ଜାମ୍ମୁ କାଶ୍ମୀରରେ ଅପରେସନ ଅଖାଲ୍ ଜାରି । ନିପାତ ହୋଇଛନ୍ତି ୩ ଆତଙ୍କବାଦୀ । ଦକ୍ଷିଣ କଶ୍ମୀରର କୁଲଗାମ ନିକଟ ଅଖାଲ୍ ଜଙ୍ଗଲରେ ଆତଙ୍କବାଦୀ ଲୁଚି ରହିଥିବା ଗୁଇନ୍ଦା ସୂଚନା ପରେ ଆରମ୍ଭ ହୋଇଥିବା ସେନା ଅପରେସନକୁ ମିଳିଛି ସଫଳତା । ଶନିବାର ୩ ଆତଙ୍କବାଦୀଙ୍କ ମୁଣ୍ଡ ଗଡ଼ାଇଥିଲେ ଯବାନ । ଆତଙ୍କବାଦୀଙ୍କ ସହ ଗୁଳି ବିନିମୟରେ ଜଣେ ଯବାନ ଆହତ ହୋଇ ହସପିଟାଲରେ ଭର୍ତ୍ତି ହୋଇଛନ୍ତି ।

ସେନା ସହ ଜାମ୍ମୁ-କାଶ୍ମୀର ପୋଲିସ, ସିଆରପିଏଫର ମିଳିତ ଅପରେସନ ଜୋରଦାର ହୋଇଛି । ଗତକାଲି ନିହତ ହୋଇଥିବା ଆତଙ୍କବାଦୀମାନେ ଲସ୍କର-ଇ-ତୋଇବାର ସହଯୋଗୀ ଟିଆରଏଫ ସଦସ୍ୟ ହୋଇଥିବା ସେନା ପକ୍ଷରୁ ସୂଚନା ଦିଆଯାଇଛି। ପହଲଗାମ ଆତଙ୍କବାଦୀ ଆକ୍ରମଣରେ ସଂପୃକ୍ତ ଟିଆରଏଫ ଆତଙ୍କୀଙ୍କୁ ନିପାତ ପାଇଁ ସେନା ପକ୍ଷରୁ ବଡ଼ ଅଭିଯାନ ଜାରି ରହିଛି । ଏପ୍ରିଲ ୨୨ ଆକ୍ରମଣ ପରଠାରୁ ଜାମ୍ମୁ କାଶ୍ମୀରରେ ୨୦ ଆତଙ୍କବାଦୀଙ୍କୁ ନିପାତ କରାଯାଇଛି।