ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଭାରତ-ପାକିସ୍ତାନ ମଧ୍ୟରେ ତିକ୍ତତା ଏବେ ଚରମ ସୀମାରେ । ଯେବେଠୁ ପାକିସ୍ତାନ ବିରୁଦ୍ଧରେ ଅନେକ କଠୋର ପଦକ୍ଷେପ ନେଇଛି ଭାରତ । ଆଉ ସେବେଠାରୁ ପାକିସ୍ତାନ ସେନା ଅଧିକାରୀଙ୍କଠାରୁ ଆରମ୍ଭ କରି ନେତା ଓ ମନ୍ତ୍ରୀ ତଥା ସାଂସଦମାନେ ମଧ୍ୟ ଭାରତକୁ ଟାର୍ଗେଟ କରି କହିବାରେ ପଛଘୁଞ୍ଚା ଦେଉନାହାନ୍ତି । ଏହି ସମୟରେ, ପାକିସ୍ତାନ ସେନା ମୁଖପାତ୍ର ଲେଫ୍ଟନାଣ୍ଟ ଜେନେରାଲ ଅହମ୍ମଦ ସରିଫ ଚୌଧରୀ ଭାରତକୁ ଦେଇଛନ୍ତି ଚେତାବନୀ ।

ଅହମ୍ମଦ ସରିଫ ଚୌଧୁରୀ ବୁଧବାର ଭାରତକୁ ଚେତାବନୀ ଦେଇ କହିଛନ୍ତି ଯେ ଯଦି ଭାରତ କୌଣସି ଆକ୍ରମଣ କରେ, ତେବେ ଏହାର କଡ଼ା ଏବଂ ସୁଚିନ୍ତିତ ଜବାବ ଦିଆଯିବ। ସେ କହିଥିଲେ ଯେ, “ଆକ୍ରମଣର ସ୍ଥାନ ଭାରତ ସ୍ଥିର କରିବ, କିନ୍ତୁ ଏହା କେଉଁଠାରେ ଶେଷ ହେବ ତାହା ଆମେ ସ୍ଥିର କରିବୁ।” ଇସଲାମାବାଦରେ ଉପପ୍ରଧାନମନ୍ତ୍ରୀ ଏବଂ ବୈଦେଶିକ ମନ୍ତ୍ରୀ ଇସାକ ଦାରଙ୍କ ସହ ଏକ ମିଳିତ ସାମ୍ବାଦିକ ସମ୍ମିଳନୀରେ ଅହମଦ ସରିଫ ଚୌଧୁରୀ ଏହି ବିବୃତ୍ତି ରଖିଛନ୍ତି। ପାକିସ୍ତାନର ସେନା, ନୌସେନା ଏବଂ ବାୟୁସେନା ତିନୋଟି ମୋର୍ଚ୍ଚା ସ୍ଥଳ, ବାୟୁ ଏବଂ ସମୁଦ୍ରରେ ଜବାବ ଦେବାକୁ ସମ୍ପୂର୍ଣ୍ଣ ପ୍ରସ୍ତୁତ। ପାକିସ୍ତାନ ପୂର୍ବ ଏବଂ ପଶ୍ଚିମ ସୀମା ଉଭୟରେ ନଜର ବୃଦ୍ଧି କରିଛି । ପାକିସ୍ତାନର ସାର୍ବଭୌମତ୍ୱ ଏବଂ ସୁରକ୍ଷାକୁ ରକ୍ଷା କରିବା ପାଇଁ ଆମେ ଯେକୌଣସି ସୀମାକୁ ଯିବୁ । ସମସ୍ତ ପ୍ରତିଶୋଧମୂଳକ ପଦକ୍ଷେପ ପ୍ରସ୍ତୁତ । ଆମର ସେନା ସମ୍ପୂର୍ଣ୍ଣ ସତର୍କ ଏବଂ ସଜାଗ ଅଛନ୍ତି ।”

ଅନ୍ୟପଟେ ପହଲଗାମ ଆତଙ୍କବାଦୀ ଆକ୍ରମଣ ସମ୍ପର୍କରେ ଭାରତ ଦ୍ୱାରା କରାଯାଇଥିବା ଅଭିଯୋଗକୁ ପ୍ରତ୍ୟାଖ୍ୟାନ କରିଛନ୍ତି ପାକିସ୍ତାନ ସେନା ମୁଖପାତ୍ର ଲେଫ୍ଟନାଣ୍ଟ ଜେନେରାଲ ଅହମ୍ମଦ ସରିଫ ଚୌଧୁରୀ । ସେ ପ୍ରଶ୍ନ ଉଠାଇଥିଲେ ଯେ, ଭାରତ କିପରି କିଛି ମିନିଟ ମଧ୍ୟରେ ନିଷ୍ପତ୍ତି ନେଲା ଯେ ଏହି ଆକ୍ରମଣ ପଛରେ ପାକିସ୍ତାନର ହାତ ଅଛି। ସେ କହିଛନ୍ତି ଯେ, “ଯେଉଁଠାରେ ଆକ୍ରମଣ ହୋଇଥିଲା ତାହା ନିୟନ୍ତ୍ରଣ ରେଖା (LoC) ଠାରୁ ପ୍ରାୟ ୨୩୦ କିଲୋମିଟର ଦୂରରେ। ଏତେ କଷ୍ଟକର ରାସ୍ତା ଦେଇ କେହି କିପରି ୧୦ ମିନିଟରେ ସେଠାରେ ପହଞ୍ଚିପାରିବେ?”

ସେ ଓଲଟା ଅଭିଯୋଗ କରିଛନ୍ତି ଯେ, ଭାରତ ସରକାର ନିର୍ବାଚନ ପୂର୍ବରୁ ଏକ ମୁସଲିମ ବିରୋଧୀ ପରିବେଶ ସୃଷ୍ଟି କରିବା ପାଇଁ ଆତଙ୍କବାଦ ସମ୍ବନ୍ଧୀୟ ଘଟଣାଗୁଡ଼ିକୁ ବ୍ୟବହାର କରୁଛନ୍ତି। ସେ କହିଥିଲେ ଯେ, “ଏହା କିଛି ନୂଆ କଥା ନୁହେଁ। ଭାରତ ପ୍ରଥମେ ପାକିସ୍ତାନକୁ ଦୋଷାରୋପ କରେ, ତା’ପରେ ଏକ ରାଜନୈତିକ କାହାଣୀ ସୃଷ୍ଟି କରେ ଏବଂ ନିର୍ବାଚନ ଜିତିବା ପାଇଁ ଏହାକୁ ବ୍ୟବହାର କରେ।” ସେ ଏହା ମଧ୍ୟ ଦାବି କରିଥିଲେ ଯେ ଭାରତୀୟ ଜେଲରେ ବନ୍ଦୀ ଥିବା ପାକିସ୍ତାନୀ କଏଦୀମାନଙ୍କୁ ନକଲି ଏନକାଉଣ୍ଟରରେ ହତ୍ୟା କରାଯାଉଛି। ଏକ ଉଦାହରଣ ଦେଇ ସେ କହିଛନ୍ତି ଯେ ମହମ୍ମଦ ଫାରୁକଙ୍କୁ ଉରିରେ ଅନୁପ୍ରବେଶକାରୀ କହି ହତ୍ୟା କରାଯାଇଥିଲା ଯେତେବେଳେ ସେ ଜଣେ ନିର୍ଦ୍ଦୋଷ ପାକିସ୍ତାନୀ ନାଗରିକ ଥିଲେ।

Argus News | argus news | -Argusnews Home: Odisha Latest News, Breaking News, Trending News, Live TV and more