୦୭/୦୫,ଭୁବନେଶ୍ବର: ଆଜିକୁ ଠିକ୍ ବର୍ଷେ ତଳେ ଭାରତୀୟ ସେନା ପାକିସ୍ତାନୀ ଆତଙ୍କବାଦ ବିରୋଧରେ କରିଥିଲା ଏକ ବଡ଼ ଧରଣର ପ୍ରହାର । ପହଲଗାମରେ ନିରୀହ ପର୍ଯ୍ୟଟକଙ୍କ ରକ୍ତର ପ୍ରତିଶୋଧ ନେଇଥିଲା ଭାରତ । 'ଅପରେସନ୍ ସିନ୍ଦୂର'  ଯାହା ପାକିସ୍ତାନର ଅହଂକାରକୁ ଧୂଳିସାତ୍ କରିଦେଇଥିଲା

୨୨ ଏପ୍ରିଲ, ୨୦୨୫ । କାଶ୍ମୀରର ପହଲଗାମ ଉପତ୍ୟକାରେ ଖେଳିଯାଇଥିଲା ରକ୍ତର ହୋଲି । ପାକିସ୍ତାନ ସମର୍ଥିତ ଆତଙ୍କବାଦୀମାନେ ନିରୀହ ପର୍ଯ୍ୟଟକଙ୍କୁ ଧର୍ମ ପଚାରି ଗୁଳି କରିଥିଲେ । ଏହି ବର୍ବରକାଣ୍ଡରେ ୨୬ ଜଣ ପ୍ରାଣ ହରାଇଥିଲେ । ସାରା ଦେଶ ସ୍ତବ୍ଧ ହୋଇଯାଇଥିଲା, କିନ୍ତୁ ଏଥର ଭାରତ ଚୁପ୍ ରହିବାର ନଥିଲା । ଠିକ୍ ୧୫ ଦିନ ପରେ, ମେ' ୭ ତାରିଖ ଭୋର ସମୟ । ଭାରତ ଆରମ୍ଭ କଲା 'ଅପରେସନ୍ ସିନ୍ଦୂର । ବ୍ରାହ୍ମୋସ ମିସାଇଲ୍ ଏବଂ ବାୟୁସେନାର ଘାତକ ପ୍ରହାରରେ ଥରି ଉଠିଲା ପାକିସ୍ତାନର ରାଓଲପିଣ୍ଡି ଏବଂ ଚକଲାଲା ଏୟାରବେସ୍ । କେବଳ ସେତିକି ନୁହେଁ, ପାକିସ୍ତାନ ଅଧିକୃତ କାଶ୍ମୀର ଏବଂ ପାକିସ୍ତାନ ଭିତରେ ଥିବା ୯ଟି ଆତଙ୍କବାଦୀ କ୍ୟାମ୍ପକୁ ମାଟିରେ ମିଶାଇ ଦେଲା ଭାରତୀୟ ସେନା । ଅପରେସନ ସିନ୍ଦୁରକୁ ପ୍ରଧାନମନ୍ତ୍ରୀ ମୋଦି କହିଥିଲେ, ଏହା କୋଟି କୋଟି ଭାରତୀୟଙ୍କ ଭାବନା। ଯେଉଁମାନେ ଆମ ମା ଓ ଭଉଣୀଙ୍କ ସିନ୍ଦୁର ଉଜାଡିଥିଲେ ଅପରେସନ ସିନ୍ଦୁର ହେଉଛି ତାର ଯବାବ ।

ପଢନ୍ତୁ ଏହି ଖବର: 'ବନ୍ଦେ ମାତରମ୍' କୁ ନେଇ ମୋଦି ସରକାରଙ୍କ ବଡ଼ ନିଷ୍ପତ୍ତି; ଅପମାନ କଲେ ଯିବେ ଜେଲ୍!

ଆକ୍ରମଣର ଲକ୍ଷ୍ୟ ଲସ୍କର-ଇ-ତୋଏବା ଏବଂ ଜୈସ-ଇ-ମହମ୍ମଦର ପ୍ରମୁଖ ଘାଟି । ୧୦୦ରୁ ଅଧିକ ଆତଙ୍କବାଦୀ ନିହତ ହୋଇଥିଲେ । ପ୍ରଥମ ଥର ପାଇଁ ପାକିସ୍ତାନ ଉପରେ ହୋଇଥିଲା ସିଧାସଳଖ ଆକ୍ରମଣ । ମେ' ୧୦ ତାରିଖ ସନ୍ଧ୍ୟାରେ ଭାରତ ନିଜ ସର୍ତ୍ତରେ ଅସ୍ତ୍ରବିରତି ଘୋଷଣା କରିଥିଲା । ଏହି ଅପରେସନ୍ ପାକିସ୍ତାନର 'ପ୍ରକ୍ସି ୱାର୍' ଏବଂ ପରମାଣୁ ଧମକର ଭୟକୁ ଶେଷ କରିଦେଇଥିଲା । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ କହିବା ଅନୁଯାୟୀ, ଭାରତ ନିଜ ସାମର୍ଥ୍ୟ ପ୍ରମାଣିତ କରିଛି ଏବଂ ଆବଶ୍ୟକ ପଡିଲେ ସୀମା ପାର୍ କରି ଶତ୍ରୁକୁ ମାରିବାକୁ ପଛାଇବ ନାହିଁ । ଅପରେସନ୍ ସିନ୍ଦୂର କେବଳ ଏକ ପ୍ରତିଶୋଧ ନଥିଲା, ଏହା ଥିଲା ନୂଆ ଭାରତର ସଂକଳ୍ପ ।"

ଆଜି 'ଅପରେସନ୍ ସିନ୍ଦୂର'କୁ ଏକ ବର୍ଷ ପୂରିଛି । ଶତ୍ରୁ ଦେଶ ପାଇଁ ଏହା ଏକ କଡ଼ା ଚେତାବନୀ ଯେ ଯଦି ଭାରତକୁ କେହି ଆଖି ଦେଖାଇବ, ତେବେ ତାର ପରିଣାମ ଭୟଙ୍କର ହେବ ।