ହାତରେ ଥିଲା ଆଉ ମାତ୍ର ୧୫ ମିନିଟ୍ । ହେଲେ ଏମିତି କିଛି ଘଟିଲା ଯେଉଁଥିପାଇଁ ବଞ୍ଚିଗଲେ ପରିବାରର ୧୧ ସଦସ୍ୟ । ଆଉ ତାଙ୍କୁ ବଞ୍ଚାଇବାକୁ ସତେ ଯେମିତି ଦେବଦୂତ ସାଜିଥିଲେ ରେଷ୍ଟୁରାଣ୍ଟର କର୍ମଚାରୀ ।
ପହେଲଗାମ୍ ଆତଙ୍କୀ ଆକ୍ରମଣ ଘଟଣା ବିଗତ ୩ ଦିନ ହେବ ପ୍ରତ୍ୟେକ ଭାରତୀୟଙ୍କ ହୃଦୟକୁ ବ୍ୟଥିତ କରିଛି । ସେଦିନର ସେହି ଛାତିଥରା ଦୃଶ୍ୟ ଗୋଟେ ମୁହୁର୍ତ୍ତ ପାଇଁ ମନରୁ ଲିଭି ହେଉନି । ଅନେକ ପରିବାର ନିଜ ପ୍ରିୟ ସଦସ୍ୟଙ୍କୁ ହରାଇ ଧୈର୍ଯ୍ୟହରା ହୋଇ ପଡିଛନ୍ତି ।

ଅନେକ ପରିବାରର ଦୁଃଖଭରା କାହାଣୀ ତ ଆମେ ଦେଖି ସାରିଲେଣି, କିନ୍ତୁ ଏମିତି ଏକ ପରିବାର ବି ଅଛନ୍ତି, ଯିଏ ମାତ୍ର ୧୫ ମିନିଟ୍ ବିଳମ୍ବ ଯୋଗୁଁ ସୌଭାଗ୍ୟବଶତଃ ବଞ୍ଚି ଯାଇଛନ୍ତି । କେରଳର କୋଚିର ଏକ ପରିବାରର ୧୧ ଜଣ ସଦସ୍ୟ ଆସିଥିଲେ କାଶ୍ମୀରର ବୁଲିବା ପାଇଁ । ପ୍ରଥମେ ସେମାନେ ଶ୍ରୀନଗରରେ ପହଞ୍ଚିଥିଲେ । ପରେ ସେଠାରେ ପହେଲଗାମରେ ରହି ସେଠାରୁ ହିଁ ବୁଲାବୁଲି କରିବାକୁ ସ୍ଥିର କରିଥିଲେ । ପରିବାରରେ ସ୍ବାମୀ ସ୍ତ୍ରୀ, ତାଙ୍କର ପୁଅ ବୋହୁ ନାତି ନାତୁଣୀ ମିଶି ସମୁଦାୟ ୧୧ ଜଣ ସଦସ୍ୟ ଥିଲେ ।

ସମସ୍ତେ ପହେଲଗାମ୍‌ର ସେହି ଘାଟି ସ୍ଥାନକୁ ବୁଲି ଯିବା ପୂର୍ବରୁ ମଧ୍ୟାହ୍ନ ଭୋଜନ କରିବାକୁ ସ୍ଥିର କରିଥିଲେ । ଯେଉଁଠାରେ ମଧ୍ୟାହ୍ନ ଭୋଜନ କରିବାକୁ ସ୍ଥିର କରିଥିଲେ, ସେହି ସ୍ଥାନ ପହେଲଗାମ୍‌ର ସେହି ଯମଘାଟି ଠାରୁ ଦେଢ କିଲୋମିଟର ଥିଲା । ଏବଂ ସେହି ଗୁଳିକାଣ୍ଡ ଘଟିବାର ଏକ ଘଣ୍ଟା ପୂର୍ବରୁ ହିଁ ସେମାନେ ସେଠାରେ ଖାଇବା ପାଇଁ ଏକ ରେଷ୍ଟୁରାଣ୍ଟ ଯାଇଥିଲେ । ସେଠାରେ ରୋଗାନ୍ ଜୁସ୍ ପାଇଁ ଅର୍ଡର ଦେଇଥିଲେ । ହେଲେ ଖାଇବା ବେଳେ ସ୍ଵାଦ ଭଲ ନଥିବାରେ ସେମାନେ ଖାଇବା ଆଉ ନଖାଇ ବିଲ୍‌ କରି ଉଠିଯିବାକୁ ସ୍ଥିର କରିଥିଲେ । ହେଲେ ରେଷ୍ଟୁରାଣ୍ଟ ମାଲିକ ତାଙ୍କୁ ଆଉ ଥରେ ଭଲରେ ତିଆରି କରି ଦେବାକୁ ଅଟକାଇଥିଲେ । ଏବଂ ଖାଇକି ଯିବାକୁ ଅନୁରୋଧ ମଧ୍ୟ କରିଥିଲେ । ଯେଉଁଥିପାଇଁ ପରିବାର ଲୋକଙ୍କର ୧୫ ମିନିଟ୍ ବିଳମ୍ବ ହୋଇଥିଲେ । ଆଉ ଥରେ ଖାଇବା ପରେ ସେମାନେ ବାହାରି ଯେତେବେଳେ ଅଧ କିଲୋମିଟର ଯାଇଛନ୍ତି, ସେତେବେଳେ ଅନେକ ପର୍ଯ୍ୟଟକ ପହେଲଗାମ୍‌ର ସେହି ଘାଟିରୁ ତଳକୁ ଖସୁଥିଲେ । ଏବଂ ଏହି ପରିବାରକୁ ଉପରକୁ ଯିବାକୁ ମନା କରିଥିଲେ । ଆଉ ଜଣେ ରକ୍ତ ଜୁଡୁବୁଡୁ ଅବସ୍ଥାରେ ମଧ୍ୟ ତଳକୁ ଖସୁଥିବାର ଦେଖିଥିଲେ ଏହି ପରିବାର । ଯେଉଁଥିପାଇଁ ସେମାନେ ସେଠାରେ ଫେରି ନିଜ ହୋଟେଲ ରୁମକୁ ଚାଲି ଆସିଥିଲେ । ଏବଂ ପରେ ୨ ଦିନ ଭିତରେ ସେମାନେ କେରଳ ଚାଲି ଯାଇଥିଲେ ।

ଏହି ଘଟଣାରେ ରେଷ୍ଟୁରାଣ୍ଟ କର୍ମଚାରୀଙ୍କ ପାଇଁ ତାଙ୍କର ବିଳମ୍ବ ହେଇଥିବାରୁ ଏବଂ ସେଠାରେ ନପହଞ୍ଚି ବଞ୍ଚି ଯାଇଥିବାରୁ ଧନ୍ୟବାଦ ମଧ୍ୟ ଜଣାଇଥିଲେ ଏବଂ ତାଙ୍କୁ ଭଗବାନ ବୋଲି ମଧ୍ୟ କହିଥିଲେ । ସେଥିପାଇଁ କୁହାଯାଏ କେବେ କେବେ ବିଳମ୍ବ ହେବା ମଧ୍ୟ ଖୁବ ଭଲ । ସେହି ୧୫ ମିନିଟ୍‌ର ବିଳମ୍ବ ହିଁ ପୁରା ପରିବାରର ଜୀବନ ରକ୍ଷା କରିଥିଲା ।