲାମାନେ ଚିତ୍କାର କରିବା ପରେ ପରିବାର ଓ ସ୍ଥାନୀୟ ଲୋକେ ଘଟଣା ସମ୍ପର୍କରେ ଜାଣିଥିଲେ ।"

ରାତିସାରା ଚାଲିଥିଲା ଉଦ୍ଧାର କାର୍ଯ୍ୟ
ଘଟଣାର ଖବର ପାଇବା ପରେ ପୋଲିସ, NDRF, ହରିୟାଣା SDRF, ଅଗ୍ନିଶମ ବାହିନୀ, ମେଡିକାଲ୍ ଟିମ୍, ୟୁପି ସିଭିଲ୍ ଡିଫେନ୍ସ ଓ ନଗର ନିଗମର ଟିମ୍ ଘଟଣାସ୍ଥଳରେ ପହଞ୍ଚିଥିଲେ। NDRF କଣ୍ଟ୍ରୋଲ୍ ରୁମ୍‌କୁ ପ୍ରାୟ ୭ଟା ୪୫ରେ ସୂଚନା ମିଳିଥିବା ବେଳେ ଟିମ୍ ପ୍ରାୟ ୯ଟା ୫ ମିନିଟ୍‌ରେ ଘଟଣାସ୍ଥଳରେ ପହଞ୍ଚିଥିଲା । ଉଦ୍ଧାରକାରୀ ଦଳ ବୋରୱେଲ୍‌ର ସମାନ୍ତରାଳ ଭାବେ ଖୋଳିବା ସହ ଶିଶୁଟି ପର୍ଯ୍ୟନ୍ତ ପହଞ୍ଚିବାକୁ ଚେଷ୍ଟା କରିଥିଲେ । ଅନ୍ଧାର ଯୋଗୁଁ ଅଭିଯାନରେ ସମସ୍ୟା ହେବାରୁ ଘଟଣାସ୍ଥଳରେ ଅତିରିକ୍ତ ଆଲୋକ ବ୍ୟବସ୍ଥା କରାଯାଇଥିଲା । ବୋରୱେଲ୍‌ ଭିତରର ସ୍ଥିତି ଜାଣିବା ପାଇଁ କ୍ୟାମେରା ମଧ୍ୟ ବ୍ୟବହାର କରାଯାଇଥିଲା । ଉଦ୍ଧାର ସମୟରେ ଶିଶୁଟିର କାନ୍ଦିବା ଶବ୍ଦ ଶୁଣାଯାଇଥିବା ମଧ୍ୟ ରିପୋର୍ଟରେ କୁହାଯାଇଛି ।

ବାହାର କରାଯିବା ପରେ ବି ବଞ୍ଚାଇହେଲା ନାହିଁ
ଦୀର୍ଘ ସମୟର ଉଦ୍ଧାର କାର୍ଯ୍ୟ ପରେ ଭୋର ପ୍ରାୟ ୩ଟା ୫୦ରେ ଶିଶୁଟିକୁ ବାହାର କରାଯାଇଥିଲା । ସେତେବେଳେ ତା'ଠାରେ କୌଣସି ଚଳନ ନଥିବା ଜଣାପଡ଼ିଥିଲା । ତୁରନ୍ତ ତାକୁ ଏକ ଘରୋଇ ହସ୍ପିଟାଲ୍‌କୁ ନିଆଯାଇଥିଲେ ମଧ୍ୟ ଡାକ୍ତର ମୃତ ଘୋଷଣା କରିଥିଲେ । ଶବର ପୋଷ୍ଟମର୍ଟମ୍ କରାଯିବା ନେଇ ମଧ୍ୟ ରିପୋର୍ଟ ରହିଛି ।

ପୁରୁଣା ବୋରୱେଲ୍‌କୁ ନେଇ ଉଠିଲା ପ୍ରଶ୍ନ
ରିପୋର୍ଟ ଅନୁସାରେ, "ବୋରୱେଲ୍‌ଟି ଫରିଦାବାଦ ନଗର ନିଗମର ଏବଂ ଦୀର୍ଘ ସମୟ ଧରି ବ୍ୟବହାର ହେଉନଥିଲା । ପୂର୍ବରୁ ଏହା ଉପରେ ଢାଙ୍କଣ ଥିଲା, କିନ୍ତୁ ଘଟଣାର କିଛି ଦିନ ପୂର୍ବରୁ ଢାଙ୍କଣଟି ହଟିଯାଇଥିବା କିମ୍ବା ନଥିବା ନେଇ ପରିବାର ପକ୍ଷରୁ କୁହାଯାଇଛି ।" ଏହି ଘଟଣା ପରେ ଖୋଲା ବୋରୱେଲ୍‌ଗୁଡ଼ିକୁ ନେଇ ପୁଣିଥରେ ପ୍ରଶ୍ନ ଉଠିଛି ।