ଶେଷରେ ସତ କହିଲା ପାକିସ୍ତାନ, ଭାରତ ମାନି ନଥିଲା ଆମେରିକାର 'ମଧ୍ୟସ୍ଥତା' ପ୍ରସ୍ତାବ
Key Points
'ମଧ୍ୟସ୍ଥତା' ନେଇ ଆମେରିକାର ପ୍ରସ୍ତାବକୁ ଖାତିର୍ କରି ନଥିଲା ଭାରତ । ଅପରେସନ୍ ସିନ୍ଦୂରକୁ ନେଇ ବଡ଼ ବୟାନ ଦେଇଛି ପାକିସ୍ତାନ । ଏଥିସହ ଖୋଲି ଯାଇଛି ନିଜକୁ ଶାନ୍ତିର ଦୂତ କହୁଥିବା ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଡାହା ମିଛ ।
ନୂଆଦିଲ୍ଲୀ: ପାକିସ୍ତାନ ଖୋଲିଲା ଟ୍ରମ୍ପଙ୍କ ମୁଖା । 'ମଧ୍ୟସ୍ଥତା' ନେଇ ଆମେରିକାର ପ୍ରସ୍ତାବକୁ ଖାତିର୍ କରି ନଥିଲା ଭାରତ । ଅପରେସନ୍ ସିନ୍ଦୂରକୁ ନେଇ ବଡ଼ ବୟାନ ଦେଇଛି ପାକିସ୍ତାନ । ଏଥିସହ ଖୋଲି ଯାଇଛି ନିଜକୁ ଶାନ୍ତିର ଦୂତ କହୁଥିବା ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଡାହା ମିଛ । ଭାରତ-ପାକିସ୍ତାନ ମଧ୍ୟରେ ଅସ୍ତ୍ରବିରତି କରାଇଥିବା କହି ଟ୍ରମ୍ପ ବାହା ବାହା ନେବାକୁ ଚାହୁଁଥିବା ବେଳେ ଭାରତ ମନା କରି ଆସୁଛି ।
ଆଉ ଏବେ ପାକିସ୍ତାନ ମଧ୍ୟ ସମାନ କତା ଦୋହରାଇ ଟ୍ରମ୍ପଙ୍କୁ ଧରା ପକାଇଛି । ପାକିସ୍ତାନର ବିଦେଶ ମନ୍ତ୍ରୀ ଇଶାକ ଏକ ସାର୍ବଜନୀନ କାର୍ଯ୍ୟକ୍ରମରେ କହିଛନ୍ତି, `ଅସ୍ତ୍ରବିରତି ନେଇ ତୃତୀୟ ପକ୍ଷର ମଧ୍ୟସ୍ଥତା ଭାରତ ଚାହିଁ ନଥିଲା । ଆମେରିକାର ପ୍ରସ୍ତାବରେ କଦାପି ରାଜି ହୋଇନଥିଲା ଭାରତ । ମଧ୍ୟସ୍ଥତା ନେଇ ଭାରତ କୌଣସି ସମୟରେ ସହମତ ନଥିଲା । ଇଶାକ କହିଛନ୍ତି, ଡୋନାଲ୍ଡ ଟ୍ରମ୍ପ ଏକାଧିକ ଥର ମଧ୍ୟସ୍ଥତା ଲାଗି ପ୍ରସ୍ତାବ ଦେଇଥିଲେ । ଟ୍ରମ୍ପଙ୍କ ମଧ୍ୟସ୍ଥତା ନେଇ ଆମେରିକା ବୈଦେଶିକ ମନ୍ତ୍ରୀ ରୁବିୟୋଙ୍କୁ ପଚାରିଥିଲେ ଈଶାକ ଡାର ।
ରୁବିୟୋ ସ୍ପଷ୍ଟ କରିଥିଲେ, `ଭାରତ ସର୍ବଦା ଏହାକୁ ଦ୍ଵିପାକ୍ଷିକ ପ୍ରସଙ୍ଗ କହି ଆସୁଛି । ମେ ୭ରେ ଅପରେସନ୍ ସିନ୍ଦୂର ଆରମ୍ଭ ହେବାର ମାତ୍ର ୪ ଦିନ ପରେ ପାକିସ୍ତାନ DGMO ଭାରତର DGMOଙ୍କୁ ଫୋନ୍ କରି ଯୁଦ୍ଧ ବିରତି ପ୍ରସ୍ତାବ ଦେଇଥିଲେ । ଗୋଟିଏ ଦିନ ପୂର୍ବରୁ ଜୈଶ ନେତା ମାସୁଦ ଇଲିୟାସ କାଶ୍ମୀରୀ ଏକ ଭାଇରାଲ୍ ଭିଡିଓରେ ଅପରେସନ୍ ସିନ୍ଦୂରରେ କ୍ଷତି ବିଷୟରେ ସ୍ୱୀକାର କରିଥିଲେ ।
ଇଶାକ ଆହୁରି କହିଛନ୍ତି, ଆମେ କୌଣସି ଜିନିଷ ଭିକ ଭାବେ ମାଗୁ ନାହୁଁ । ଯଦି କୌଣସି ଦେଶ ଆଲୋଚନା ଚାହୁଁଛି ତ ପାକିସ୍ତାନ ଖୁସି ହେବ, ଆମେ ସ୍ଵାଗତ କରିବୁ । ପାକିସ୍ତାନ ଏକ ଶାନ୍ତିପ୍ରିୟ ଦେଶ । ଆମେ ଭାବୁଛୁ ଆଲୋଚନା ହିଁ ହେଉଛି ଆଗକୁ ବଢ଼ିବାର ରାସ୍ତା । କିନ୍ତୁ ଆଲୋଚନା ପାଇଁ ଉଭୟଙ୍କ ଇଚ୍ଛା ଆବଶ୍ୟକ । ଏଥିପାଇଁ ଭାରତ ଯେ ପର୍ଯ୍ୟନ୍ତ ଆଲୋଚନା ଚାହୁଁ ନାହିଁ, ସେ ପର୍ଯ୍ୟନ୍ତ ଏହା ହୋଇ ପାରିବ ନାହିଁ ।
