ପହଲଗାମ୍ ଆତଙ୍କୀ ଆକ୍ରମଣ ପରେ ଭାରତ ନେବ ବଡ ପଦକ୍ଷେପ । କିନ୍ତୁ କଣ ପଦକ୍ଷେପ ନେବ ତାହା ଏପର୍ଯ୍ୟନ୍ତ ଚୂଡାନ୍ତ ହୋଇନାହିଁ । ସେପଟେ କିନ୍ତୁ ପାକିସ୍ତାନ ପୁରା ଛାନିଆ । ଆସନ୍ତା ୨୪ରୁ ୩୬ଘଣ୍ଟା ଭିତରେ ଇସଲାମବାଦ ବିରୋଧରେ ଭାରତ ସାମରିକ ଆକ୍ରମଣ କରିପାରେ ବୋଲି ପାକିସ୍ତାନର ସୂଚନା ଓ ପ୍ରସାରଣ ମନ୍ତ୍ରୀ ଅତାଉଲ୍ଲା ତରାର କହିଛନ୍ତି । ଭାରତର ଯେ କୌଣସି ଆକ୍ରମଣ ପାଇଁ ପାକିସ୍ତାନ ପ୍ରସ୍ତୁତ ବୋଲି ସେ କହିଛନ୍ତି । ପୂର୍ବରୁ ପାକିସ୍ତାନ ପହଲଗାମ୍ ଆତଙ୍କୀ ଆକ୍ରମଣର ନିରପେକ୍ଷ ତଦନ୍ତ ପାଇଁ ଦାବି କରି ଆସୁଥିଲା ।

ସେପଟେ ପହଲଗାମ ବର୍ବରକାଣ୍ଡ ନେଇ ଆଜି ବସୁଛି ବଡ଼ ବୈଠକ । ଦିନ ୧୧ଟାରେ ସୁରକ୍ଷା ସମ୍ପର୍କିତ କେନ୍ଦ୍ର କ୍ୟାବିନେଟ୍ ବୈଠକ ବସିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ବସୁଥିବା ବୈଠକରେ କିଛି ବଡ଼ ନିଷ୍ପତ୍ତି ନିଆଯାଇପାରେ । ଏହା ସହ ଆଉ ଦୁଇଟି ବଡ଼ ବୈଠକ ହେବ । ସିସିପିଏ ଓ କ୍ୟାବିନେଟ୍ ବୈଠକ ମଧ୍ୟ ଆଜି ହେବ । ଏହା ପୂର୍ବରୁ ଗତକାଲି ମୋଦୀଙ୍କ ବାସଭବନରେ ବସିଥିବା ବୈଠକରେ ସେନାକୁ ପୂର୍ଣ୍ଣ ସ୍ବାଧୀନତା ଦେଇଛନ୍ତି ପ୍ରଧାନମନ୍ତ୍ରୀ । ଆକ୍ରମଣ ପାଇଁ ସମୟ, ଟାର୍ଗେଟ, ଶୈଳୀ ସ୍ଥିର କରିବାକୁ ନିର୍ଦ୍ଦେଶ ଦେଇଛନ୍ତି । ପ୍ରତିରକ୍ଷା ମନ୍ତ୍ରୀ, ଏନ୍‌ଏସ୍‌ଏ, ସିଡିଏସ୍‌ ଓ ତିନି ସେନାମୁଖ୍ୟଙ୍କ ସହ ମୋଦୀ ଓ ଶାହାଙ୍କ ଗୁରୁତ୍ବପୂର୍ଣ୍ଣ ବୈଠକରେ ଏନେଇ ନିଷ୍ପତ୍ତି ହୋଇଛି । ଜାମ୍ମୁ-କାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣ ପରେ ଆକ୍ସନ୍‌ ମୋଡ୍‌ରେ ଅଛନ୍ତି କେନ୍ଦ୍ର ସରକାର ।

ଭାରତ-ପାକିସ୍ତାନ ବିବାଦକୁ ନେଇ ଜାତିସଂଘ ଚିନ୍ତା ପ୍ରକଟ କରିଛି । ପହଲଗାମ ଆକ୍ରମଣକୁ ନେଇ ଦୁଇ ଦେଶ ମଧ୍ୟରେ ଉପୁଜିଥିବା ବିବାଦରେ ହସ୍ତକ୍ଷେପ କରିଛି ୟୁଏନ୍ । ଘଟଣାକୁ ନେଇ ଚିନ୍ତାପ୍ରକଟ କରିଛନ୍ତି ଜାତିସଂଘର ସେକ୍ରେଟାରି ଜେନେରାଲ ଆଣ୍ଟୋନିଓ ଗୁଟେରେସ୍ । ବୁଧବାର ସକାଳେ ଏ ସମ୍ପର୍କରେ ଦୁଇ ଦେଶର ନେତାଙ୍କ ସହ କଥା ହୋଇଛନ୍ତି ଆଣ୍ଟୋନିଓ ଗୁଟେରେସ୍ । ପାକିସ୍ତାନ ପ୍ରଧାନମନ୍ତ୍ରୀ ସେହେବାଜ ସରିଫ୍ ଏବଂ ଭାରତର ବୈଦେଶିକ ବ୍ୟାପର ମନ୍ତ୍ରୀ ଏସ୍ ଜୟଶଙ୍କରଙ୍କ ସହ ସେ ଫୋନ୍ ଯୋଗେ ଅଲଗା ଅଲଗା କଥା ହୋଇଛନ୍ତି । ଏନେଇ ଜାତିସଂଘ ପକ୍ଷରୁ ନ୍ୟୁୟର୍କରେ ସୂଚନା ଦିଆଯାଇଛି । ଗତ ଏପ୍ରିଲ ୨୨ରେ ହୋଇଥିବା ଜମ୍ମୁ କାଶ୍ମୀରର ପହଲଗାମ ଆତଙ୍କୀ ଆକ୍ରମଣକୁ କଡ଼ା ନିନ୍ଦା କରିବା ସହ ନ୍ୟାୟିକ ପ୍ରକ୍ରିୟାରେ ନ୍ୟାୟ ପ୍ରଦାନ କରିବାକୁ ପରାମର୍ଶ ଦେଇଛନ୍ତି ଜାତିସଂଘ ମହାସଚିବ । ପରସ୍ପର ମୁହାଁମୁହିଁ ହେବାଠୁ ଦୂରେଇ ନରହିଲେ ସ୍ଥିତି ଜଟିଳ ହୋଇପାରେ ବୋଲି କହିଛନ୍ତି ଆଣ୍ଟୋନିଓ ଗୁଟେରେସ୍ ।